ޔޫރަޕިއަން ޔޫނިއަން އިން ރާއްޖޭގެ ވަކިވަކި ފަރުދުންނާ ދެކޮޅަށް ފިޔަވަޅު އެޅުމަށް ނިންމާފައިވާ ލިސްޓްގައި 41 ނަމެއް އޮތްކަން ހާމަވެއްޖެއެވެ. 

ޔޫރަޕިއަން ޕާލިމެންޓްގެ މެމްބަރު ތޯމަސް ޒެޗޮވްސްކީ ޔޫރަޕިއަން ޕާލިމެންޓްގެ މެމްބަރުންގެ ހަބަރުތައް ގެނެސްދޭ ވެބްސައިޓެއް ކަމަށްވާ އީޕީ ޓުޑޭއަށް ދެއްވި އިންޓަވިއުއެއްގައި ވިދާޅުވީ ރާއްޖޭގެ ވަކިވަކި ފަރުދުންނާ ދެކޮޅަށް ފިޔަވަޅު އެޅުމަށް ނިންމައި ތައްޔާރުކޮށްފައިވާ ލިސްޓް ފެނިފައިވާ ކަމަށާއި އެ ލިސްޓްގައި 41 ނަމެއް އޮތްކަން އެނގޭ ކަމަށެވެ. އެއީ ވަކިވަކި ފަރުދުންނާ ދެކޮޅަށް އެޅުމަށް ނިންމާފައިވާ ފިޔަވަޅުތަކެއް ކަމަށާއި މިއީ އެކަން ތަންފީޒުކުރަންވީ ވަގުތު ކަމަށް ވެސް އޭނާ ވިދާޅުވިއެވެ. ހަމައެހެންމެ އެއީ ވަރަށް ސާފު ސީދާކޮށް ނިންމާފައިވާ ނިންމުމެއް ކަމަށް ވެސް އޭނާ ވިދާޅުވިއެވެ.

ޒެޗޮވްސްކީ އިތުރަށް ވިދާޅުވީ އިންތިހާބުގެ ނަތީޖާ އޮޅުވާލައިފި ނަމަ ބައިނަލްއަގްވާމީ މުޖުތަމައު އިން ބަލަން ނުތިބޭނެ ކަމަށާއި އެކަންކަން ކުރާ ފަރާތްތަކާ ދެކޮޅަށް ގުޅިގެން ފިޔަވަޅު އަޅާނެ ކަމަށެވެ. އެގޮތުން ރާއްޖޭގައި ގާނޫނުގެ ވެރިކަން ދަމަހައްޓައި ޑިމޮކްރަސީ ދެމެހެއްޓުމަށް ކުރެވެން ހުރި ހުރިހާ ކަމެއް ވިލާތުގެ އިއްތިހާދާއި ކެނެޑާ، އެމެރިކާ، އޮސްޓްރޭލިއާ، ނިއުޒިލޭންޑް، އިންޑިއާ އަދި ޖަޕާންގެ އިތުރުން އެހެން ގައުމުތައް ގުޅިގެން ކުރާނެ ކަމަށް ވެސް އޭނާ ވިދާޅުވިއެވެ. އޭނާ ވިދާޅުވީ ފިޔަވަޅު އަޅަން ނިންމާފައިވާ ފަރާތްތަކުގެ ލިސްޓް ހާމަކުރައްވާނެ ކަމަށެވެ.

މިއަހަރުގެ މާޗް މަހު ރާއްޖޭގެ ސިޔާސީ މަސްރަހާ ގުޅިގެން ޔޫރަޕިއަން ޕާލިމެންޓަށް ހުށަހެޅުނު ހާއްސަ ގަރާރުގެ ސްޕެޝަލް ރެޕެޓުއަރއަކީ ޒެޗޮވްސްކީއެވެ. 

ޒެޗޮވްސްކީގެ އިތުރުން ޔޫރަޕިއަން ޕާލިމެންޓްގެ އެހެން މެމްބަރެއް ކަމަށްވާ ރައިޒާޑް ޒަނެކީ އީޕީ ޓުޑޭއަށް ވިދާޅުވީ ޔޫރަޕިއަން ޔޫނިއަން އާއި އެޖަމާއަތަށް ވާގިވެރިވާ އެހެން ގައުމުތަކާ ގުޅިގެން ފިޔަވަޅު އެޅުމަށް އަވަސް ވެގަންނަން ޖެހޭ ކަމަށެވެ. ހަމައެހެންމެ ރައީސް ޔާމީނަށް އިންސާނީ ހައްގުތަކަށް އަރައިގަންނަން ވާގިވެރިވާ އެއްވެސް ފަރާތަކަށް ފިލުމުގެ ފުރުސަތެއް ނޯންނާނެ ކަމަށާއި އެމީހުންގެ ނަންނަތައް ދުނިޔޭގެ އެކި ކަންކޮޅުތަކުގައި ތިބި ފަރާތްތަކަށް އެނގޭނެ ކަމަށް ވިދާޅުވެ އޭނާ ވަނީ އެފަދަ ފަރާތްތަކަށް އިންޒާރު ދެއްވާފައެވެ. މީގެ އިތުރުން ރައީސް ޔާމީން ވެރިކަމުގައި ބެހެއްޓުމަށް ވާގިވެރިވާ ފަރާތްތަކާ ދެކޮޅަށް ފިޔަވަޅު އެޅުމުން އެމީހުންގެ ދިފާއުގައި ރައީސް ޔާމީން ނުނުކުންނަވާނެ ކަމަށް ވެސް އޭނާ ވިދާޅުވިއެވެ.

ޔޫރަޕިއަން އިކޮނޮމިކް އެންޑް ސޯޝަލް ކައުންސިލްގެ 30 ވަނަ ރައީސް ހެންރީ މަލޯސީ މިކަމާއި ގުޅިގެން ވިދާޅުވީ ރާއްޖޭގެ ސިޔާސީ މަސްރަހުގައި ހިނގަމުންދާ ކަންކަމަކީ ބައިނަލްއަގްވާމީ މުޖުތަމައު ވަރަށް ކަންބޮޑުވާ ކަމެއް ކަމަށާއި ދުނިޔޭގެ ކޮންމެ ގައުމެއްގައި ވެސް ހުދުމުހުތާރު ވެރިޔަކު ހުރެއްޖެ ނަމަ ރާއްޖޭ އޮތް ހާލަތަށް އެގައުމެއް ވެއްޓުމަކީ ވެދާނެ ކަމެއް ކަމަށެވެ. ރައީސް ޔާމީނަށް ރާއްޖެ އަނދަވަޅަކަށް ވައްޓާލުމުގެ ފުރުސަތު ނުދޭނެ ކަމަށް އޭނާ ވިދާޅުވިއެވެ.

ހަމައެހެންމެ އޭނާ ވިދާޅުވީ ކުރިޔަށް އޮތް ރިޔާސީ އިންތިހާބު ބިރު ދައްކައި މަކަރު ހަދައިގެން ރައީސް ޔާމީން ކާމިޔާބު ކުރަށްވަފިނަމަ ފިޔަވަޅު އަޅާނީ ހަމައެކަނި ރައީސް ޔާމީނަށް ނޫން ކަމަށާއި ފަތުރުވެރިކަމާއި ރާއްޖެއަށް އަންނަ އިންވެސްޓްމަންޓްތައް އެއްކޮށް ހުއްޓުވާނެ ކަމަށެވެ.

ރައީސް ޔާމީނާއި އެމަނިކުފާނަށް ވާގިވެރިވާ ފަރާތްތަކާއި ދެކޮޅަށް ފިޔަވަޅު އެޅުމަށް އެންމެ ފުރަތަމަ ނިންމާފައިވަނީ މާޗް މަހު އީޔޫގެ ކައުންސިލަށް ރާއްޖޭގެ މައްސަލަ އާއި ގުޅިގެން ހުށެހެޅުނު ގަރާރާއި ވިދިގެން މިދިޔަ ޖުލައި މަހުގެ 16 ވަނަ ދުވަހުއެވެ. އެގަރާރާއެކު އެކުލަވާލުމަށް ނިންމި ފްރޭމްވާރކް ވެސް އީޔޫއިން ވަނީ ހާމަކޮށްފައެވެ.

މިފިޔަވަޅުތަކުގެ ތެރޭގައި އީޔޫގެ ގައުމުތަކަށް ނުވަދެވުމާއި ޓްރާންސިޓް ނުކުރެވުމާއި އެކައުންޓްތައް ފްރީޒް ކުރުން ހިމެނެއެވެ. އަދި ފަންޑުތައް ހިފެހެއްޓޭނެ ކަމަށް ވެސް އީޔޫއިން ބަޔާންކޮށްފައިވެއެވެ. އީޔޫގެ މި ފިޔަވަޅުތަކުގެ އަސަރު ބޮޑު ކުރުމަށްޓަކާއި އީޔޫ މެމްބަރު ގައުމުތަކުގެ އިތުރުން އީޔޫއިން ދުނިޔޭގެ އެހެން ގައުމުތަކަށް ވެސް  ރާއްޖެއާ މެދު އީޔޫ އިން ވަކިވަކި މީހުންނާއި އިދާރާތަކާ މެދު އަޅާނެ ފިޔަވަޅުތައް އެޅުމަށް ބާރުއަޅާނެ ކަމަށް އީޔޫއިން ބުނެފައިވެއެވެ.