ޕީއެސްއެމުން ރިޔާސީ އިންތިހާބުގައި ވާދަ ކުރާ ކެންޑިޑޭޓުންނަށް ދައުލަތުގެ މީޑިއާ, ޕީއެސްއެމްއިން ވަގުތު ދޭނެ ސްލޮޓުތައް ގުރުއަތުލައިގެން ހޮވައިފިއެވެ.

ޕީއެސްއެމުން ބުނީ އެއަރ ޓައިމް ދޭނެ އުސޫލާއި ވިޔަފާރި އުސޫލުން ރިޔާސީ ކެންޑިޑޭޓުންނަށާއި ސިޔާސީ ޕާޓީތަކަށް ވަގުތު ވިއްކާ އަގު ކަނޑައަޅައި، ކެންޑިޑޭޓުންގެ މަންދޫބުންނާ އެކަން ހިއްސާކޮށްފައިވާ ކަމަށެވެ.

ބްރޯޑްކާސްޓިން ކޮމިޝަނުން ކަނޑައަޅާފައިވާ އުސޫލުގައި ބުނެފައިވާ ގޮތުން، ކެންޑިޑޭޓުންނަށް ވަގުތު ކަނޑައަޅާފައި ވަނީ 9:00 އިން ފެށިގެން 12:00އާ ހަމައަށެވެ.

ޕީއެސްއެމްގެ ޗަނަލްތަކުން ކެންޑިޑޭޓުންނަށް ވަގުތު ދިނުމާ ގުޅޭ ގޮތުން، އެންމެ ބޮޑު ދެ ޕާޓީއާ ވަނީ ބައްދަލުކޮށްފައެވެ. އެ ބައްދަލުވުމުގައި އެމްޑީޕީގެ ފަރާތުން ބައިވެރިވެވަޑައިގެންނެވީ ސެކަރެޓަރީ ޖެނަރަލް އަދި ގާނޫނީ ވަކީލު އަނަސް އަބްދުއްސައްތާރާއި އިބޫގެ ކެމްޕެއިންގެ މީޑިއާ ޓީމުގައި ހަރަކާތްތެރިވެވަޑައިގަންނަވާ ތޮއްޔިބު މުހައްމަދު އެވެ. ޕީޕީއެމްގެ ފަރާތުން އެ ބައްދަލުވުމުގައި ބައިވެރިވެވަޑައިގެންނެވީ ހޯމް މިނިސްޓްރީގެ ޑެޕިއުޓީ މިނިސްޓްރީ އަހުމަދު ސިއްދީގެވެ.

ޕީއެސްއެމުން ބުނީ އެއަރ ޓައިމް ދިނުމާ ގުޅޭ އުސޫލުގެ ދަށުން، ކެންޑިޑޭޓުންނަށް އެއަރ ޓައިމް ދޫކުރާނީ އެކަމަށް އެ ކުންފުނިން ދޫކުރާ ހާއްސަ ފޯމެއް ފުރިހަމަކޮށް، ކެންޑިޑޭޓަށް ދީފައިވާ ސްލޮޓުގެ ވަގުތު ހަމަވުމުގެ 48 ގަޑިއިރުގެ ކުރިން ފޯމު ހުށަހަޅައި ފޯމު ބަލައިގަތް ކަމުގެ ރިސިޕްޓު އެ ކުންފުންޏަށް ލިބުމުން ކަމަށެވެ.

ބްރޯޑްކާސްޓްކުރާ ފަރާތްތަކުން ކެންޑީޑޭޓުންނަށް ހާއްސަކުރާ ވަގުތު ދޭން ވާނީ ހަމަހަމަކަމާ އެކުގައެވެ. އެއް ކެންޑީޑޭޓަކަށް ދޭން ކަނޑައަޅާފައިވާ ވަގުތަށް ވުރެ އިތުރު ވަގުތު، އެހެން ކެންޑިޑޭޓަކަށް ވިއްކައިގެން ނުވާނެ ކަމަށް އެ ގާނޫނުގައި ބުނެފައިވެއެވެ.

ނަމަވެސް ރިޔާސީ އިންތިހާބުގެ ގާނޫނުގައި ދައުލަތައް ލާޒިމުކޮށްފައި ވަނީ ރިޔާސީ ކެންޑިޑޭޓުންނަށް ހަމަހަމަ އުސޫލަކުން ހިލޭ އެއަރ ޓައިމް ދޭންވާނެ ކަމަށެވެ.