ވިޔަފާރިވެރިން ބިރުގަންނަނީ އިންކަމް ޓެކްސް ދެކެ ނޫންކަމަށާއި، މޯލްޑިވްސް އިންލެނޑް އޮތޯރިޓީ (މީރާ) ދެކެ ކަމަށް ގަމު ދާއިރާގެ މެންބަރު ފައްޔާޒު އިސްމާއިލް ވިދާޅުވެއްޖެއެވެ.
ހޯމަ ދުވަހުގެ ރޭ ރާއްޖެޓީވީގެ ފަލަސުރުޚީ ޕްރޮގްރާމްގައި ފައްޔާޒު ވިދާޅުވީ ޓެކްސްގެ މުހިއްމުކަން ދިވެހިން މިއަދު ގަބޫލްކުރާ ކަމަށާއި މިއަދު މި ނިޒާމަކީ ދިވެހިން ބަލައިގެންފައިވާ ކާމިޔާބު ނިޒާމެއް ކަމަށެވެ.
"އިންކަމް ޓެކްސް ނެގުމަށް ވިޔަފާރިވެރިންނެއް ދެކޮޅެއް ނޫން. ދެކޮޅު ހަދަނީ އެފައިސާ ބޭނުންކުރާ ގޮތާއި ޒާތީ މައުލޫމާތު ބޭނުންކޮށްފާނެ ގޮތަކާއިމެދު. ސިޔާސީ ނުފޫޒުން [މީރާއިން] މީހުން ހޭ އަރުވާލައިފާނެކަމުގެ ބިރު އޮންނަނީ،" ފައްޔާޒު ވިދާޅުވިއެވެ.
ފައްޔާޒު ވިދާޅުވި ގޮތުގައި އިންކަމް ޓެކްސް ނެގުމަށް މިއަދު މި ނިޒާމު އޮތީ ފައްކާވެފައެވެ. އަދި އެ ޓެކްސް ނަގާނީވެސް ވަރަށް ގިނަ ބައެއްގެ ލަފަޔާއި ޚާއްސަކޮށް ވިޔަފާރިވެރިންގެ ބައިވެރިވުމާއި މަޝްވަރާއާއިއެކުގައި ކަމަށް ވިދާޅުވިއެވެ. ވޭތުވެ މިދިޔަ ދުވަސްތަކުގައިވެސް ވިޔަފާރިވެރިންނާއި މަޝްވަރާކުރެވި ރިސާޗްތައް ހެދިފައި ވާއިރު ދައުލަތަށް އެއްޗެއް ދިނުމަށް ވިޔަފާރިވެރިން ދެކޮޅު ނޫން ކަމަަށް ފައްޔާޒު ވިދާޅުވިއެވެ.
"ވިޔަފާރިވެރިންވެސް ގަބޫލުކުރޭ ފަގީރުންނާއި މުއްސަނދީންގެ ފަރަގު އެހާ ބޮޑުވެގެން ގޮސްފިކަމުގައިވާނަމަ ގައުމުގެ ހަމަޖެހުމެއް ނޯންނާނެކަން ވަކިހިސާބަކަށް ދާއިރު،" އޭނާ ވިދާޅުވިއެވެ.
ރައީސް މުހައްމަދު ނަޝީދުގެ ވެރިކަމުގައި 2011 ވަނަ އަހަރު ޓެކްސް ނިޒާމް ތައާރަފްކުރެއްވިއިރު މީރާ އަކީ އޭރު ވަރަށް މަގުބޫލު ރައްޔިތުންގެ އިތުބާރު އޮތް ތަނެއް ކަމަށާއި، އެހެން ނަމަވެސް ވޭތުވެދިޔަ ހަތަރުވަރަކަށް އަހަރުތެރޭގައި، މީރާ ސިޔާސީވެ ސަރުކާރުން ބޭނުންވާ ވިޔަފާރިވެރިއަކަށް ހޭ އަރުވާލުމުންދާ ކަމަށެވެ. މީރާގެ އަގުވެއްޓިފައިވަނީ އެހެން ވެގެން ކަމަށާއި، ގުޅިފައިވާ ޕާޓީތަކުގެ ސަރުކާރެއް އައުމަށް ފަހު މީރާ ހަމައަކަށް އަޅުވައި އެތަނުގެ ވެރިއަކަށް މިހާރު ހުންނެވި ކޮމިޝަނަ ޖެނެރަލް އޮފް ޓެކްސޭޝަން ޔަޒީދު މުހައްމަދު ޖަވާބުދާރީ ކުރުވާނެ ކަމަށް ވެސް ފައްޔާޒު ވިދާޅުވިއެވެ.
"މިހާރު އޮތް މުއައްސަސާތަކުގެ ތެރެއިން އެންމެ ނުބައި އެއް މުއައްސަސާ މީރާއަކީ. މީރާއަކީ ރަންނަމާރިއެއް. ކޮންމެ މަހަކު އަރާ ފިހާރަތަކުގެ ވިޔަފާރިތަކުގެ ވަތްގަނޑުތަކުގެ އިއްފަތް ފޭރިގަންނަ ބަޔަކަށްވަނީ ވެފައި" ފައްޔާޒު ވިދާޅުވިއެވެ.
މީރާ ހަމައަކަށް އަޅުވާނެ ކަމަށް ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހް ވަނީ ވައުދުވެވަޑައިގެންފަ އެވެ.
