ދިވެހިން އެއްބައިވަންތަ ވުމަށް ރައީސް ގޮވާލައްވައިފި
އަލްހާއީދުގެ ތަހުނިޔާ ވަނީ ފޮނުއްވާފައި
ރައީސް އަބުދުﷲ ޔާމީން އަބުދުލް ގައްޔޫމް
ދިވެހިންގެ މެދުގައި އެއްބައިވަންތަކަމާއި އެކުވެރިކަމުގެ ގުޅުން އިތުރަށް ވަރުގަދަކޮށް، އެއްބައެއްވަންތަ ބައެއްގެ ގޮތުގައި ކުރިއަށް ދިޔުމުގެ ޢަޒުމް އާކުރެއްވުމަށް ރައީސުލްޖުމްހޫރިއްޔާ އަބްދުﷲ ޔާމީން އިލްތިމާސް ކުރައްވައިފިއެވެ.
ބަރަކާތްރެރި ހައްޖު ދުވަހާއި އަލްހާ އީދުގެ ތަހުނިޔާ އެންމެހާ ދިވެހިންނަށް ފޮނުއްވަމުން ރައީސް އަބުދުﷲ ޔާމީން ވިދާޅުވީ، އިސްލާމްދީން އެއްބައިވަންތަ ކަމަށް ބާރުއަޅައި ގޮވާލާ މިންވަރު، ޙައްޖުގެ މަތިވެރި މަނާސިކުން އަޅުގަނޑުމެންނަށް އެނގިގެންދާކަމަށެވެ. ދިވެހިންގެ މެދުގައި އެއްބައިވަންތަކަމާއި އެކުވެރިކަމުގެ ގުޅުން އިތުރަށް ވަރުގަދަކޮށް، އެއްބައެއްވަންތަ ބައެއްގެ ގޮތުގައި ކުރިއަށް ދިޔުމުގެ މަތިވެރި ޢަޒުމް އާކުރެއްވުމަށް ރައީސް ޔާމީން އިލްތިމާސް ކުރެއްވިއެވެ.
ރައީސުލްޖުމްހޫރިއްޔާގެ ޚިޠާބުގައި، އަޟުޙާ ޢީދުގެ މުނާސަބަތަކީ، މުސްލިމުންގެ މެދުގައި ހިތްހެޔޮކަމާއި އުފާވެރިކަމުގެ ޝުޢޫރުތައް ފާޅުކުރުމުގެ މުނާސަބަތެއް ކަމަށާއި، ދިވެހިންގެ މެދުގައި އޮތް އެއްބަނޑު އެއްބަފާކަމާއި، އަޚުވަންތަކަމުގެ ގުޅުން ޤާއިމުކޮށް ދެމެހެއްޓުމުގެ މުހިއްމުކަން އަޅުގަނޑުމެންގެ ހިތްތަކަށް ގެނެސްދޭ އުފާވެރި މުނާސަބަތެއްކަމުގައި ރައީސުލްޖުމްހޫރިއްޔާ ފާހަގަކުރައްވާފައިވެއެވެ.
ރައީސުލްޖުމްހޫރިއްޔާގެ ޚިޠާބުގައި ބަރަކާތްތެރި އަޟްޙާ ޢީދުގެ ހެޔޮއެދުންތަކާއި ތަހުނިޔާ މުޅި އިސްލާމީ އުންމަތަށްވެސް ފޮނުއްވާފައިވެ އެވެ.
ދިވެހިން އެއްބައިވަންތަ ވުމަށް ރައީސް ޔާމީން ގޮވާލެއްވިއިރު، އެ މަނިކުފާނާ ވާދަވެރި ހުރިހާ ސިޔާސީ ލީޑަރުން ވަނީ ޖަލަށް ލައިފަ އެވެ.
