ކެރަލާގައި ހާލުގައި ޖެހުނު ފަރާތްތަކަށް އިބޫއާއި ނަޝީދު ހަމްދަރުދީ ފާޅުކުރައްވައިފި
ކެރަލާއަކީ ރާއްޖެއާ އެތައް ގޮތަކުން ގުޅިފައިވާ ތަނެއް
ރައީސް ނަޝީދާއި ކެންޑިޑޭޓް އިބޫ
މޫސުމް ގޯސްވެ އިންޑިޔާގެ ކެރަލާ ސްޓޭޓްގައި ހާލުގައި ޖެހުނު ދިވެހި އާއިލާ ތަކަށާއި ކެރަލާގެ ރައްޔިތުންނަށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ޞާލިޙް އާއި ކުރީގެ ރައީސް މުހައްމަދު ނަޝީދު ހަމްދަރުދީ ފާޅު ކުރައްވައިފިއެވެ.
އިބޫ ކުރެއްވި ޓްވީޓެއްގައި ވިދާޅުވީ ކެރަލާ އަކީ އަޅުގަނޑުމެންނާ އެތައް ގޮތަކުން ގާތް ތަނެއް ކަމަށެވެ. މޫސުމް ގޯސްވެ ހާލުގައި ޖެހިފައިވާ ދިވެހި އާއިލާތަކަށާއި ކެރަލާ ރައްޔިތުންނަށް ރައްކާތެރި ކަމަށް އެދިވަޑައިގަންނަވާ ކަމަށް އިބޫ ވިދާޅުވިއެވެ.
ރައީސް ނަޝީދު ކުރެއްވި ޓްވީޓެއްގައި ވިދާޅުވެފައިވަނީ ކެރަލާގައި މިދިމާވި ފެންބޮޑުވުމުގެ ހާދިސާގައި ހާލުގައި ޖެހިފައިވާ މީހުންނާމެދު ކަންބޮޑުވެ ހެޔޮ ދުއާ ކުރައްވާ ކަމަށެވެ. އަދި މިވިއްސާރައިގެ ސަބަބުން ވެސް އިންސާނުންގެ އަމަލު ތަކާހުރެ މޫސުމަށް އަންނަމުންދާ ބަދަލުތަކުގެ ސަބަބުން ލިބޭ އިންސާނީ އަދި މާލީ ގެއްލުން ހާމަވެގެންދާ ކަމަށް އެމަނިކުފާނު ވަނީ ވިދާޅުވެފައެވެ.
އިންޑިއާގެ ކެރެލާއަށް ބޯކޮށް ވާރޭވެހި މިދިޔަ ހަފްތާގައި ފެންބޮޑުވުމުގެ ސަބަބުން އަދިވެސް ގިނަ ސަރަހައްދުތައް ވަނީ ފެނު އަޑީގައެވެ.
އެންމެފަހުގެ ހަބަރުތައް ބުނާގޮތުން ކެރެލާގައި ފެންބޮޑުވެފައިވާ ސަރަހައްދުތަކުން މަރުވެފައިވާ މީހުންގެ އަދަދު މިހާރު ވަނީ 324 އަށް އަރާފައެވެ. އަދި އެސްޓޭޓްގެ 11 ޑިސްޓްރިކްޓަކަށް ވަނީ ރެޑް އެލާޓް ނެރެފައެވެ.
