އަވަހަށް ނިންމަން އިންތިހާއަށް އަގު ބޮޑުކުރިއަސް ކަންކަން ނިންމިފައެއް ނެތް: މާރިޔާ
15 އޯގަސްޓު 2018 | ބުދަ 10:10ހަތަރު އަހަރުވީ މާލޭގެ މަގުަތައް ތަރައްޤީ ކުރާވާހަކަ ދައްކަވާތާ. އާޚިރުގައި އެމްއާރުޑީސީވެސް އުވުނީ
ގުޅިފައިވާ ޕާޓީތަކުގެ ރިޔާސީ ކެންޑިޑޭޓްގެ ތަރުޖަމާން މާރިޔާ އަހުމަދު ދީދީ
ޕްރޮޖެކްޓްތަކުގެ އަގު ބޮޑުވަނީ އަވަސް ސްޕީޑުގައި ކަންކަން ނިންމުމަށް ކަމަށް ސަރުކާރުން ވިދާޅުވިނަމަވެސް އެކަން އެހެން ޤަބޫލު ކުރެވޭކަށް ނެތްކަމަށާއި ނިންމަން ބުނާ އެއްވެސް ތާރީޚަކަށް ކަންކަން ނިންމިފައި ނުވާ ކަމަށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓުގެ ތަރުޖަމާން މާރިޔާ އަހުމަދު ދީދީ ވިދާޅުވެއްޖެއެވެ.
ގުޅިފައިވާ ޕާޓީތަކުގެ ކެންޑިޑޭޓް އިބްރާހީމް މުހައްމަދު ސޯލިހަށް، ރައީސް ޔާމީން ގެންދަވާ ސްޕީޑުގައި ތަރައްޤީގެ ކަންކަން ނުކުރެއްވޭނެ ކަމަށް ސަރުކާރުގެ ބޭފުޅުން ވިދާޅުވާ ވިދާޅުވުމަށް ރައްދު ދެއްވައި ގުޅިފައިވާ ޕާޓީތަކުން ބުދަ ދުވަހު ބޭއްވި ޕްރެސް ކޮންފަރެންސްގައި މާރިޔާ ވިދާޅުވީ ކިތައްމެ ވަރަކަށް އަވަހަށް ނިންމަން ޕްރޮޖެކްޓްތަކުގެ އަގު އިންތިހާއަށް ބޮޑު ކުރެއްވިނަމަވެސް ކަންކަން ކުރެވިފައި ނެތްކަމަށެވެ. އަދި ނިންމަން ބުނާ ތާރީޚްތަކަށް ކަންކަން ނުވުމުގެ އިތުރުން ގިނަ ކަންކަން އެއްވެސް ވަރަކަށް ކުރެވިފައި ނުވާކަމަށްވެސް މާރިޔާ ވިދާޅުވިއެވެ.
މާރިޔާ ވިދާޅުވީ ސަރުކާރުން އެބުނާ އަވަސް ސްޕީޑުގައި ކުރެވިފައިހުރި ކަމެއް ނުފެންނަކަމަށާއި ބައެއް ފަހަރަށް މަސައްކަތް އަވަސްކުރަން ހަދާ ކުންފުނިވެސް އޮންނަނީ މަސައްކަތް ނުނިމެނީސް އުވިގެން ގޮސްފައި ކަމަށެވެ. އޭގެ މިސާލެއްގެ ގޮތުގައި މާރިޔާ ވަނީ ރޯޑްކޯޕަރޭޝަންގެ ނަން ފާހަގަ ކުރައްވާފައެވެ.
"ހަތަރު އަހަރުވަންދެން ބަޖެޓްގައި ޖައްސަވައިގެން ބޮޑު ޕްރޮޖެކްޓެއްގެ ގޮތުގައި މާލޭގެ މަގުތައް ތަރައްޤީ ކުރުމުގެ ވާހަކަ ދައްކަވަނީ ނިމިގެން ދިޔައިރު އާޚިރުގައި އެމްއާރުޑީސީވެސް ވީތަނެއް ނޭނގި އެތަންވެސް އުވިގެން ދިޔައީ. ޖުލައި 26 އަށް ނިންމަންބުނި ބްރިޖްވެސް އަދިވެސް އެއުޅެނީ ނުނިމިގެން" މާރިޔާ ވިދާޅުވިއެވެ.
ކުޅުދުއްފުށީ އެއަރޕޯޓްގައި އޮގަސްޓްމަހު ފްލައިޓް ޖައްސާނެކަމަށް ރައީސް ޔާމީން ވިދާޅުވެފައިވާތީ އެކަމަށް އިޝާރާތް ކުރައްވާ މާރިޔާ ވިދާޅުވީ ރައްޔިތުން ކަންބޮޑުވަމުން ދިޔައީ އެރަށުގައި އެއަރޕޯޓެއް އަޅާތީ ނޫން ކަމަށާއި ކުޅި ހިއްކައިގެން އެކަން ކުރުން ކަމަށެވެ. ނަމަވެސް މިހާރު ކުޅިވެސް ހިއްކައިފިކަމަށާއި އަދިވެސް އެއަރޕޯޓް ލޮލަށް ނުފެންނަ ކަމަށެވެ.
އިދިކޮޅު ކެންޑިޑޭޓް ވައުދުވަމުން ގެންދަވަނީ ރައީސް ޔާމީންގެ ވައުދުތައްކަމަށް ސަރުކާރުގެ ވެރިން ދައްކަވާ ވާހަކައަށް ރައްދު ދެއްވަމުން މާރިޔާ ވިދާޅުވީ އިބޫ ވެވަޑައިގަންނަވަނީ އެއްވެސް ވަރަކަށް ރައީސް ޔާމީންގެ ވައުދުތައް ނޫން ކަމަށާއި އިބޫގެ މައިގަނޑު 3 ވައުދެއް ވާކަމަށެވެ.
" އިބްރާހީމް މުހައްމަދު ސޯލިހް އެވިދާޅުވަނީ ވައްކަމެއް ނުކުރައްވާނަމޭ، ކޮރަޕްޝަން ނައްތާލައްވާނަމޭ، އަނިޔާވެރިއެއް ނުވާނަމޭ. މިއީ އަޅުގަނޑުމެންގެ އެންމެބޮޑު ތިން ވައުދަކީ. މިވައުދައިގެން އަޅުގަނޑުމެން ނުކުމެ މިތިބީ" މާރިޔާ ވިދާޅުވިއެވެ.
މި ޕްރެސް ކޮންފަރެންސްގައިވެސް މާރިޔާ ވަނީ ރައީސް މުހައްމަދު ނަޝީދަށާއި ޤާސިމް އިބްރާހީމަށް އަދި ޝައިޚް އިމަރާނަށާއި ރައީސް މައުމޫނަށްވެސް ތާއީދު ކުރައްވާ ހުރިހާ ބޭފުޅުން 23 ސެޕްޓެމްބަރުގައި އިބޫއަށް ވޯޓު ދެއްވުމަށް ގޮވާލައްވާ ގޮވާލެއްވުން ތަކުރާރު ކުރައްވާފައެވެ.
