ނޫސްވެރިކަމުގެ އިނާމަށް ކުރިމަތިލުމުގެ ފުރުސަތު ހުޅުވާލައިފި
ފުރުސަތު ހުޅުވާލާފައިވަނީ ސެޕްޓެމްބަރު މަހުގެ 10 ވަނަ ދުވަހުގެ ނިޔަލަށް
މިދިއަ އަހަރު ބޭއްވި ނޫސްވެރިކަމުގެ އިނާމު ދިނުމުގެ ޖަލްސާގައި ރާއްޖޭޓީވީގެ ނޫސްވެރިން އިހުތިޖާޖު ކުރަނީ
މޯލްޑިވްސް މީޑިއާ ކައުންސިލުން ދޭ، "ނޫސްވެރިކަމުގެ އިނާމު" އަށް ނަން ހުށަހެޅުމުގެ ފުރުސަތު ހުޅުވާލައިފި އެވެ.
އަންގާރަ ދުވަހު އެ މީޑިއާ ކައުންސިލުން ކޮށްފައިވާ އިއުލާނެއްގައި ވަނީ މިމަހުގެ 14 ވަނަ ދުވަހުން ފެށިގެން ސެޕްޓެމްބަރު 10 ވާ ހޯމަ ދުވަހުގެ މެންދުރުފަހު 13:30 ގެ ކުރިން އެ ކައުންސިލަށް ހުށަހެޅުން އެދޭ ކަމަށެވެ.
އިނާމު ދިނުމަށް ކަނޑައެޅިފައިވާ ދާއިރާތަކަކީ: 1. އިޖުތިމާއީ ދާއިރާ 2. ސިޔާސީ ދާއިރާ 3. ޝަރުއީ އަދި ޤާނޫނީ ދާއިރާ 4. ވިޔަފާރިއާއި އިޤުތިޞާދުގެ ދާއިރާ 5. ކުޅިވަރުގެ ދާއިރާ 6. ފޮޓޯ ޖާނަލިޒަމްގެ ދާއިރާ 7. ވީޑިއޯ ޖާނަލިޒަމްގެ ދާއިރާ 8. ފީޗަރ ލިޔުމުގެ ދާއިރާ މީގެ އިތުރުން، އެންމެ އުންމީދީ ނޫސްވެރިޔާގެ އިނާމު ހިމެނެއެވެ.
ނޫސްވެރިކަމުގެ އިނާމު ދިނުމަށް މިދިއަ އަހަރުގެ އޮކްޓޯބަރު މަހުގެ 11 ވަނަ ދުވަހު ރޭ ބޭއްވި ރަސްމިއްޔާތުގައި، ބްރޯޑްކާސްޓިން ކޮމިޝަނުން ރާއްޖެ ޓީވީއަށް ވަމުންދާ ބޭއިންސާފު ހާމަކޮށް، މިނިވަން ނޫސްވެރިކަމަކަށް ގޮވާލައި ސުލްހަވެރި އިހުތިޖާޖެއް ކޮށްފައިވެއެވެ.
ބްރޯޑްކާސްޓިން ކޮމިޝަނުން ރާއްޖެ ޓީވީ ފަސް ލައްކަ ރުފިޔާއިން ޖޫރިމަނާކޮށްފައި ވަނިކޮށް، ދިވެހިރާއްޖޭގެ ނޫސްވެރިންނަށް އިނާމު ދިނުމުގެ ޖަލްސާއަށް ރާއްޖެ ޓީވީގެ ނޫސްވެރިން ހާޒިރުވީ "އަބުރު" ޖަހާފައިވާ ޓީޝާޓްގަ އެވެ. ދަރުބާރުގޭގެ މައި މާލަމަށް ރާއްޖެ ޓީވީގެ ނޫސްވެރިން ވަދެ، މިނިވަން ނޫސްވެރިކަމަކަށް ގޮވާލާފައިވާ ޝިއާރުތަކާއި ބްރޯޑްކާސްޓިން ކޮމިޝަންގެ ރައީސް މުހައްމަދު ޝަހީބުގެ އިސްތިއުފާ އަށް ގޮވާލައި ލިޔެފައިވާ ބޯޑްތަކާއެކު އިހުތިޖާޖު ކޮށްފައިވެއެވެ.
ގައުމީ ސަލާމަތަށް ނުރައްކާތެރި ވާހަކައެއް ދެއްކި ކަމަށްބުނެ ރާއްޖެޓީވީ ފަސް ލައްކަ ރުފިޔާއިން ޖޫރިމަނާ ކުރުމާ ގުޅިގެން ހުޅުވާފައިވާ އަބުރުފުޅު ފަންޑު ފޮށި ވެސް މި ޖަލްސާގައި ބަހައްޓާފައެވެ.
ރާއްޖެޓީވީ އެފަހަރު ޖޫރިމަނާކޮށްފައި ވަނީ 2017 ޖުލައި މަހުގެ 28 ވަނަ ދުވަހުގެ ރޭ ވަގުތުން ގެނެސްދިން ޕްރޮގްރާމެއްގައި ތިމަރަފުށީ ދާއިރާގެ މެމްބަރު މުހައްމަދު މުސްތަފާ ދެއްކެވި ވާހަކަފުޅަކާ ގުޅިގެންކަމަށް ބްރޯޑްކާސްޓިންގ ކޮމިޝަނުން ވަނީ ބުނެފައެވެ.
ނޫސްވެރިންނަށް އިނާމު ދިނުމުގެ މިއަހަރުގެ ޖަލްސާ ބާއްވަން ތައްޔާރުވަމުންދާއިރު އަނެއްކާވެސް ރާއްޖެޓީވީ މިވަނީ ހަތަރު ވަނަ ފަހަރަށް ޖޫރިމަނާ ކޮށްފަ އެވެ. މިފަހަރު ޖޫރިމަނާކޮށްފައި ވަނީ ދެ މިލިއަން ރުފިޔާއިން ނެވެ.
ބްރޯޑްކޮމްއިން މިހާތަނަށް ރާއްޖެޓީވީ 3.7 މިލިއަން ރުފިޔާއިން ވަނީ ޖޫރިމަނާ ކޮށްފަ އެވެ.
