ރީ-ރަޖިސްޓްރޭޝަން އޮޅުވާލާފައިވާ ކަމުގެ ޝަކުވާ ބޮޑުވެއްޖެ
ހުށަހަޅާފައި ނުވާ މީހުން ވެސް، އެހެން ތަންތަނަށް ރަޖިސްޓްރީކޮށްފައިވޭ
ރައްޔިތުންގެ މަޖިލީހުގެ އިންތިހާބުގެ ވޯޓު ގުނުން ކުރިއަށް ދަނީ
ރަށްވެހިވެފައިވާ ރަށް ނޫން އެހެން ތަނަކަށް ވޯޓުލުމަށް ރީ-ރަޖިސްޓްރީ ކުރުމަށް ފޯމު ހުށަހަޅަން ހުޅުވާލި ފުރުސަތުގައި ގިނަ ބަޔަކު ވޯޓުލާންޖެހޭ ތަން ބަދަލުކޮށް، ވޯޓު ނުލެވޭ ގޮތަށް ރަޖިސްޓްރީ ކުރި ކަމުގެ ޝަކުވާ ބޮޑުވެއްޖެއެވެ.
ޝަކުވާ ބޮޑުވެފައި ވަނީ ރީރަޖިސްޓްރޭޝަނަށް އެންމެ ފަހުން ހުށަހެޅި ފޯމުތަކާ އެކު، އެ މީހަކަށް ނޭނގި، ބޭނުން ނުވާ ތަނަކަށް ވޯޓުލާން ރަޖިސްޓްރީ ކޮށްފައިވާތީއެވެ. ރަށްވެހިވެފައިވާ ރަށް ނޫން އެހެން ތަނަކަށް، ވޯޓުލުމަށް ފޯމު ހުށަހަޅާފައި ނުވާ މީހުން ވެސް އެހެން ތަންތަނަށް ވޯޓުލުމަށް ރަޖިސްޓްރީކޮށްފައިވާ ކަމުގެ ޝަކުވާ ވެސް ވަނީ ބޮޑުވެފައެވެ. އެކަމުގެ ކަންބޮޑުވުން ސޯޝަލް މީޑިއާގައި ގިނަ ބަޔަކު ދަނީ ފާޅު ކުރަމުންނެވެ.
ވިލިނގިލީ ދާއިރާގެ މެމްބަރު ސައުދު ހުސައިން ކުރެއްވި ޓްވީޓެއްގައި ވިދާޅުވީ ވިލިނގިލީ ގިނަ ރައްޔިތުން ވޯޓުލުމުގެ ހައްގު ނިގުޅައި ގަތުމަށް އެކި ރަށް ރަށަށް އޮޅުވާލައިގެން ވޯޓު ރަޖިސްޓްރީކޮށްފައިވާ ކަމަށެވެ. ސައުދު ކުރެއްވި ޓްވީޓުގައި ގއ. ވިލިނގިލީގެ ފަސް މީހަކު ވޯޓުލުމަށް ރަޖިސްޓްރީކޮށްފައިވާ ތަން އޮޅުވާލާފައި ވާތީ، އިލެކްޝަންސް ކޮމިޝަނުން ފޮނުވާ ރަޖިސްޓްރޭޝަން އެސްއެމްއެސްގެ ސްކްރީންޝޮޓުތަކެއް ހިމަނާފައިވެއެވެ.
ސައުދު ވިދާޅުވީ ވިލިނގިލީ ރައްޔިތުންގެ ވޯޓު ވަގަށް ނަގަން، އެ ރައްޔިތުން ފުރުސަތު ނުދޭނެ ކަމަށެވެ.
އިލެކްޝަންްސް ކޮމިޝަނުން ބުނީ ރީ-ރަޖިސްޓްރީ ކުރަން ހުޅުވާލި ފުރުސަތު ބަންދުވުމުން، ވޯޓާސް ލިސްޓު އަލުން އިސްލާހުކޮށް އާންމު ކުރާނެ ކަމަށެވެ. އާންމު ކުރުމާއެކު ޝަކުވާ ހުށަހެޅުމަށް ތިން ދުވަހުގެ ފުރުސަތެއް ލިބޭނެ ކަމަށާއި އެ މުއްދަތުގެ ތެރޭގައި ޝަކުވާތައް ބެލުމަށްފަހު އިސްލާހުތައް ގެންނާނެ ކަމަށެވެ.
