ޕޮލިސް އެކަޑަމީން މުޅިން އަލަށް ފަރުމާކޮށްގެން ހިންގި ފަސްޓް ލައިން މެނޭޖްމަންޓް ކޯހުގެ ފުރަތަމަ ބުރު ނިންމައި ދަސްވެނިވި ބައިވެރިންނަށް ލިޔުން ހަވާލުކޮށްދެއްވައިފިއެވެ.
ހޯމަ ދުވަހު އިސްކަންދަރު ބިލްޑިންގ މަލްޓިޕާޕަސް ހޯލުގައި ބޭއްވި ރަސްމިއްޔާތު ޝަރަފްވެރިކޮށްދެއްވައި ދަސްވެނިންނަށް ލިޔުން ހަވާލުކޮށްދެއްވީ އެކްޓިންގ ކޮމިޝަނަރ އޮފް ޕޮލިސް އަބްދުﷲ ނަވާޒްއެވެ.
މިރަސްމިއްޔާތުގެ ކޯސް ފުރިހަމަކުރި ބައިވެރިންނަށް މަރުހަބާ ދަންނަވާ ނަވާޒު ވިދާޅުވީ ނިމިގެންދިޔަ މި ކޯހަކީ ތާރީޚީ ކޯހެއްކަމަށާއި، ތަމްރީނު ޕްރޮގްރާމްތަކުގެ ބޭނުން އޭގެ އެންމެ ފުރިހަމަ ގޮތުގައި ހިފަންޖެހޭ ކަމަށެވެ. އަދި ދިވެހި މުޖުތަމަޢަށް އަންނަ ބަދަލުތަކާ މެދު ވިސްނައި ފުލުހުންގެ ޚިދުމަތް ދިނުމުގައި އެކަންކަމަށް ރަނގަޅަށް ވިސްނުމަށް އެދިވަޑައިގެންނެވިއެވެ.
ފަސްޓް ލައިން މެނޭޖްމަންޓަކީ ގިނަ އަދަދެއްގެ ފުލުހުން ހަރަކާތްތެރިވާ އަދި ރައްޔިތުންނާ ސީދާ ގުޅުންހުރި ޚިދުމަތްތައް ދެމުންދާ ދާއިރާއަކަށްވާތީ، ކޮންމެ މުވައްޒަފަކު ވެސް ރައްޔިތުންނަށް ޚިދުމަތްދިނުމުގައި ހިނިތުންވުމާ އެކު އެންމެ ފުރިހަމަ ޚިދުމަތެއް ދިނުމަށް މަސައްކަތްކުރުމަށް ނަވާޒް އިލްތިމާސްކުރެއްވިއެވެ.
ފަސްޓް ލައިން މެނޭޖްމަންޓް ކޯހަކީ ފުލުހުންގެ ތެރެއިން ކޯޕްރަލްގެ މަގާމުން ސާޖަންޓްގެ މަގާމަށް ގިންތި ބަދަލުވުމަށް ފުރިހަމަ ކުރަންޖެހޭ ކޯހެކެވެ. މި ކޯހަކީ މިއަހަރު މުޅިން އަލަށް ފަރުމާކޮށްގެން ޕޮލިސް އެކަޑަމީން ހިންގި ކޯހެކެވެ.
މިއަހަރުގެ ޖުލައި މަހުގެ 1ން އޮގަސްޓް 12ށް ހިންގި މި ކޯހުގައި 28 ފުލުހަކު ބައިވެރިވެފައިވާއިރު ކޯހުން ފާސްވެ ސެޓްފިކްޓް ހާސިލްކޮށްފައިވަނީ 27 ފުލުހެކެވެ.
މި ކޯހުން ހުރިހާ ގޮތަކަށް އެންމެ ރަނގަޅު ބައިވެރިޔަކަށް ހޮވުނީ ޕޮލިސް ކޯޕްރަލް އާގިލާ ހާމިދުއެވެ. ފުލުހުން ބުނީ ހަ ހަފްތާގެ މުއްދަތަށް ހިންގި މި ކޯހުގައި ނުވަ މޮޑިއުލެއް ކިޔަވައިދީފައިވާ ކަމަށެވެ.
