ކުރިއަށް އޮތް ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންނަށް ރާއްޖޭގެ ހުރިހާ ޗެނަލްތަކަކުން އެއް އަގެއްގައި އެއްވަރަކަށް ވަގުތު ދޭން ޖެހޭނެކަމަށް ބްރޯޑް ކާސްޓިންގ ކޮމިޝަނުން ލާޒިމްކޮށްފިއެވެ.
ބްރޯޑްކޮމްއިން ސަރުކާރުގެ ގެޒެޓްގައި ހޯމަ ދުވަހު ޢާއްމުކުރި އިންތިޚާބީ ކެންޑިޑޭޓުންނަށް ބްރޯޑްކާސްޓަރުންގެ ވަގުތު ޚާއްޞަކުރުމުގެ ހަމަތައް ބަޔާންކުރުމާއި، އިދާރީ ފިޔަވަޅު އެޅުމާބެހޭ އުޞޫލުގައި ބުނެފައިވާ ގޮތުގައި ކުރިއަށް އޮތް ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންގެ ނަންތައް އިލެކްޝަންސް ކޮމިޝަނުންހާމަކުރާތާ 48 ގަޑިއިރުގެ ތެރޭގައި އެކެންޑިޑޭޓުންނާއި އެކެންޑިޑޭޓުން ނިސްބަތްވާ ސިޔާސީ ޕާޓީއަށް އެޗެނަލްއަކުން ހިލޭ ދޫކުރުމަށް ނުވަތަ ވިއްކުމަށް ޚާއްޞަކުރާ ވަގުތުތަކާއި ވިއްކާނަމަ ވިއްކާ އަގުތައް ބަޔާން ކުރަން ޖެހެއެވެ. އަދި ހަފުތާއެއްގެ ތެރޭގައި ހުރިހާ ކެންޑިޑޭޓުންނަށްވެސް އެއްވަރަކަށް ފުރުސަތު ދޭން ޖެހޭނެކަމަށް ވަނީ ބުނެފައެވެ.
އެ އުސޫލުގައި ބުނެފައިވާ ގޮތުގައި އެއް ކެންޑިޑޭޓަކަށްވުރެ އަނެއް ކެންޑިޑޭޓަކަށް ހިލޭވިއަސް އަދި ވިއްކައިގެން ވިއަސް އިތުރަށް ފުރުސަތު ދީގެން ނުވާނެ ކަމަށާއި ހުރިހާ ފަރާތްތަކަށްވެސް ވަގުތު ވިއްކަން ވާނީ އެއް އަގެއްގައެވެ.
އެއުސޫލުގައި ބުނެފައިވަނީ ކެންޑިޑޭޓުންނަށް ދޭ ވަގުތު ޚާއްޞަ ކުރަން ވާނީ ރޭގަނޑު 9 އާއި 12 އާ ދެމެދުގައި ކަމަށެވެ. އޭގެ އިތުރުން އިތުރު ވަގުތު ދޭކަށް ހުރަހެއް ނާޅާ ކަމަށްވެސް ބުނެފައިވެއެވެ.
އަދި ކޮންމެ ފަހަރަކު މަދުވެގެން 30 މިނެޓް ދޭން ޖެހޭނެކަމަށްވެސް އުސޫލުގައި ވެއެވެ.
މީގެ އިތުރުން އެވަގުތުތަކުގައި ކުއްލި ޚަބަރެއް އައިސްގެން ނުވަތަ ޓެކްނިކަލް މައްސަލައަކާއި ގުޅިގެން ދީފައިވާ ވަގުތު މެދުކަނޑާލަން ޖެހިއްޖެނަމަ ބާކީ ވަގުތު ވީއެންމެއަވަހަކަށް ދޭން ޖެހޭނެކަމަށް ވަނީ ބުނެފައެވެ.
އުސޫލުގައި ބުނެފައިވަނީ ނަންތައް އިއުލާން ކުރާތާ 48 ގަޑިއިރުގެ ތެރޭގައި ހިލޭދޭ ވަގުތާއި ވިއްކާ ވަގުތާއި އަގުތައް ބޮރޯޑްކޮމް އަށް ހުށަހަޅަން ޖެހެއެވެ. އަދި ވަގުތު ދިން ގޮތުގެ ރިޕޯޓެއް ހަފުތާއަކު އެއްފަހަރު އަދި ވޯޓުލާ ދުވަހުގެ ކުރީ ދުވަހުގެ އިރުއޮއްސި 6 ޖެހުމަށްފަހު 48 ގަޑިއިރުގެ ތެރޭގައި އެކަންކުރިގޮތުގެ ތަފްސީލީ ރިޕޯޓެއް ބްރޯޑްކޮމްއަށް ހުށަހަޅަން ޖެހެއެވެ.
މިއުސޫލުގެ ދަށުން ދެވޭ ވަގުތުގައި އެކެންޑިޑޭޓަކު ނުވަތަ އެކެންޑިޑޭޓަކު ނިސްބަތްވާ ސިޔާސީ ޕާޓީއަކުން ދައްކާ ވާހަކަތަކުގެ ޒިންމާ ނަގަން ޖެހޭނީ ބްރޯޑްކާސްޓް ކުރި ފަރާތަކުންނެވެ.
މިއުސޫލާ ޚިލާފަށް ބްރޯޑްކާސްޓަރަކު ޢަމަލް ކޮށްފިނަމަ އެކަމުގެ ޝަކުވާ ހުށަހެޅޭނީ އެކެންޑިޑޭޓް ނުވަތަ އެކެންޑިޑޭޓެއްގެ އިންތިޚާބީ އެޖެންޓް އަދި އެކެންޑިޑޭޓަކު ނިސްބަތްވާ ޕާޓީއަކަށެވެ. އަދި ބްރޯޑްކާސްޓް ކޮމިޝަނަށްވެސް އެފަދަ ކަމެއް ފާހަގަ ކުރެވިއްޖެނަމަ އެކޮމިޝަނަށް އެކަން ބެލުމުގެ ބާރު ލިބިދެއެވެ.
މިއުސޫލާ ޚިލާފްވެއްޖެނަމަ އެޅޭނެ ފިޔަވަޅުތައް ކަމަށް ބްރޯޑްކޮމްއިން ބުނެފައިވަނީ:-
- ބްރޯޑްކާސްޓަރަށް އެކަމެއް ރަނގަޅުކުރުމަށް އެންގުން.
- ބްރޯޑްކާސްޓަރަށް ދެވޭ އިންޒާރެއް އިއުލާން ކުރުން.
- ކޮމިޝަނުން އަންގާ ވަގުތެއްގައި ކޮމިޝަނުން އަންގާ ގޮތެއްގެމަތިން ކުށުގެ އިސްލާހެއް ޢާއްމުކުރުމަށް ނުވަތަ ކޮށްފައިވާ ކަމެއް އަނބުރާ ގެންދިޔުމަށް ބަޔާނެއް ޢާއްމުކުރުމަށް ބްރޯޑްކާސްޓަރަށް އެންގުން
- ބްރޯޑްކާސްޓަރަކު މިއުސޫލާ ތަކުރާރުކޮށް ޚިލާފްވަމުންދާނަމަ، މައްސަލައިގެ ކުޑަބޮޑުމިނަށް ބަލައި، އެބްރޯޑްކާސްޓަރެއްގެ ޕްރޮގްރާމް ޝެޑިއުލް ނުވަތަ ޕްރޮގްރާމް ޝެޑިއުލުން ބައެއް ވަކި މުއްދަތަކަށް އުނިކުރުމަށް އެންގުމުގެ އިޚްތިޔާރު ކޮމިޝަނަށް ލިބިގެންވުމެވެ.
މިއުސޫލު ދިވެހި ސަރުކާރުގެ ގެޒެޓްގައި ހޯމަދުވަހު ޝާއިއު ކުރުމާއެކު މިހާރު ވަނީ ޢަމަލްކުރަން ފެށިފައެވެ.
