ރިޔާސީ އިންތިހާބު ބާއްވާ ދުވަހަކީ ސަރުކާރު ބަންދު ދުވަހެއް ކަމަށް ކަނޑައަޅައިފި
ރިޔާސީ އިންތިހާބު އެންމެ ފުރަތަމަ ބާއްވަން އޮތީ ސަރުކާރު ހުޅުވިފައި ހުންނަ ދުވަހެއްގައި
2017 ވަނަ އަހަރު ބޭއްވި ލޯކަލް ކައުންސިލް އިންތިހާބުގައި ރައީސް ޔާމީން ވޯޓް ލައްވަނީ
މިއަހަރުގެ ރިޔާސީ އިންތިހާބު ބާއްވަން ނިންމާފައިވާ ސެޕްޓެމްބަރު 23 ވަނަ ދުވަހަކީ ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ކަނޑައަޅުއްވައިފިއެވެ.
ރައީސުލްޖުމްހޫރިއްޔާގެ ތަރުޖަމާނު އިބްރާހިމް މުއާޒް އަލީ ކުރެއްވި ޓުވީޓެއްގައި ވަނީ ރިޔާސީ އިންތިހާބު ބޭއްވުމަށް ހަމަޖެހިފައިވާ ސެޕްޓެމްބަރު 23 ވާ އާދިއްތަ ދުވަސް ސަރުކާރު ބަންދު ދުވަހެއްގެ ގޮތުގައި ރައީސް ޔާމީން ކަނޑައަޅުއްވާފައިވާ ކަމަށެވެ. އަދި ސަރުކާރު އަލުން ހުޅުވޭނީ ޖެހިގެން އަންނަ ދުވަހު، ސެޕްޓެމްބަރު މަހުގެ 24 ވާ ހޯމަ ދުވަހު ކަމަށް މުއާޒް ކުރެއްވި ޓުވީޓްގައި ވެއެވެ.
އިލެކްޝަންސް ކޮމިޝަނުން މިއަހަރުގެ ރިޔާސީ އިންތިހާބު ސަރުކާރު ބަންދު ނޫން ދުވަހެއްގައި ބޭއްވުމަށް ނިންމުމާއި ގުޅިގެން ގިނަ ފާޑުކިޔުންތަކެއް ވެސް އަމާޒުވިއެވެ. އިދިކޮޅު ފަރާތްތަކުން ބުނަމުން ދިޔައީ އީސީއިން އެގޮތަށް ނިންމީ ސަރުކާރު އޮފީސްތަކުގައި އުޅޭ މުވައްޒިފުންނަށާއި ކުންފުނިތަކުގައި އުޅޭ މުވައްޒިފުންނަށް ވޯޓްލުމުގެ ހައްގު ހަނިކުރުމުގެ ގޮތުންނެވެ.
ހަމައެހެންމެ ރިޔާސީ އިންތިހާބު ބާއްވާ ދުވަހަކީ ބަންދު ދުވަހެއްގެ ގޮތުގައި ކަނޑައަޅައި ދިނުމަށް ކުރީގެ ބަންޑާރަ ނައިބު ހުސްނުއްސުއޫދު ސުޕްރީމް ކޯޓަށް ވެސް މައްސަލައެއް ހުށަހެޅުއްވިއެވެ. އެހެން ނަމަވެސް އެ މައްސަލަ ސުޕްރީމް ކޯޓުން ބޭރުކޮށްލިއެވެ.
ރިޔާސީ އިންތިހާބު ބާއްވާ ދުވަހަކީ ސަރުކާރު ބަންދު ދުވަހެއް ކަމަށް ކަނޑައަޅާފައިވާއިރު އިންތިހާބުގައި ވާދަކުރަނީ ޕީޕީއެމްގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް އަދި އިދިކޮޅު ކޯލިޝަންގެ ފަރާތުން ވާދަކުރައްވާ އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) އެވެ.
