ކާނަލް ނާޒިމްގެ ކޮޓަރިއަށް ފިސްތޯލަ ލީ ފުލުހެއް: އާޒިމް

މިވަގުތު ޖަލުގައި ހުންނެވި ކުރީގެ ޑިފެންސް މިނިސްޓަރު ކާނަލް މުހައްމަދު ނާޒިމްގެ ގެއިން ފެނުނު ކަމަށް ބުނާ ފިސްތޯލަ ޕްލާންޓް ކޮށްފައިވަނީ އެ ގެ ބަލައި ފާސްކުރަން ދިޔަ ފުލުހެއް ކަމަށް ނާޒިމްގެ ކޮއްކޮ އާދަމް އާޒިމް ވިދާޅުވެއްޖެއެވެ.

ހޮނިހިރު ދުވަހު މ.ކުނޫޒްގައި އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން އާޒިމް ވިދާޅުވީ އެ މައްސަލާގައި އެ މަންޒަރު ދުށް ފަރާތްތަކުން ހެކި ބަސް ދޭން ތައްޔާރަށް ތިބި ކަމަށް ފާހަގަކޮށް އެންމެ ފުރަތަމަ އެ މައްސަލަ ސުޕްރީމް ކޯޓަށް ހުށަހެޅި ކަމަށާއި އެ ފުރުސަތު ސުޕްރީމް ކޯޓުން އަދި ދީފައިނުވާ ކަމަށެވެ.

Advertisement

ވަގުތު ގެއްލިގެން ދިޔުމަކީ އިންސާފު ގެއްލިގެން ދިޔުންކަން ފާހަގަކުރައްވާ އާޒިމް ވިދާޅުވީ ފިސްތޯލަ ޕްލާންޓް ކޮށްފައިވަނީ ފުލެހެއް ކަމަށް ހެކިބަސް ދޭން މަންޒަރު ދުށް ފުލުހަކު ހުރީ ތައްޔާރަށް ކަމަށެވެ.

"އަޅުގަނޑުމެން ސުޕްރީމް ކޯޓަށް ފުރަތަމަ ލީ މައްސަލައިގައި އޮންނާނެ މަންޒަރު ދުށް ބޭފުޅުން ހެކިބަސް ދޭން ތިބި ކަމަށް ފާހަގަކޮށްފައި އެ ފުރުސަތު ސުޕްރީމް ކޯޓުން ނުދެއްވާ ކަމުގައިވާނަމަ އެތަނަށް ހާޒިރުވެވޭނެ ގޮތެއް ނޯންނާނެ އެހެންކަމުން އެއީވެސް ލިބިފައި ހުރި ބައިވަރު ހެކިތަކެއް ގެއްލިގެންދިޔުން. އެ މަންޒަރު ފެނުނު ފުލުހުންގެ ތެރެއިން މީހަކު އެބަހުރި ހެކިބަސް ދޭން. އެކަން އަޅުގަނޑުމެން އޮންނާނެ ކޯޓަށްލީ ދައުވާގައި ލިޔެފައި" އާޒިމް ވިދާޅުވިއެވެ.

އިންސާފު ނުލިބި ކާނަލް ނާޒިމް ޖަލުގައި ހުންނަވާތާ ތިން އަހަރާއި ބައި މިއަދަށްވެއްޖެކަން ފާހަގަކުރައްވާ ނާޒިމްގެ އަނބިކަނބަލުން އަފާފް އަބްދުލްމަޖީދު ވިދާޅުވީ ނާޒިމް ޑޮކްޓަރަށް ދެއްކުމަށްޓަކައި މާލެ ގެންނައިރު އެއްވެސް ފަހަރަކު ކަރެކްޝަނުން އާއިލާއަށް އަންގާފައިނުވާ ކަމަށާއި ނާޒިމްގެ ސިއްހީ ހާލުކޮޅާއި ބެހޭ އެއްވެސް މައުލޫމާތެއް އެނގިވަޑައިނުގަންނަވާ ކަމަށެވެ. އާފާފް އިތުރަށް ވިދާޅުވީ ރާއްޖޭން ބޭރުން ހަދަން ޖެހޭ މުހިންމު ޓެސްޓުތަކެއް ނާޒިމް ހަދަން ޖެހޭ ކަމަށާއި އެކަމަށް އެދުމުން ވެސް އެ ހުއްދަ ނުދޭ ކަމަށެވެ.

"އަދި ނާޒިމް އޮޕްރޭޝަނެއްވެސް ކުރަން ޖެހޭ، އެ އޮޕްރޭޝަން ކުރުމަށްފަހު ޑޮކްޓަރުން ލަފާ ދެއްވަނީ ރަނގަޅު މާހައުލެއްގައި ހުންނެވުމަށް. އެކަށީގެންވާ މާހައުލެއް ނޫން ޖަލަކީ" އަފާފް ވިދާޅުވިއެވެ.

ނާޒިމްއަށް ވަކީލުންގެ ބައްދަލުވުން ނުދޭތާ ދެ މަސް ދުވަސްވެފައި ވާއިރު އެކަމާމެދު އެބޭފުޅާގެ ވަކީލުން ވަނީ ކަންބޮޑުވުން ފާޅުކުރައްވާފައެވެ.

ކާނަލް ނާޒިމް ދިރިއުޅުއްވި އެޕާޓްމަންޓަށް ފުލުހުން ވަދެފައި ވަނީ 2015 ވަނަ އަހަރުގެ ޖެނުއަރީ މަހުގެ 18 ވަނަ ދުވަހުގެ ރޭގެ ދަންވަރުގެ ވަގުތެއްގައެވެ. އޭރު އެމަނިކުފާނަކީ ދިވެހި ރާއްޖޭގެ ދިފާޢީ ވަޒީރެވެ. އަދި އެރޭ ފުލުހުން އެގެއަށް ވަން އިރު އެގޭތެރެއިން ފިސްތޯލައަކާއި ތިން ވަޒަން ފެނުނު ކަމަށް ބުނެ ކާނަލް ނާޒިމް ވަނީ 11 އަހަރަށް ޖަލަށްލާފައެވެ.