ކޮމަންވެލްތާއި ގުޅި، ޤަތަރު އަދި އީރާނާއި އަލުން ގުޅުން ގާއިމުކުރާނަން: އިބޫ
ޤަތަރާއި އީރާނާއި ކޮމަންވެލްތާއި އޮތް ގުޅުން ކަނޑާލުމުން ވަރަށް ގިނަ ގެއްލުންތަކެއް ކުރިމަތިވި
އެމްޑީޕީގެ އަހަރީ ދުވަހުގެ މުނާސްތަބުގައި ބޭއްވި ޖަލްސާގައި އިބޫ ވާހަކަ ދައްކަވަނީ
ރައީސް އަބްދުﷲ ޔާމީންގެ ސަރުކާރުން ވަކިވެފައިވާ ކޮމަންވެލްތާއި އެސަރުކާރުން ގުޅުން ކަނޑާލާފައިވާ މުސްލިމް ދެގައުމު ކަމަށްވާ ޤަތަރު އަދި އީރާނާއި އަލުން ގުޅުން ގާއިމު ކުރައްވާނެ ކަމަށް ގުޅިފައިވާ ސިޔާސީ ޕާޓީތަކުގެ ފަރާތުން ރިޔާސީ އިންތިހާބުގައި ވާދަކުރައްވާ އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) ވިދާޅުވެއްޖެއެވެ.
ރާއްޖެޓީވީއިން ގެނެސްދޭ "އިބޫ" ޕްރޮގްރާމަށް ދެއްވި އިންޓަވިއުގައި ވާހަކަ ދައްކަވަމުން އިބޫ ވިދާޅުވީ ޤަތަރާއި އީރާނާއި ކޮމަންވެލްތާއި އޮތް ގުޅުން ކަނޑާލުމުން ވަރަށް ގިނަ ގެއްލުންތަކެއް ކުރިމަތިވި ކަމަށެވެ. ވަކިން ހާއްސަކޮށް ކުޅިވަރާއި ތައުލީމީ ދާއިރާއިން ލިބުނު ފުރުސަތުތައް ގެއްލިގެން ދިޔުމުން ޒުވާނުންނަށާއި ކިޔަވާ ކުދިންނަށް ވަރަށް ބޮޑު ގެއްލުމެއް ލިބިގެންދިޔަ ކަމަށް އިބޫ ވިދާޅުވިއެވެ.
"އަނެއްކާ މިއިން ކޮންމެ ކަމަކާއި ދޭތެރޭ، ކޮންމެ ފަރާތަކާއި ގުޅުން ކަނޑާލިއިރު ސަރުކާރުން އޭގެ ކުރީ ދުވަހު ހަމަ ވަރަށް ޔަގީން ކަމާއެކު ބުނަމުން ގެންދިޔަ ސްޓޭޓްމަންޓްތައް ހަދަމުންގެންދިޔަ އެއްވެސް މައްސަލައެއް ނެތޭ، އޮންނާނެއޭ. ބުނެފަ ޖެހިގެން އަންނަ ދުވަހު ދިމާ އިދިކޮޅަށް ކަންތައް ކޮށްފައި މިއޮންނަނީ. އޭގެ ސަބަބުން ލިބުނު ގެއްލުންތައް ވަރަށް ބޮޑު. އިރާދުކުރެއްވިއްޔާ އަޅުގަނޑުމެންގެ ވެރިކަމުގައި ކޮމަންވެލްތާއި ވަރަށް އަވަހަށް ގުޅުން އުފައްދާނަން. ހަމަ ޤަތަރާއި އީރާނާއި ވެސް." ކޮންމެ ހުކުރު ދުވަހެއްގެ ރޭ ރާއްޖެޓީވީއިން ގެނެސްދޭ ޕްރޮގްރާމަށް ދެއްވި އިންޓަވިއުގައި އިބޫ ވިދާޅުވިއެވެ.
އިބޫ ވިދާޅުވީ ރައީސް ޔާމީންގެ ހާރިޖީ ސިޔާސަތު ބައްޓަން ކުރެވިފައި އޮތްގޮތުން މިހާރު އަނގައިން ބުނެލެވެން އޮތީ އެންމެ ދެ ގައުމާއި ކަމަށެވެ. މިއީ ރާއްޖެއަށް އެކަހެރިކޮށް އޮވެވޭނެ ޒަމާނެއް ނޫން ކަމަށާއި ގުޅުން ކަނޑާލާފައިވާ ގައުމުތަކާއި އަލުން ގުޅުން އުފައްދަން ޖެހޭ ކަމަށް އިބޫ ވިދާޅުވިއެވެ.
"ރައީސް ޔާމީންގެ ހާރިޖީ ސިޔާސީ ބައްޓަން ކުރެވިފައިވާ ގޮތުން އަޅުގަނޑުމެން ހަމަ ދުވަހަކަށް ވުރެ ދުވަހެއް މިދަނީ އެކަހެރިވަމުން. އެހެން ވަމުން ގޮސް މިހާރު ހަމައެކަނި އަނގައިން ބުނެލާ މިއުޅެނީ ދެ ގައުމެއް އެކަނި. ދުވަސްކޮޅެއް ވާއިރު އޮންނާނީ އެންމެ ގައުމެއް.... އަޅުގަނޑުމެންގެ ތަރައްގީއަށާއި ކުރިއެރުމަށް އެހީތެރިވާ ރަހުމަތްތެރި ރަށްޓެހި ގައުމުތަކާއެކު އޮންނަ ގުޅުން ހަރުދަނާކޮށް އަދި މިހާރު ގުޅުން ކަނޑާލާފައިހުރި ގައުމުތަކާއި އެކީގައި އެގުޅުން އަވަހަށް އުފައްދަން." އިބޫ ވިދާޅުވިއެވެ.
އިބޫ މިހެން ވިދާޅުވިއިރު ރާއްޖޭގެ ސަރުކާރު ކޮމަންވެލްތުން ވަކިވެފައިވަނީ 2016 ވަނަ އަހަރުގެ އޮކްޓޯބަރު މަހުގެ 13 ވަނަ ދުވަހުއެވެ. ކޮމަންވެލްތުން ރާއްޖެ ވަކިވީ ރާއްޖޭގެ ހާލަތު އިސްލާހު ނުވެއްޖެނަމަ ރާއްޖެ ސަސްޕެންޑް ކުރާނެ ކަމަށް އެ ޖަމިއްޔާއިން ބުނެފައިވަނިކޮށެވެ. ރާއްޖޭގެ ހާރިޖިއްޔާއިން ވަނީ ކޮމަންވެލްތުން ރާއްޖޭގެ ދާހިލީ ކަންކަމަށް ނުފޫޒު ފޯރުވަން މަސައްކަތްކުރާ ކަމަށް ތުހުމަތު ކުރައްވާފައެވެ.
ރާއްޖެއިން ޤަތަރާއި އަދި އީރާނާއި ގުޅުން ކަނޑާލާފައިވަނީ ސައުދީ އަރަބިއްޔާއިން އެގޮތަށް އަމަލު ކުރުމާއި ވިދިގެންނެވެ.
