އިދިކޮޅު ފަރާތްތަކުން ކުރިއަށް ގެންދާ ސިޔާސީ ހަރަކާތްތަކުގައި ފެނަކަ ކޯޕަރޭޝަންގެ މުވައްޒަފުން ބައިވެރި ނުވާ ކަމަށް އެކުންފުނިން ބުނެފިއެވެ.
ފެނަކަ ކޯޕަރޭޝަނުން ނެރެފައިވާ ބަޔާނެއްގައި ބުނެފައިވަނީ އެ ކުންފުނީގެ މުވައްޒަފުން އިދިކޮޅު ފަރާތްތަކުން ހިންގާ ސިޔާސީ ހަރަކާތްތަކުގައި ބައިވެރިވާކަމަށް ބުނެ ފަތުރަމުންދާ ވާހަކަތަކަކީ ހަގީގަތަކާއި ހިލާފު ދޮގު ވާހަކަތަކެއް ކަމަށެވެ.
މިއީ ފެނަކައިގެ މުވައްޒަފުންގެ އަގުވައްޓާލުންކަން ފާހަގަކުރައްވައި މިބަޔާނުގައި ބުނެފައިވަނީ ކުންފުނީގެ މުވައްޒަފުންނާއި ބެހޭ ގޮތުން މިފަދަ ދޮގު ވާހަކަތައް ފެތުރުމުގެ ސަބަބުން ސަރުކާރާއި ކުންފުންޏާއި ދެމެދު އޮތް ގުޅުމުގެ އިތުރުން ރައްޔިތުންގެ މެދުގައި ކުންފުނީގެ ތަސައްވުރަށް އަސަރުކޮށްފައިވާ ކަމަށެވެ.
މީގެ އިތުރުން ފެނަކައިން ބުނީ މިފަދަ ހަގީގަތާ ހިލާފު ވާހަކަތަކުގެ ސަބަބުން ނިކުމެދާނެ ނުރަނގަޅު ނަތީޖާތަކަށް ޒިންމާވާންޖެހޭ ފަރާތަކީ އެފަދަ ޚަބަރުތައް ގެނެސްދޭ ފަރާތްތައް ކަމަށެވެ. އަދި މިފަދަ ހަގީގަތާއި ހިލާފު ވާހަކަތައް ފެތުރުމަކީ ޒިންމާދާރުކަންކުޑަ އަމަލެއް ކަމަށެވެ.
ފެނަކައިން ބުނީ އެކުންފުނީގެ މުވައްޒަފުންނާއި ބެހޭ ގޮތުން މައުލޫމާތު ފެތުރުމުގައި ރައްޔިތުންނަށް އޮޅޭގޮތަށް ޚަބަރުތައް ގެނެސްދީފައިވާތީ އެކަން ހަރުކަށި އިބާރާތުން ކުށްވެރި ކުރާ ކަމަށާއި، އެފަދަ މައުލޫމާތު ނުފެތުރުމަށް ވެސް އެދޭ ކަމަށެވެ.
