ވޯޓުލާ ދުވަހަކީ ބަންދު ދުވަހެއްކަމަށް ކަނޑައަޅައިދިނުމަށް ހުށަހެޅި މައްސަލަ ބަލައިނުގަތް
ސުޕްރީމް ކޯޓުން ބުނީ އެއީ ދުސްތޫރީ މައްސަލައެއް ނޫންކަމަށް
ކުރީގެ ބަންޑާރަ ނައިބު ހުސްނުއްސުޢޫދު
މިއަހަރުގެ ރިޔާސީ އިންތިޚާބު އޮންނަ ދުވަސްކަމަށްވާ ސެޕްޓެމްބަރ 23 ވާ އާދިއްތަ ދުވަހަކީ ސަރުކާރު ބަންދު ދުވަހެއްކަމަށް ކަނޑައަޅައިދިނުމަށް އެދި ކުރީގެ ބަންޑާރަ ނައިބު ހުސްނުއްސުޢޫދު ސުޕްރީމް ކޯޓަށް ހުށަހެޅުއްވި މަައްސަލަ އެކޯޓުން ބަލައިނުގަނެ ބޭރުކޮށްލައިފިއެވެ.
ސުޢޫދު ސުޕްރީމް ކޯޓަށް އެމައްސަލަ ހުށަހެޅުއްވީ ރާއްޖޭގައި މީގެ ކުރިން އާއްމުކޮށް އިންތިޚާބުތަކުގައި ވޯޓުލަނީ ސަރުކާރު ބަންދު ދުވަހެއްގައި ކަމަށްވެފައި، މިއަހަރުގެ ރިޔާސީ އިންތިޚާބުގައި ވޯޓުލަނީ ސަރުކާރު ހުޅުވިފައި އޮންނަ ދުވަހެއްގައިކަމަށްވާތީ، ހުރިހާ އެންމެންނަށް ފަސޭހައިން ވޯޓު ލެވޭނީ އެދުވަހަކީ ބަންދު ދުވަހެއްކަމަށް ކަނޑައެޅުމުންކަމަށްވާތީއެވެ. އެހެންނަމަވެސް ސުޕްރީމް ކޯޓުން އެމައްސަލަ ބަލައިނުގަތީ އެމައްސަލައަކީ ސުޕްރީމް ކޯޓުގެ ޤަވާޢިދުގެ ދަށުން ބަލައިގަންނަން ޖެހޭފަދަ ދުސްތޫރީ މައްސަލައެއް ކަމަށް ނުފެންނާތީކަމަށެވެ.
ސެޕްޓެމްބަރު 23 ވަނަ ދުވަހަކީ ބަންދު ދުވަހެއްކަމަށް ރައީސް އޮފީހުން އަދިވެސް ނިންމާފައެއް ނުވެއެވެ. އެހެންނަމަވެސް އިލެކްޝަންސް ކޮމިޝަނުން އިންތިޚާބުގެ ތާރީޚު އިއުލާންކުރަމުން ބުނީ އެދުވަހަކީ ބަންދު ދުވަހެއްގެ ގޮތުގައި ސަރުކާރުން ހަމަޖައްސައިދެއްވާތޯ މަސައްކަތް ކުރާނެކަމަށެވެ. އިދިކޮޅު ފަރާތްތަކުން ވަނީ އިލެކްޝަންސް ކޮމިޝަނަށްވެސް އެކަމުގެ ކަންބޮޑުވުން ހުށަހަޅާފައެވެ.
އިދިކޮޅު ފަރާތްތަކުން ތުހުމަތުކުރާ ގޮތުގައި ސަރުކާރު ބަންދު ނޫން ދުވަހަކު އިންތިޚާބު ބާއްވަން ނިންމީ ވޯޓުލާ މީހުންގެ އަދަދު މަދުކުރުމަށެވެ.
