ދެމިލިއަން ރުފިޔާއިން ރާއްޖެ ޓީވީ ޖުރިމާނާކޮށްފި
9 އޯގަސްޓު 2018 | ބުރާސްފަތި 03:44ޖޫރިމަނާކުރީ ކުއްލި ނުރައްކަލުގެ ހާލަތު އިއުލާން ކޮށްފައިވަނިކޮށް އެއްވެއުޅުމަށް ހިތްވަރުދޭފަދަ ކޮންޓެއްންޓެއް ދެއްކިކަމަށް ބުނެ
އެންމެ ފަހުން ރާއްޖެ ޓީވީ ޖުރިމާނާކުރުމާ އެކު އެ ފައިސާ ދެއްކުމަށް ރާއްޖެ ޓީވީގެ ސްޓާފުން ބްރޯޑްކޮމް އަށް ފޮށިތައް ހިފައިގެން ދަނީ
ރާއްޖެ ޓީވީން ފޮނުވި ކޮންޓެންޓަކާއި ގުޅިގެން ކަމަށް ބުނެ އެ ސްޓޭޝަން ދެ މިލިއަން ރުފިޔާއިން ޖުރިމާނާ ކޮށްފިއެވެ.
ޖުރިމާނާ ކުރިކަން ރާއްޖެ ޓީވީއަށް އެންގުމުގެ ކުރިން އެހެން މީޑިޔާތަކަށް އެ ޚަބަރު ވަނީ އަރައިފައެވެ. ރާއްޖެ ޓީވީން 16 މާރޗް 2018 ވަނަ ދުވަހުގެރޭ 23:24 އިން 23:35 އަށް ބްރޯޑްކާސްޓްކުރި މުޒާހަރާގެ ލައިވް ކަވަރޭޖް ޕްރޮގްރާމްގައި ޤައުމުގެ އަމަންއަމާންކަން ނަގާލައި ރައީސުލްޖުމްހޫރިއްޔާ ޢަބްދުﷲ ޔާމިން ޢަބްދުލް ޤައްޔޫމްގެ އަބުރު ގެއްލޭފަދަ ކޮންޓެންޓް ބްރޯޑްކާސްޓް ކޮށްފައިވާކަމަށް ބެލެވޭ ކަމަށް ބުނެ އެ ކޮމިޝަނުން ބެލި މައްސަލައެއްގަ އެވެ.
މި ޖުރިމާނާ 30 ދުވަސް ތެރޭގައި ދެއްކުމަށް ވަނީ އަންގައިފަ އެވެ.
މިއީ ރާއްޖެ ޓީވީ ޖުރިމާނާކުރި 4 ވަނަ ފަހަރެވެ. މިދިޔަ އަހަރު ރާއްޖެ ޓީވީ 200،000 ރުފިޔާ، 500،000 ރުފިޔާ އަދި އެއް މިލިއަން ރުފިޔާއިން ވަނީ ޖުރިމާނާކޮށްފަ އެވެ. މިފަހަރުގެ ޖޫރިމަނާއާއެކު ޖުމްލަ މިހާތަނަށް 3.7 މިލިއަން ރުފިޔާއިން ރާއްޖޭގެ އެންމެ ގިނަ މީހުން ބަލާ ޓީވީ ޗެނަލް ވަނީ ޖުރިމާނާކޮށްފައެވެ.
ރާއްޖެ ޓީވީ ޖުރިމާނާ މިކުރީ އަވަސް އަރުވާލައިގެން ރާއްޖެ ޓީވީ ޖުރިމާނާކުރަން އުޅޭ ކަމަށް ޖުލައި މަހު ބުނެފައި ވަނިކޮށެވެ.
މި ފަހަރުގެ މައްސަލައިގައި ރާއްޖެ ޓީވީ ޖުރިމާނާކުރިއިރު، އަބުރު ގެއްލުނު ގޮތެއް އަދި ގައުމީ ސަލާމަތަށް ގެއްލުން ލިބުނު ގޮތެއް ސާފު ކޮށްދިނުމަށާއި މައްސަލަ ސާފުކޮށް ދިނުމަށް ތަކުރާރުކޮށް އެދުނު ނަމަވެސް ސާފުކޮށެއް ނުދެ އެވެ.
