ރިލްވާން ހޯދުމުގައި ސަރުކާރުން އިހުމާލް ވެފައިވާތީ އެކަމާއި އަޑު އުފުލަން މިއަދު ހިނގާލުމެއް
8 އޯގަސްޓު 2018 | ބުދަ 08:51ހިނގާލުން ފެށުމަށް ހަމަޖެހިފައިވަނީ ބުދަ ދުވަހުގެ ހަވީރު 4:00 ގައި
ނޫސްވެރިޔާ އަހުމަދު ރިލްވާން
ނޫސްވެރިޔާ އަހުމަދު ރިލްވާން އަބްދުﷲ ވަގަށް ނެގިތާ ހަތަރު އަހަރު ފުރުނު އިރުވެސް އޭނާ ހޯދުމުގައި ސަރުކާރުން އިހުމާލް ވެފައިވާތީ އެކަމާއި އަޑު އުފުލާ ހިނގާލުމެއް ބޭއްވުމަށް ނިންމައިފިއެވެ.
ރިލްވާންގެ އާއިލާއިންނާއި އޭނާގެ ރައްޓެހިން އިންތިޒާމް ކޮށްގެން ބާއްވާ މި ހިނގާލުން ފެށުމަށް ހަމަޖެހިފައިވަނީ ބުދަ ދުވަހުގެ ހަވީރު 4:00 ގައި ޗާންދަނީ މަގު މަޖީދީ މަގާއި ގުޅުނު ހަތަރު އަނގޮޅި ކަންމަތިންނެވެ.
ރަސްފަންނު ބީޗް ސަރަހައްދަށް ހިނގާލުން ނިންމާލުމަށްފަހު އެސަރަހައްދުގައި އެކިއެކި ފަރާތްތަކުން ޚިޔާލާއި ޝުޢޫރު ފާޅުކުރުން ކުރިއަށް ގެންދިއުމަށް ވަނީ ހަމަ ޖެހިފައެވެ.
މިނިވަން ނޫހުގެ ނޫސްވެރިޔާ ރިލްވާން އަށް ގިނަ އިންޒާރުތަކެއް ދިނުމަށްފަހު އޭނާ ވަގަށް ނަގާފައި ވަނީ 2014 ވަނަ އަހަރުގެ އޮގަސްޓް އަށް ވަނަ ދުވަހު އެވެ.
ރިލްވާން ވަގަށް ނެގިތާ ހަތަރު އަހަރު ވީއިރުވެސް ފުލުހުންނަށް އޭނާ ހޯދިފައި ނުވާއިރު ރިލްވާން ހޯދަން ވަޒީރުންގެ މަޖިލީހުގެ ފެންވަރުގައި ކުރަމުން ދިޔަ މަސައްކަތްތައް ހުއްޓުވާލީ ރައީސް އަބްދުﷲ ޔާމީން ކަމަށް ކުރީގެ ނާއިބު ރައީސް އަހުމަދު އަދީބު ވަނީ ވިދާޅުވެފއެވެ.
އެއަށް ރައްދު ދެއްވައި ދ. މަޑަވެލީގައި ވާހަކަ ދައްކަވަމުން ރައީސް ޔާމީން ވިދާޅުވީ ރިލްވާން މަރުވެފައިވާ ކަމަށް ޝައްކު ނުކުރައްވާ ކަމަށެވެ. ނަމަވެސް އެ އަތޮޅު ފަރެސްމާތޮޑާ އަށް ވަޑައިގެން ރައީސް ވަނީ އެ ވާހަކަތަކަށް މައާފަށް އެދިވަޑައިގެންފައެވެ. އަދި އިރާދަކުރެއްވިއްޔާ ރިލްވާން ފެންނާނެ ކަމަށް ރައީސް ވަނީ ވިދާޅުވެފައެވެ.
