ދައުލަތުގެ ބަޖެޓުން ހަތަރު މިލިއަނަށް ވުރެ ގިނަ ރުފިޔާ ހަރަދުކޮށްގެން ހއ އުލިގަމުގައި އިންޖީނުގެއެއް އިމާރާތްކޮށް ނިންމާފައިވާ ކަމަށް، ސަރުކާރުން ނެރުނު ރަށްވެހި ތަރައްގީގެ ފޮތުގައި ބުނެފައި އޮތަސް، އެ އިންޖީނުގޭގެ ފުރާޅުވެސް ނާޅާ ކަން އެނގިއްޖެ އެވެ.
މިސަރުކާރުން ހިންގާފައިވާ މަޝްރޫޢުތައް ހާމަކުރުމަށް ނެރެފައިވާ ރަށްވެހި ތަރައްޤީގެ ފޮތުގައި ބުނެފައިވާ ގޮތުގައި ހއ. އުލިގަމުގައި އިންޖީނުގެއެއް އެޅުމަށް ވަނީ 4.7 މިލިއަން ރުފިޔާ ހޭދަ ކޮށްފައެވެ. އެ އިންޖީނުގެ ނިމިފައިވާއިރު ރާއްޖެ އެމްވީއަށްވެސް ލިބިފައިވާ ފޮޓޯއަކުން ފެންނަ ގޮތުގައި އެއިންޖީނުގެ ހިޔާވެސް ނުކުރެއެވެ. ހަމައެކަނި ރާނާލި ގޮތަށް ނިންމާލާފައިވާ އެ އިންޖީނުގޭގެ ފާރުތަކުގައި ހުރީ ސިމެންތިވެސް ނުޖަހައެވެ.
އުލިގަމު ކައުންސިލްގެ މީޑިޔާ ކޯޑިނޭޓަރ މުހައްމަދު ރަޝީދު ވިދާޅުވީ ފޮޓޯއިން ފެންނަނީ ހަޤީގަތެއް ކަމަށާއި އިންޖީނުގޭގެ މަސައްކަތް ނިންމާފައިހުރި ހިސާބު ކަމަށެވެ.
ރަޝީދު ވިދާޅުވީ އެތަނުގެ މަސައްކަތް ހުއްޓާލާފައިވަނީ މިއަހަރުގެ ކުރީކޮޅު ކަމަށާއި އޭގެ ފަހުން އެތަނުގައި އެއްވެސް މަސައްކަތެއް ނުކުރާ ކަމަށެވެ.
އިންޖީނުގެ ނިންމުމަށް 4.7 މިލިއަން ރުފިޔާ ހޭދަކޮށްފައިވުމުގެ އިތުރުން އެފޮތުގައިވާ ގޮތުގައި އެރަށުގައި އިންޖީނުގެއެއް މަރާމާތު ކުރުމަށްވެސް 490،000 (ހަތަރު ލައްކަ ނުވަދިހަ ހާސް ރުފިޔާ) ވަނީ ހިމަނާފައެވެ.
މީގެ އިތުރުން އެރަށުގައި 744000 ރުފިޔާ (ހަތް ލައްކަ ސާޅީސް ހަތަރު ހާސް ރުފިޔާ) ޚަރަދުކޮށްގެން ޤާއިމް ކުރަމުންދާ ފުޓްސަލް ދަނޑެއްގެ މަސައްކަތްވެސް ވަނީ ހުއްޓިފައެވެ.
ދަނޑާ ބެހޭގޮތުން ރަޝީދު ވިދާޅުވީ އެދަނޑުގެ މަސައްކަތްވެސް މިއަހަރުގެ ކުރީކޮޅު ހުއްޓާލާފައިވާކަމަށާއި އޭގެފަހުން އެތަނުގެ އެއްވެސް މަސައްކަތެއްވެސް ކުރިއަށް ނުދާ ކަމަށެވެ.
ދަނޑުގެ ފޮޓޯއެއްވެސް ރާއްޖެ އެމްވީއަށް ލިބިފައިވާއިރު އެފޮޓޯއިން ފެންނަ ގޮތުގައި އެދަނޑަށް ގެންގޮސްފައިހުރި ބައެއް ތަކެތި ހަލާކުވެ އެތަނުގައި ވިނަފަޅާފައިވާކަން ހާމަވެއެވެ.
