ބޯޓް އޮޕަރޭޓަރސް ޓްރެއިނިންގ ޕްރޮގްރާމް އެލިއާ އިން ފަށައިފި

އެލިއާ އިންވެސްޓްމަންޓްސް އާއި މޯލްޑިވްސް އިންސްޓިއުޓް އޮފް ޓެކްނޮލޮޖީ (އެމްއައިޓީ) ގުޅިގެން ބޯޓް އޮޕަރޭޓަރސް ޓްރެއިނިންގ ޕްރޮގްރާމެއް ފަށައިފިއެވެ.

މި ޓްރެއިންގް ޕްރޮގްރާމަކީ ލޯންޗްތަކުގެ ކެޕްޓަނުންނާއި ފަޅުވެރިންނަށް އަމާޒުކޮށްގެން ބާއްވާ ޓްރެއިނިންގް ސެޝަންތަކެކެވެ.

މި ޕްރޮގްރާމްގައި ބައިވެރިންނަށް ފަސްޓް އެއިޑް، ފަޔަރ ފައިޓިންގެ އިތުރުން އައުޓްބޯރޑް އިންޖީނާއި ބެހޭ މައުލުމާތާއި، ކަނޑުމަތީ ދިމާވެދާނެ ނުރައްކާތަކާއި ދިމާވާ ކުއްލި ހާލަތްތަކުގައި އަޅަންޖެހޭ ސަލާމަތީ ފިޔަވަޅުތަކަކީ ކޮބައިކަން ކިޔާދެވޭނެއެވެ.

ތިން ދުވަހުގެ މުއްދަތަށް ކުރިއަށްދާ މި ޓްރެއިނިންގް ޕްރޮގްރާމް ފައްޓައިދެއްވީ އެމްއެންޑީއެފް ކޯސްޓްގާޑުގެ ކޮމާންޑަރ ބްރިގޭޑިއަރ ޖެނެރަލް އަލީ ޒުހެއިރުއެވެ.

މި ޓްރެއިނިންގް ޕްރޮގްރާމް ހުޅުވުމުގެ ރަސްމިއްޔާތުގައި އެލިއާގެ ޖެނެރަލް މެނޭޖަރ އަހްމަދު ސައީދު ވިދާޅުވި ގޮތުގައި އެލިއާ އިން ދަނީ ޔަމަހާގެ ފަހުގެ އުފެއްދުންތައް ރާއްޖެއަށް ގެންނަމުން ކަމަށާއި އަދި މިއަހަރުގެ ތެރޭގައި ދިރާސާތަކެއް ވެސް ކުރިޔަށް ގެންދާނެ ކަމަށެވެ.

މި ރަސްމިއްޔާތުގައި އެލިއާގެ މެނޭޖިންގ ޑިރެކްޓަރ އަލާއު އަލީ ވަނީ ރާއްޖޭގެ ތިމާވެށި ރައްކާތެރިކޮށް ސާފު ވެއްޓެއް ގޮތުގައި ބޭއެވުމަށް ހުރިހާ ބައިވެރީންނަށް އިލްތިމާސް ކޮށްފައެވެ.

މި ޓްރެއިނިންގް ސެޝަންތަކުގައި ބައިވެރިވުމަށްޓަކައި ޔަމަހާގެ އޯވަރސީސް މާރކެޓް ޑިވެލޮޕްމަންޓް އޮޕަރޭޝަންސް ގްރޫޕް މެނޭޖަރ އޮޓްސޫކީ ކެންޖީ ރާއްޖެއަށް ވަޑައިގެންފައިވާ ކަމަށް އެލިއާ އިން ބުންޏެވެ.

މި ޓްރެއިނިންގް ސެޝަންގައި އެކި އެކި ރިސޯޓްތަކުންނާއި ކަނޑު އުޅަނދު ފަހަރު ގެންގުޅޭ އެކި އެކި ކުންފުނި އަދި ސަރުކާރުގެ ބައެއް އިދާރާތައް ބައިވެރިވިއެވެ. މިއީ އެލިއާ އިން ޓްރެއިންގް ޕްރޮގްރާމް ބާއްވާ ފަސް ވަނަ އަހަރެވެ.

އެލިއާ އިން ޔަމަހާ އައުޓްބޯޑް އިންޖީނު ރާއްޖޭގައި ވިއްކާތާ ވަނީ 44 އަހަރުވެފައެވެ.