ގުޅިފައިފައިވާ ޕާޓީތަކުގެ ވެރިކަމެއްގައި އަތޮޅުތަކުންނާއި ރަށްތަކުން ދައުލަތަށް ދައްކާ ޓެކުސްއިން، އެ ރަށެއް ތަރައްގީ ކުރުމުގެ ފުރުސަތު ދޭނީ އަތޮޅު ކައުންްސިލްތަކަށާއި ރަށު ކައުންސިލްތަކަށް ކަމަށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓުގެ ކެމްޕެއިން އެޖެންޓް، ހިސާން ހުސައިން ވިދާޅުވެއްޖެއެވެ.
ގުޅިފައިވާ ޕާޓީތަކުގެ ރިޔާސީ ކެންޑިޑޭޓުގެ ރަނިންމޭޓް ފައިސަލް ނަސީމް ވ. އަތޮޅަށް ކުރައްވާ ދަތުރުފުޅުގައި އެ އަތޮޅު ތިނަދުއަށް ވަޑައިގެން ބޭއްވި ޖަލްސާގައި ވާހަކަފުޅު ދައްކަވަމުން ހިސާން ވިދާޅުވީ އެބޭފުޅުންގެ ވެރިކަމެއްގައި ރަށްތަކުގެ ރައްޔިތުން ދައުލަތަށް ދައްކާ ޓެކްސް އިން، އެ ރަށެއްގެ ތަރައްގީކޮށް، ލާމަރުކަޒީ ނިޒާމުގެ ސިޔާސަތު ކުރިއަރުވާނެ ކަމަށެވެ.
މަޝްހޫރު ގާނޫނީ ވަކީލު ހިސާން ވިދާޅުވި ގޮތުގައި ޓޫރިޒަމް ފުޅާވެފައިވާ އަތޮޅުތަކުން ދައްކާ ޓެކްސްގެ ފައިސާ މައި ސަރުކާރުން ބޭނުންވާ ޕްރޮޖެކްޓުތަކަށް ހަރަދު ކުރުމުގެ ބަދަލުގައި ވަކި މިންވަރެއް ކަނޑައެޅިގެން، އެ ރަށަކުން ދައްކާ ޓެކްސް އެ ރަށަކަށް ހާއްސަ ކުރަންޖެހެއެވެ. އަދި އެ ޓެކްސްގެ ފައިސާއިން ރަށް ތަރައްގީ ކުރުމުގެ ފުރުސަތު ގުޅިފައިވާ ޕާޓީތަކުގެ ވެރިކަމެއްގައި ޖަޒީރާ ރާއްޖެއެއްގައި ކައުންސިލްތަކަށް ލިބިގެންދާނެ ކަމަށް ހިސާން ވިދާޅުވިއެވެ.
"ދައުލަތުގެ މައި ބަޖެޓަށް އަތޮޅުތަކުން ރަށްތަކުން މީހުން ދައްކާ ޓެކްސް ހުރިހާ ފައިސާއެއް ގޮސް، މައި ސަރުކާރުން ބޭނުންވާ ޕްރޮޖެކްޓަށް އެކަނި ހިންގުމުގެ ބަދަލުގައި ވަކި މިންވަރެއް ކަނޑައެޅިގެން، ރަށް ރަށަށް އެ ރަށަކުން ޓެކްސްގެ ގޮތުގައި، ހާއްސަކޮށް މި ޓުއަރިޒަމްގެ މި ވިޔަފާރީގެ ތެރެއިން މި ދައްކާ ޓެކްސްގެ ފައިސާއިން ވަކި އިންސައްތައެއް ކަނޑައެޅިގެން ރަށްތަކަށް އަބުރާ އައިސް އެ ފައިސާ ރަށުގެ ނަރުދަމާއަށް، ރަށުގެ ފެނުގެ ނިޒާމަށް، ރަށުގެ މަގުތައް ހަދަން، ސްކޫލް ތަރައްގީ ކުރަން، ސިއްހީ މަރުކަޒު ހަދަން، ޖެޓީ ހަދަން، ބަނދަރު ހަދަން، ބޭނުން ކުރެވޭނެ އިންތިޒާމު އަޅުގަނޑުމެން ހަމަޖައްސަން. އަޅުގަނޑުމެންގެ ވިސްނުމަކީ ޖަޒީރާ ރާއްޖޭގެ ވިސްނުމަކީ މި ދެންނެވިހެން، ރަށްރަށުގެ މީހުން ނުކުމެ، ރަށު ކައުންސިލްތަކުން ރަށްތައް ތަރައްގީ ކުރުން," ހިސާން ވިދާޅުވިއެވެ.
އެމްޑީޕީގެ މެނިފެސްޓޯގައި ކަނޑައަޅާފައި ވަނީ ރަށު ކައުންސިލްގެ އިހުތިސާސްގައިވާ ބިމާއި ކަނޑުފަޅާއި ފަރުފަދަ އެންމެހައި ތަންތަން، ރަށުގެ ބައެއްގެ ގޮތުގައި ހަމަޖައްސައި، އެތަންތަން ބޭނުން ކުރުމުގެ އުސޫލު ކަނޑައަޅައި، ތަރައްގީކޮށް، ހިންގުމުގެ މިނިވަންކަން ކައުންސިލްތަކަށް ދިނުމަށެވެ.
ވ. ތިނަދޫއަށް ފައިސަލް ނަސީމު ކުރެއްވި ދަތުރުފުޅުގައި، އެ ރަށުގައި ބޭއްވި ޖަލްސާގައި ވާހަކަފުޅު ދައްކަވަމުން، ކެޔޮދޫ ދާއިރާގެ މެމްބަރު މޫސާ ނިޒާރު ވިދާޅުވީ ވ. އަތޮޅުގެ ރައްޔިތުންނަށް ހައްގުވާ މިންވަރު ދިނުމަށް އަބަދުވެސް ސަރުކާރުގައި "އާދޭސް" ކުރާ ކަމަށެވެ. ކުދި އާބާދީތަކުގެ ރައްޔިތުން ނިކަމެތި ކުރާ ކަމަށް ވިދާޅުވެ، މޫސާ ނިޒާރު ވިދާޅުވީ އަމިއްލަ ގައުމުގައި ދިވެހި ރައްޔިތުން ރެފިއުޖީންގެ ގޮތުގައި ދިރިއުޅެން މަޖުބޫރުކޮށްފައިވާ ކަމަށެވެ.
ވ. ރަކީދޫ ދާއި ކެޔޮދޫ ހިމެނޭ ދާއިރާގެ މަޖިލިސް މެމްބަރުކަން ކުރައްވާ މެމްބަރު ވިދާޅުވީ ބޮޑެތި އާބާދީތަކުން އަހަރެއްގެ ތެރޭގައި ދައުލަތަށް ދައްކާ ޓެކްސްއަށް ވުރެ، މާ ގިނަ ފައިސާ ގެސްޓުހައުސް ވިޔަފާރި ކުރިއަރާފައިވާ ވ. އަތޮޅުން ދައްކަމުންދާ ކަމަށެވެ.
"ވ. އަތޮޅު ރައްޔިތުންނަށް ވެސް ހައްގުވާ މިންވަރު، އަޅުގަނޑުމެން އަބަދުވެސް އާދޭސް ކުރަން ސަރުކާރުތަކުގައި އަޅުގަނޑުމެންނަށް ވެސް ލިބޭނެ ގޮތް ހައްދަވައި ދިނުމަށް. ކިތަންމެ މީސްކޮޅު މަދަސް، އާބާދީ ކުޑަޔަސް، ރަށްތައް ކުއްޖަސް، ދިވެހި ރައްޔިތުން ވާނީ ދިވެހި ރައްޔިތުންނަށް. ދިވެހި ރައްޔިތެއްގެ ގޮތުން، ލިބެންޖެހޭ އަސާސީ ހިދުމަތަކުން، އެ މީހުން މަހުރޫމް ކުރާކަމުގައިވާނަމަ، އޭގެ ޒިންމާ ރައްޔިތުން އުފުލާކަށް ނުޖެހޭނެ... އަޅުގަނޑު މިގޮތަށް ނިކަމެތި ކުރާ، ކުރުމަށް ދޭ ނަމަކީ، އެ މީހުންގެ ގައުމުގައި، އަމިއްލަ ގައުމުގައި ރެފިއުޖީންގެ ގޮތުގައި ދިރިއުޅެން މަޖުބޫރު ކުރުން،" ޖުމްހޫރީ ޕާޓީގެ ޕާލަމެންޓްރީ ގްރޫޕުގެ މެމްބަރުކަން ވެސް ކުރައްވާ މުސާ ނިޒާރު ވިދާޅުވިއެވެ.
