ގައުމުގެ އަމާންކަން ނަގާލަން ބަޔަކު އުޅޭތީ ސިފައިންނާއި ފުލުހުން ތައްޔާރީ ހާލަތަކަށް!
4 އޯގަސްޓު 2018 | ހޮނިހިރު 17:18ގައުމު ހަލަބޮލިކުރުމަށް މަސައްކަތް ކުރަމުން ގެންދާކަމުގެ މައުލޫމާތު ލިބިފައިވާ ކަމަށް މިނިސްޓަރު ވަނީ ވިދާޅުވެފައި
ސިފައިން 1 ފެބުރުއަރީގައި މަގުތަކުގައި ހަރަކާތްތެރި ވަނީ
ގައުމުގެ އަމާންކަން ނަގާލަން ބަޔަކު އުޅޭތީ ސިފައިން ތައްޔާރީ ހާލަތުގައި ތިބި ކަމަށް ޑިފެންސް މިނިސްޓަރު އާދަމް ޝަރީފް އުމަރުގެ ނަމުގައި ހިންގާ ފޭސްބުކް ޕޭޖްއަކުން ބުނެފިއެވެ.
ފޭސްބުކް ޕޭޖްގައި ބުނެފައި ވަނީ ކުރިއަށް އޮތް ދުވަސްތަކުގައި ގައުމުގެ އަމަން އަމާންކަން ނަގާލައި ގައުމު ހަލަބޮލިކުރުމަށް މަސައްކަތް ކުރަމުންގެންދާކަމުގެ މައުލޫމާތު ލިބިފައިވާ ކަމަށެވެ.
މިކަމާ ބެހޭ ގޮތުން ފުލުހުންގެ މީޑިއާ އޮފިޝަލް އަހްމަދު ޝިފާން ވިދާޅުވީ އެކަމާ ބެހޭ ގޮތުން މި ވަގުތު އެއްޗެއް ހާމަކުރެވެން ނެތް ކަމަށެވެ. އެކަމާ ގުޅިގެން އެއްވެސް އޮޕަރޭޝަނެއް ހިންގައިތޯ ތަކުރާރުކޮށް ރާއްޖެއެމްވީ އިން ސުވާލުކުރުމުން ވެސް ޝިފާން ވިދާޅުވީ އެއްވެސް އެއްޗެއް ދެންނެވެން ނެތް ކަމަށެވެ. ނަމަވެސް އެކަން ދޮގުކުރައްވާފައެއް ވެސް ނުވެއެވެ.
މިނިސްޓަރު އާދަމް ޝަރީފް އުމަރުގެ ނަމުގައި ހިންގާ ފޭސްބުކް ޕޭޖެއްގައި ލިއުއްވާފައިވާގޮތުގައި ގައުމީ ސަލާމަތަށް ނުރައްކަލެއް ވެދާނެ އެއްވެސް ކަމެއްގެ މައުލޫމާތު ލިބިއްޖެނަމަ ވަގުތުން އެމްއެންޑީއެފްއަށާއި ޕޮލިސް ސާވިސްއަށް ރިޕޯޓް ކުރެއްވުން އެދޭކަމަށެވެ.
އަދި ދިވެހި ގައުމުގެ މިނިވަންކަމާއި ސިޔާދަތާއި މާތްވެގެންވާ އިސްލާމް ދީނާއި ގާނޫނު އަސާސީ ރައްކާތެރިކުރުމާއެކު ރައްޔިތުންގެ މުދަލާއި ފުރާނަ ސަލާމަތް ކުރުމާއި ސިފައިންގެ ގާނޫނުގައިވާ މަގުސަދުތަކާއި ވާޖިބުތަައް އަދާކުރާނެ ކަމުގެ ފުރިހަމަ ޔަގީންކަން ދިވެހި ރައްޔިތުންނަށް އަރުވާ ކަމަށް މި ޕޭޖްގައި ލިއުއްވާފައިވާ ޕޯސްޓްގައިވެއެވެ. މިފަދަ މުހިއްމު މައުލޫމާތެއް އެމަނިކުފާނުގެ ނަމުގައި ހިންގަމުންދާ ފޭސްބުކް ޕޭޖެއްގައި ލިއުއްވާފައިވާތީ، ގިނަ ބަޔަކު އެކަމާއި މެދު ދަނީ ފާޑުކިޔަމުންނެވެ.
ޑިފެންސް މިނިސްޓަރު އާދަމް ޝަރީފްގެ ނަމުގައި ހިންގާ ޕޭޖް
