މިއަހަރުގެ ރިޔާސީ އިންތިޚާބު ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) ކާމިޔާބު ކުރައްވާނީ އެއްލައްކަ ފަސްދޮޅަސް ހާހަށް ވުރެ ގިނަ ވޯޓާއެކު ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ޖުމްހޫރީ ޕާޓީގެ 10 ވަނަ އަހަރީ ދުވަހުގެ މުނާސަބަތުގައި ބޭއްވި ޖަލްސާގައި ސްކައިޕް މެދުވެރިކޮށް ވާހަކަފުޅު ދައްކަވަމުން ރައީސް ނަޝީދު ވިދާޅުވީ ގުޅިފައިވާ ސިޔާސީ ޕާޓީތަކުން އިންތިޚާބު ކާމިޔާބުކުރާނީ ބޮޑު އަގުލަބިއްޔަތުން ކަމަށާއި، އެއީ އެކަމުގައި ޝައްކެއް އޮތް ކަމެއް ނޫން ކަމަށެވެ. ރައީސް ނަޝީދު ވިދާޅުވީ މިއަހަރުގެ ރިޔާސީ އިންތިޚާބުގައި ރައީސް ޔާމިނަށް ފަސްހާސް ވޯޓު ވެސް ނުލިބޭނެ ކަމަށެވެ.
ރައީސް ނަޝީދު ވިދާޅުވީ ގައުމު ބިނާ ކުރުމަށް މިއަދު ކުރަން ޖެހޭ އެންމެ މުހިންމު މަސައްކަތަކީ ސިޔާސީ ހަރަކާތްތައް ހިންގުން ކަމަށާއި، މިއަދު ގުޅިފައިވާ ސިޔާސީ ޕާޓީތަކުން އެކުވެ މަސައްކަތް ކުރަނީ އިބޫއަށް އިންތިޚާބު ކާމިޔާބު ކޮށްދިނުމަށް ކުރާ މަސައްކަތްތައް ކަމަށެވެ.
"ރޭޑިއޯއިން ގޮވާނެ ޓީވީން ފެންނާނެ ޅ. ހިންނަވަރު އިބްރާހިމް މުހައްމަދު ސޯލިހު ފުރަތަމަ ބުރުން ކާމިޔާބު ކުރައްވާނެ. ވޯޓުން އެއްލައްކަ ފަސްދޮޅަސް ހާހަށްވުރެ އަދަދު ގިނަ ވާނެ. އަބްދުﷲ ޔާމިނަށް ފަސްހާސް ވޯޓު ވެސް ރާއްޖޭގެ ރައްޔިތުން ދޭން ނެތް ކަމީ ޔަގީން ކަމެއް. މިއިންތިޚާބު އަޅުގަނޑުމެން ކާމިޔާބު ކުރާނީ ބޮޑު އަޣުލަބިއްޔަތަކުން" ރައީސް ނަޝީދު ވިދާޅުވިއެވެ.
ރައީސް ނަޝީދު ތުހުމަތު ކުރައްވަމުން ވިދާޅުވީ ސަރުކާރުގެ ވެރިން ދައުލަތުގެ ހަޒާނާއިން ވައްކަން ކޮށްފައިވާ މިންވަރު ރައްޔިތުންނަށް އެނގޭ ކަމަށާއި، ވައްކަން ކުރެއްވުމަށް ގާނޫނާއި ގަވާއިދުތައް ބަދަލުކޮށްފައިވާ ކަމަށެވެ.
"އެމްއެމްޕީއާރުސީގެ ފައިސާއެކަންޏެއް ނޫން. ބޭރުގެ އެކި ފަރާތްތަކާއި ގުޅިވަޑައިގެން ކަޅު ފައިސާ ދިވެހިރާއްޖޭގެ މާލީ އިދާރާ ބޭނުންކޮށްގެން މަތިންދާބޯޓުގައި ކޮންޓެއިނަރަކަށް ލައްވައިގެން ޑޮލަރު ގެނެސް ބަނޑޭރި ގޭގައި ބައްހައްޓާ އެތަން މިތަނަށް ޑޮލަރު އުފުލާ އެބައްސަވާ ހައްދަވަނީ. ރާއްޖޭގެ އެންމެހާ ވައްކަން ކުރައްވަމުން ކުރައްވަމުން އައިސް ރޯދައަށް ދިން ކަނދުރުން ވެސް ކުރެއްވީ ވައްކަން. ރާއްޖޭގެ ރައްޔިތުން ނުތިބޭނެ ވައްކަމަށް އާ ބަސް ކިޔާކަށް. ވެރިކަމުން ބާލާނެ" ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ މުޅި ދައުލަތް ގަޑުބަޑު ކޮށްލާފައިވާ ކަމަށާއި، މިގައުމުން އަދުލްއިންސާފު ނައްތާލާފައިވާ ކަމަށެވެ. އަދި ގާނޫނު އަސާސީ ބާރުކަނޑުވާލާ، ލާމަރުކަޒީ ނިޒާމު ރޫޅާލައިފައިވާ ކަމަށް އެމަނިކުފާނު ވިދާޅުވިއެވެ.
އަނިޔާވެރިކަން އިންތިހާއަށް އިސްކޮށްފައިވާކަން ފާހަގަކުރައްވައި ރައީސް ނަޝީދު ވިދާޅުވީ ރައްޔިތުންގެ އިތުރަށް އާއިލާ ބޭފުޅުންނަށް ވެސް ރައީސް ކުރައްވަނީ ނުހައްގުން އަނިޔާ ކަމަށެވެ.
މިހުރިހާ ކަމެއް ނިންމާ ހަމައިސްކޮޅަށް ތެދުވުމަށް މިއަހަރުގެ ރިޔާސީ އިންތިޚާބުގައި ރައީސް ޔާމިން ބޮޑުތަނުން ބަލިކުރުމަށް ރައްޔިތުން ނުކުތުމަށް ރައީސް ނަޝީދު ގޮވާލެއްވިއެވެ.
