ޤައުމަށް ހަމަހަމަކަން ގެނެސްދީ، ފަސާދައާއި ކޮރަޕްޝަން ނައްތާލެެވޭނީ އިދިކޮޅު ކެންޑިޑޭޓަށް: ޑރ. ޖަމީލް

އުފާވެރި ރާއްޖެއެއް ހޯދުން އޮތީ ރައްޔިތުންގެ އަތްމަތީގައިކަމަށާއި، ގުޅިފައިވާ ޕާޓީތަކުގެ ކެންޑިޑޭޓްގެ ވެރިކަމެއްގައި ރާއްޖޭގެ ރައްޔިތުންނަށް ހަމަހަމަކަމާއި، މުއްސަދިކަން ގެނެސް، ކޮރަޕްޝަނާއި ފަސާދަ ނައްތާލައްވާނެކަމަށް ކުރީގެ ނައިބް ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެ އެވެ.

ޖުމްހޫރީ ޕާޓީގެ 10 ވަނަ އަހަރީ ދުވަސް ފާހަގަކުރުމަށް ބޭއްވި ޖަލްސާގައި ވާހަކަދައްކަވަމުން ޑރ. ޖަމީލް ވިދާޅުވީ ރާއްޖެއަށާއި، ރާއްޖޭގެ ރައްޔިތުންނަށް ހާއްސަ ހާލަތެއް ކުރިމަތިވެފައިވާކަމަށެވެ. އަދި މި ހާލަތުގައި ރާއްޖޭގެ ބިންތައް ވިއްކުމަކީ ވަރިހަމަކަށް ހަދައިގެން ނުވާނެ ކަމަށާއި، އަދުލު އިންސާފުގެ ނިޒާމް ވީރާނާވިޔަސް ވަރިހަމަކޮށްގެން ނުވާނެ ކަމަށްވެސް ޑރ. ޖަމީލް ވިދާޅުވި އެވެ.

އޭގެއިތުރުން ޖަމީލް ވިދާޅުވީ ސިޔާސީ މަސައްކަތްކުރުމާއި، ސިޔާސީ ވާހަކަދެއްކުމަކީވެސް ކުށެއްކަމަށް ގަބޫލުކޮށްގެން ނުވާނެ ކަމަށެވެ. އަދި އެއްވެ އުޅުމަކީ ކުށެއް ކަމަށްވެސް ގަބޫލުކޮށްގެން ނުވާނެކަމަށާއި، ﷲ ނަހީކުރައްވާފައިވާ ރިޝްވަތު ދިނުމާއި ރިޝްވަތު ހިފުމަކީ އެއީ މުންކަރާތެއް ނޫންްކަމަށްވެސް ގަބޫލުކޮށްގެން ނުވާނެކަމަށް ޖަމީލް ވިދާޅުވި އެވެ.

"ފަސާދައާއި ކޮރަޕްޝަނަކީ ހަލާލް ގޮތްކަމަށް އަޅުގަނޑުމެން ގަބޫލުކޮށްގެން ނުވާނެ. އަޅުގަނޑު ދެކޭގޮތުގައި މިއަދު ރާއްޖޭގެ ރައްޔިތުން ގަބޫލުކޮށްގެން ނުވާނެ ރާއްޖޭގެ އިޖުތިމާއީ ރައްކާތެރިކަމާއި، ރާއްޖޭގެ ތައުލީމާއި، ރާއްޖޭގެ ރައްޔިތުންނަށް ލިބެންޖެހޭ ސިއްހީ ނިޒާމާއި، ރާއްޖޭގެ ރައްޔިތުންގެ ބޯހިޔާވެހިކަމާއި، ގެދޮރުވެރިކަމަކީ ހަމައެކަނި ވަކި ބަޔަކަށް ވަކި ތަނަކަށް ވަހުދުވެފައި އޮންނަ އެއްޗެއްކަމަކަށް އަޅުގަނޑުމެން ގަބޫލުކޮށްގެން ނުވާނެ"

ޖަމީލް ވިދާޅުވީ އިދިކޮޅު ފަރާތްތަކުގެ އަޒުމަކަށްވާންވާނީ އަދުލު އިންސާފުގެ ނިޒާމަކީ އެންމެންނަށް ހަމަހަމަކާއެކު ލިބޭ އެއްޗަކަށް ހެދުންކަމަށެވެ. އަދި ވަކި މީހަކަށްވީތީ، ވަކި ސިޔާސީ ފިކުރަކަށް ނިސްބަތްވާތީ އިންސާފު ނުލިބި، އަނިޔާ ލިބި، ބޮޑެތި ހުކުމްތައް އިއްވައި، ޖަލު ގޮޅީގައި ދުވަސްތައް ތަހަމަލްކުރުމަކީ ކަންބޮޑުވެވަޑައިގަންނަވާކަމެއް ކަމަށް ޖަމީލް ވިދާޅުވި އެވެ.

ޖަމީލް ވިދާޅުވިގޮތުގައި ރައްޔިތުންގެ މަޖިލީހަކީ ހުރިހާ ރައްޔިތުންގެ ހައްޤުތައް ހިމާޔަތްކޮށް، ރައްކާތެރިކޮށްދޭން އޮތް ތަންކަމަށެވެ. އަދި އެ ތަނަކީ ހަމަހަމަކޮށް މުއާމަލާތްކުރެވޭ ތަނަކަށްވާންޖެހޭ ކަމަށާއި، ވަކި މީހަކަށްވީތީ، ވަކި ސިޔާސީ ފިކުރަކަށް ނިސްބަތްވާތީ އެ މީހެއްގެ މަސައްކަތަށް ހުރަސްއެޅިގެން ނުވާނެކަމަށް ޖަމީލް ވިދާޅުވި އެވެ.

"ރާއްޖޭގެ ރައްޔިތުން ބޭނުންވޭ އިންސާފުގެ ކުރިމައްޗަށް ދިޔައީމައި، ވަކި މީހަކަށް ބެލުމެއް ނެތި ހަމަހަމަކަމާއެކު އިންސާފު ލިބޭތަނަކަށްވާން. ސިފައިންނާއި ފުލުހުންގެ ގެޔަކީ ކޮންމެ މީހެއްގެ ހައްޤުތަކަށް ހަމަހަމަކަމާއެކީ އިހުތިރާމްކުރާ ތަނަކަށްވާން، ރާއްޖޭގެ ރައްޔިތުން އެދޭ. އެއީ އަޅުގަނޑުމެންގެ ދީން ގޮވާލާގޮތް."