ށ އަތޮޅު މިލަންދޫ ސްކޫލުން އެސްކޫލުގެ ދަރިވަރުންނަށް ހަވާލުކުރި ޓެބްލެޓްތައް އަނބުރާ ސްކޫލަށް ހަވާލުކުރަން އަންގައިފިއެވެ.
ރާއްޖެ އެމްވީން އެއީ ތެދެއްތޯ ސުވާލުކުރުމުން މިލަންދޫން ސްކޫލުން ބުނީ އެކަމާ ގުޅޭގޮތުން ޖަވާބެއް ދެއްވޭނީ ލިޔުމަކުން ހުށަހެޅުމުން ކަމަށެވެ.
ނަމަވެސް އެސްކޫލުގެ ބެލެނިވެރިންގެ ތެރެއިން ބަޔަކު ވަނީ ޓެބްލެޓްތައް ސްކޫލަށް އަނބުރާ ހަވާލު ކުރުމަށް އަންގާފައިވާކަން ކަށަވަރުކޮށް ދީފައެވެ. އަދި މިލަންދޫ ކައުންސިލްގެ ނާއިބު ރައީސް އަހުމަދު ސިޔާމް ވެސް ވަނީ ޓެބްލެޓްތައް ސްކޫލަށް ހަވާލުކުރަން އަންގާފައިވާކަން ކަށަވަރުކޮށް ދެއްވާފައެވެ.
މީގެ އިތުރުން ޓެބްލެޓްތައް ހަވާލު ކުރުމަށް ދަރިވަރުންގެ ބެލެނިވެރިންނަށް ސްކޫލުން ފޮނުވި ކަމަށް ބުނާ މެސެޖް ވެސް އެސްކޫލުގެ ބެލެނިވެރިއަކު ވަނީ ރާއްޖެ އެމްވީއާ ހިއްސާ ކޮށްފައެވެ.
މިލަންދޫ ސްކޫލުގެ ނަމުގައި ބެލެނިވެރިންގެ ސަމާލު ކަމަށް ފޮނުވާފައިވާ އެމެސެޖްގައި ބުނެފައިވަނީ މާދަމާ (ބުރާސްފަތި ދުވަހު)ހުރިހާ ދަރިވަރުންގެ ޓެބްލެޓް ކްލާސް ޓީޗަރާއި ހަވާލު ކުރުމަށް ދަންނަވާ ކަމަށެވެ. އަދި ޓެބްލެޓް ގެންނައިރު (ހަވާލުކުރާއިރު) ފޮށްޓަށް ލައިގެން ހުރިހާ އެއްޗެއް ހަމަކޮށްގެން ގެނައުމަށް ހަނދާން ކޮށްދޭ ކަމަށް ވެސް ބުނެފައިވެއެވެ.
ސިޔާމް ވިދާޅުވީ ދަރިވަރުންނަށް މިދިޔަ ޖުލައިމަހުގެ 1 ވަނަ ދުވަހު ހަވާލުކުރި ޓެބްލެޓްތައް އަނބުރާ ސްކޫލަށް ހަވާލުކުރަން އަންގައިގެން ބުރާސްފަތި ދުވަހު އެޓެބްލެޓްތައް ސްކޫލާ ހަވާލުކުރަމުން ގެންދާކަމަށެވެ.
ސިޔާމް ވިދާޅުވީ ޓެބްލެޓްތައް ހަވާލުކުރަން އެންގީ ކޮން ސަބަބަކާ ހުރެކަމެއް ނޭނގޭ ކަމަށާއި ބެލެނިވެރިންނަށް ވެސް އެކަން ސާފު ނުވާ ކަމަށެވެ.
މިއަހަރުގެ ދެވަނަ ޓާރމްގެ ކިޔެވުން ފެށެންވާއިރަށް ރާއްޖޭގެ ސްކޫލް ތަކުގެ ހުރިހާ ދަރިވަރުންނަށް ޓެބްލެޓް ހަވާލުކުރާނެ ކަމަށް އެޑިއުކޭޝަން މިނިސްޓްރީން ބުނެފައިވީ ނަމަވެސް އަދި އެކަން ކޮށްފައެއް ނުވެއެވެ.
