ޕީޕީއެމްއިން ބޭނުން ވެގެން ގާނޫނުލް އުގޫބާތަށް ގެންނަ ބަދަލުތަކަކީ ރާއްޖެ 14 އަހަރަށްވުރެ ފަހަތަށް ދިއުން ކަމަށް ކުރީގެ ޑެޕިއުޓީ ޕްރޮސިކިއުޓަރ ޖެނެރަލް އަލްއުސްތާޛް ހުސެއިން ޝަމީމް ވިދާޅުވެއްޖެއެވެ.

ރާއްޖެޓީވީގެ ފަލަސަރުޚީ ޕްރޮގްރާމްގައި ވާހަކަދައްކަވަމުން ޝަމީމް ވިދާޅުވީ، ޕީޕީއެމްއިން ގާނޫނުލް އުގޫބާތަށް މިގެންނަ އިސްލާހުތައް ފާސްވެއްޖެ ނަމަ، ދަތި އުނދަގޫތަކާއި ކުރިމަތިލާން ޖެހޭނެ ކަމަށާއި، އެއީ ރާއްޖެ 2004 ވަނަ އަހަރަށްވުރެ ފަހަތަށް ދިއުން ކަމަށެވެ. 2004 ވަނަ އަހަރު އޮތް ގާނޫނުލް އުގޫބާތަށް ބަލާއިރު، އޭގައި އެއްވެސް ތަރުތީބެއް، ހަމައެއް، ލަމައެއް ނެތްކަމަށް ޝަމީމް ވިދާޅުވިއެވެ.

މިހާރު އޮތް ގާނޫނުލް އުގޫބާތަކީ ވަރަށް ފުރިހަމަ ގާނޫނުލް އުގޫބާތެއްކަން ފާހަގަކުރައްވައި ޝަމީމް ވިދާޅުވީ، ގާނޫނުލް އުގޫބާތަށް ޕީޕީއެމްއިން ހުށަހަޅާފައިވާ އިސްލާހުތަކުގެ ސަބަބުން، އަދަބުގެ ބާބަށް ބަލާއިރު ކަމެއް ކުރަން އުޅުމާއި، އެކަމެއް ކުރުންވެސް އެއްވަރު ކަމަށާއި، މިއީ ބަލައިގަނެވޭނެ ކަމެއް ނޫން ކަމަށެވެ.

"ގާނޫނުލް އުގޫބާތަކީ ރާއްޖޭގައި މިހާތަނަށް ފާސްކުރި އެންމެ ބޮޑު ގާނޫނު އަދި އެންމެ ކިޔާލަން ފަސޭހަ ގާނޫނު. މިހެން މިދަންނަވަނީ ސަބަބުތަކެއް ހުރީމަ. މިސާލަކަށް ގާނޫނުލް އުގޫބާތު ނަންބަރު ޖަހާފަ އޮތް ގޮތުންވެސް ގާނޫނީ ދާއިރާގެ މީހުންނަށް އެނގޭނެ ނަންބަރުން ވާހަކަ ދައްކަން. ގާނޫނުލްއަގޫބާތު ހިމެނެނީ ތިންބަޔަކަށް. އެއީ އާންމު މާއްދާތައް، ކުށްބަޔާން ކުރާ މާއްދާތައް، އަދަބާ ބެހޭ ވާހަކަތައް" ޝަމީމް ވިދާޅުވިއެވެ.

ޝަމީމް ވިދާޅުވީ ގާނޫނުގެ މާއްދާއެއްގެ ދޭތެރެއިން ދައުލަތުގެ މުއައްޒަފުންނާއި، ދައުލަތުގެ މީހުންނަށް ރިޝްވަތު ދިނުމާއި ރިޝަވަތު ހިފުން އެއީ ކުށަކަށް ނުވާ ގޮތަށް ގާނޫނަށް އިސްލާހު ގެންނަން މަސައްކަތް ކުރާތީ ކަންބޮޑުވާ ކަމަށާއި، އެގާނޫނު މަޖިލީހަށް ފޮނުވަނީ ސަރުކާރުގެ ޕޮލިސީ އެގޮތަށް ބަދަލުވުމުން ކަމަށެވެ.

ދައުލަތުގެ މުވައްޒަފުންނަށް ރިޝްވަތު ދިނުމަކީ ކުށެއް ނޫން ކަމަށް ފާސްކުރާ ނަމަ މީގެ ކުރިން ވެސް ހިނގާފައި ހުރި ރިޝްވަތުގެ މައްސަލަ ނުބެލޭނެ ކަމަށް ޝަމީމް ވިދާޅުވިއެވެ.

"އުއްތަމަފަޑިޔާރުގެ މައްޗައް ކުރެވިފައިވާ ދައުވާ ވެސް ކެންސަލްވާނެ. ސިޔާދު ގާސިމްގެ މައްޗަށް ކުރެވިފައިވާ ދައުވާ ވެސް ކެންސަލްވާނެ. އެގޮތަށް ގޮސް އެހެން ހުރި މައްސަލަތައް ކެންސަލްވާނެ. އެހެންކަމުން ސަރުކާރުގެ ޕޮލިސީ އެހެން ބަދަލުވެގެން ދިޔައީ އެބޭފުޅުންނަށް ލުޔެއް ލިބިގެން ދިއުންވެސް އެކަށީގެންވާ ކަމެއް" ޝަމީމް ވިދާޅުވިއެވެ.

ޕީޕީއެމްއިން ވަގުތު ދީފިނަމަ ގާނޫނުލް އުގޫބަތުގެ ކޮންމެ މާއްދާއަކުން މިހާރު އަމަލުކުރަމުންދާ ފީނަލް ކޯޑުން ފެތޭ މާއްދާއާ އެމާއްދާގެ ސަބަބުން ނުކުންނަ ނަތީޖާއާ އޮޅުންފިލުވައިދެއްވާނެ ކަމަށާއި، މިފަދަ ކަންކަމުގައި ގާނޫނީ ވަކީލުންނާއި އެކު މަޝްވަރާކޮށް އެންމެ ރަނގަޅަށް ނިންމުންތައް ނިންމަންޖެހޭ ކަމަށް ޝަމީމް ވިދާޅުވިއެވެ.