ރިޝްވަތުގެ ކުށް ބަޔާންކުރާ މާއްދާ އުވާލާ ބިލަށް ވޯޓަށް އެހުމަށް ދެވަނަ ފަހަރަށް ތާވަލް ކޮށްފި
މިދިޔަ ހަފްތާގެ ބުދަ ދުވަހު ވެސް ވޯޓަށް އެހުމަށް ތާވަލް ކުރި
ސަރުކާރު ހިންގާ ޕީޕީއެމް ކޯލިޝަނުން ބޭއްވި އިވެންޓެއްގެ ތެރެއިން
ރިޝްވަތަކީ ކުށެއް ނޫން ކަމަށް ސަރުކާރުން ނިންމަން އުޅޭތީ ރައްޔިތުން ކަންބޮޑުވުން ފާޅުކުރަމުން ދަނިކޮށް އެބިލަށް ވޯޓަށް އެހުމަށް ދެވަނަ ފަހަރަށް ތާވަލް ކޮށްފިއެވެ.
ސަރުކާރު ހިންގާ ޕީޕީއެމް ޕާލަމެންޓްރީ ގްރޫޕްގެ މެމްބަރު އިބްރާހީމްދީދީ ގާނޫނުލް އުގޫބާތަށް ހުށަހަޅުއްވާފައިވާ އިސްލާހު ގެނައުމުގެ ބިލް، ގައުމީ ސަލާމަތުގެ ކޮމެޓީން ދިރާސާކޮށް ނިންމި ގޮތުގެ ރިޕޯޓަށް ވޯޓަށް އެހުމަށް ބުދަ ދުވަހުގެ ޖަލްސާގެ އެޖެންޑާގައި ހިމަނާފައިވާއިރު، މިދިޔަ ހަފްތާގެ ބުދަ ދުވަހުގެ މަޖިލީހުގެ ޖަލްސާއަށް އެ ރިޕޯޓް މަޖިލީހުގެ ތަޅުމަށް ހުށަހެޅުމާއި ވޯޓަށް އެހުމަށް އެޖެންޑާ ކޮށްފައި ވެއެވެ. ނަމަވެސް އެ ދުވަހު ވޯޓަށް އެހުމަށް ފަސް ކަމެއް އެބައޮތް ކަމަށް މަޖިލީހުގެ ރައީސް އަބްދުﷲ މަސީހު މުހައްމަދު އިއުލާން ކުރެއްވުމަށް ފަހު، ވޯޓަށް އައްސަވާފައި ވަނީ ޕަބްލިކް ސާރވިސް މީޑިއާ (ޕީއެސްއެމް)ގެ ގާނޫނަށް ހުށަހެޅި އިސްލާހަށް އެކަންޏެވެ.
ޕީއެސްއެމްގެ ގާނޫނަށް ހުށަހަޅާފައިވާ އިސްލާހަކީ ޕީއެސްއެމްގެ ބޯޑުގެ ހަތް މަމްބަރުންގެ އަދުދު ފަސް މެމްބަރުންނަށް ދަށްކޮށް، ބޯޑަށް މެމްބަރުން އައްޔަން ކުރުމުގައި ރައްޔިތުންގެ މަޖިލީހުގެ ރުހުން ހޯދަން ނުޖެހޭ ގޮތަށް ހުށަހެޅި އިސްލާހެކެވެ. އެ އިސްލާހާ އެކު ރައީސް އަބްދުﷲ ޔާމީން ވަނީ ޕީއެސްއެމްގެ ބޯޑަށް ފަސް މެމްބަރުން އައްޔަން ކުރައްވާފައެވެ.
ރައްޔިތުންގެ މަޖިލީހުންގެ ބުދަ ދުވަހުގެ ޖަލްސާގައި މަޖިލީހަށް ތައާރަފް ކުރަންޖެހޭ ބިލްގެ އެޖެންޑާގެ ދަށުން، ސަރުކާރުގެ ފަރާތުން، ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ހުށަހަޅުއްވާ، ދިވެހިރާއްޖޭގެ ގާނޫނުލްއުގޫބާތަށް އިސްލާހު ގެނައުމުގެ ބިލްގެ ފުރަތަމަ ކިޔުން އިއްވުން ވަނީ އެޖެންޑާ ކޮށްފައެވެ.
ޕީޕީއެމުން ބުނެފައި ވަނީ އަބްދުއްރަހީމް ހުށަހަޅުއްވާފައިވާ އެބިލަކީ ގާނޫނުލްއުގޫބާތަށް އަލަށް އިތުރުކުރާ ރިޝްވަތުގެ ކުށް ބަޔާންކުރާ ބާބެއް ކަމަށެވެ.
ބުދަ ދުވަހުގެ މަޖިލިސް ޖަލްސާއަށް އެބިލް ސަރުކާރުގެ ފަރާތުން ހުށަހަޅަން އެޖެންޑާ ކޮށްފައި މިވަނީ، ގާނޫނުލްއުގޫބާތުގައި ރިޝްވަތުގެ ކުށާ ގުޅޭ މާއްދާ، ކޯޓުގެ ހުރުމަތް ކެނޑުމާ ގުޅޭ އަދަބު ބަޔާންކުރާ މާއްދާއަކަށް ބަދަލު ކުރުމަށް ސަރުކާރުން ހުށަހަޅާފައި ވަނިކޮށެވެ. އެ އިސްލާހު މަޖިލީހުން ފާސްވެއްޖެ ނަމަ ނަތީޖާއަކީ ގާނޫނުލްއުގޫބާތުގައި 510 ވަނަ މާއްދާގައި ބަޔާން ކުރާ ރިޝްވަތުގެ ކުށް ގާނޫނުލް އުގޫބާތުން އުވިގެންދިއުމެވެ.
މި މަހުގެ 10 ވަނަ ދުވަހު، ސަރުކާރު ހިންގާ ޕީޕީއެމް ޕާލަމެންޓްރީ ގްރޫޕްގެ ފޭދޫ ދާއިރާގެ މެމްބަރު އިބްރާހިމް ދީދީ، މަޖިލީހަށް ހުށަހެޅުއްވި އެ ބިލުގައި ރިޝްވަތުގެ ކުށް އުވާލަން ހުށަހަޅާފައި އޮތް ކަމެއް ކުރިން ފާހަގަ ކުރެވިފައެއް ނުވެއެވެ.
ރިޝްވަތަކީ ކުށެއް ނޫން ކަމަށް އިސްލާހު ހުށަހަޅާފައި ވާތީ، ގާނޫނުލްއުގޫބާތަށް ކަމާ ބެހޭ މުއައްސަސާތައް އަހުލުވެރިކުރުމުގެ މަސައްކަތް ކުރެއްވި، ކުރީގެ ޑެޕިއުޓީ ޕްރޮސެކިއުޓާ ޖެނަރަލް ހުސައިން ޝަމީމް "ރާއްޖެއެމްވީ"އަށް ވިދާޅުވެފައި ވަނީ އެ ބިލު އޮތް ގޮތަކަށް ފާސްކޮށްފި ނަމަ، ދައުލަތުގެ މުވައްޒަފުން ރިޝްވަތު ހިފުމަކީ ކުށަކަށް ނުވާނެ ކަމަށެވެ. އޭނާ ވިދާޅުވި ގޮތުގައި ސަރުކާރުން ބަދަލު ކުރުމަށް ހުށަހަޅާފައިވާ ގާނޫނުލް އުގޫބާތުގެ 510 ވަނަ މާއްދާއަކީ ދައުލަތުގެ މުވައްޒަފުން ރިޝްވަތު ހިފުމަކީ ކުށެއް ކަމަށް ބަޔާންކުރާ މާއްދާއެއް ކަމަށެވެ.
ރިޝްވަތާ ގުޅިގެން، އޭސީސީން ގިނަ ދައުވާތަކެއް ވެސް އުފުލުމަށް ޕްރޮސެކިއުޓާ ޖެނަރަލް (ޕީޖީ) އޮފީހަށް ފޮނުވާފައި ވަނީ އެ މާއްދާއާ ހަވާލާދީއެވެ.
ޕީޕީއެމް ޕާލަމެންޓްރީ ގްރޫޕުން ގާނޫނުލް އުގޫބާތަށް 29 އިސްލާހެއް ގެނައުމަށް ވަނީ ހުށަހަޅާފައެވެ. އިސްލާހުތައް މަޖިލީހަށް ބަލައިގަނެ، ކޮމެޓީން ދިރާސާކޮށް ނިންމައި، ފާސް ކުރުމަށް މަޖިލީހުގެ ތަޅުމަށް ހުށަހަޅާފައިވާތާ ހަފްތާއެއް ވަނީ ވެފައެވެ.
