ރިޝްވަތަކީ ކުށެއް ނޫން ކަމަށް ސަރުކާރުން ކަނޑައަޅަން އުޅޭތީ ގިނަ ބަޔަކު ނުރުހުން ފާޅުކުރުމާއެކު މަޖިލީހަށް އެހެން ބިލެއް!
ރިޝްވަތަކީ ކުށެއް ނޫން ކަމަށް ކަނޑައަޅާ ބިލް ކޮމެޓީން ފާސްކޮށް، މަޖިލީހުގެ ތަޅުމަށް ފޮނުވާފައިވާތާ ހަފްތާއެއް
ސަރުކާރު ހިންގާ ޕީޕީއެމް ކޯލިޝަންގެ މަޖިލިސް މެމްބަރުން
ރިޝްވަތަކީ ކުށެއް ނޫން ކަމަށް ސަރުކާރު ހިންގާ ޕީޕީއެމުން ގާނޫނުލްއުގޫބާތަށް އިސްލާހު ހުށަހެޅުމާއެކު ގިނަ ބަޔަކު ނުރުހުން ފާޅު ކުރުމާއެކު، ގާނޫނުލްއުގޫބާތަށް އެހެން އިސްލާހެއް ހުށަހަޅައިފި އެވެ.
ރައްޔިތުންގެ މަޖިލީހުންގެ ބުދަ ދުވަހުގެ ޖަލްސާގައި މަޖިލީހަށް ތައާރަފް ކުރަންޖެހޭ ބިލްގެ އެޖެންޑާގެ ދަށުން، ސަރުކާރުގެ ފަރާތުން، ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ހުށަހަޅުއްވާފައިވާ، ދިވެހިރާއްޖޭގެ ގާނޫނުލްއުގޫބާތަށް އިސްލާހު ގެނައުމުގެ ބިލްގެ ފުރަތަމަ ކިޔުން އިއްވުން ވަނީ އެޖެންޑާ ކޮށްފަ އެވެ.
ޕީޕީއެމުން ބުނެފައި ވަނީ އަބްދުއްރަހީމް ހުށަހަޅުއްވާފައިވާ އެބިލަކީ ގާނޫނުލްއުގޫބާތަށް އަލަށް އިތުރުކުރާ ރިޝްވަތުގެ ކުށް ބަޔާންކުރާ ބާބެއް ކަމަށެވެ.
ބުދަ ދުވަހުގެ މަޖިލިސް ޖަލްސާއަށް އެބިލް ސަރުކާރުގެ ފަރާތުން މަޖިލީހަށް ހުށަހަޅަން އެޖެންޑާ ކޮށްފައި މިވަނީ، ގާނޫނުލްއުގޫބާތުގައި ރިޝްވަތުގެ ކުށާގުޅޭ މާއްދާ، ކޯޓުގެ ހުރުމަތް ކެނޑުމާ ގުޅޭ އަދަބު ބަޔާން ކުރާ މާއްދާއަކަށް ބަދަލު ކުރުމަށް ސަރުކާރުން ހުށަހަޅާފައި ވަނިކޮށެވެ. އެ އިސްލާހު މަޖިލީހުން ފާސްވެއްޖެ ނަމަ ނަތީޖާއަކީ ގާނޫނުލްއުގޫބާތުގައި 510 ވަނަ މާއްދާގައި ބަޔާން ކުރާ ރިޝްވަތުގެ ކުށް ގާނޫނުލް އުގޫބާތުން އުވިގެންދިއު މެވެ. އެ އިސްލާހު ވަނީ މަޖިލީހުގެ ގައުމީ ސަލާމަތުގެ ކޮމެޓީން ފާސްކޮށް، އެބިލް ފާސް ކުރުމަށް މަޖިލީހުގެ ތަޅުމަށް ފޮނުވާފަ އެވެ. އަދި ބުދަ ދުވަހުގެ ޖަލްސާގައި އެބިލަށް ވޯޓަށް އެހުމަށް ވެސް ވަނީ އެޖެންޑާ ކޮށްފަ އެވެ.
މި މަހުގެ 10 ވަނަ ދުވަހު، ސަރުކާރު ހިންގާ ޕީޕީއެމް ޕާލަމެންޓްރީ ގްރޫޕްގެ ފޭދޫ ދާއިރާގެ މެމްބަރު އިބްރާހިމް ދީދީ، މަޖިލީހަށް ހުށަހެޅުއްވި އެ ބިލުގައި ރިޝްވަތުގެ ކުށް އުވާލަން ހުށަހަޅާފައި އޮތް ކަމެއް ކުރިން ފާހަގަ ކުރެވިފައެއް ނުވެއެވެ.
ރިޝްވަތަކީ ކުށެއް ނޫން ކަމަށް އިސްލާހު ހުށަހަޅާފައިވާތީ، ގާނޫނުލްއުގޫބާތަށް ކަމާބެހޭ މުއައްސަސާތައް އަހުލުވެރިކުރުމުގެ މަސައްކަތް ކުރެއްވި، ކުރީގެ ޑެޕިއުޓީ ޕްރޮސެކިއުޓާ ޖެނަރަލް ހުސައިން ޝަމީމް "ރާއްޖެއެމްވީ"އަށް ވިދާޅުވެފައިވަނީ އެ ބިލު އޮތް ގޮތަކަށް ފާސްކޮށްފިނަމަ، ދައުލަތުގެ މުވައްޒަފުން ރިޝްވަތު ހިފުމަކީ ކުށަކަށް ނުވާނެ ކަމަށެވެ. އޭނާ ވިދާޅުވި ގޮތުގައި ސަރުކާރުން ބަދަލު ކުރުމަށް ހުށަހަޅާފައިވާ ގާނޫނުލް އުގޫބާތުގެ 510 ވަނަ މާއްދާއަކީ ދައުލަތުގެ މުވައްޒަފުން ރިޝްވަތު ހިފުމަކީ ކުށެއް ކަމަށް ބަޔާން ކުރާ މާއްދާއެއް ކަމަށެވެ.
ރިޝްވަތާ ގުޅިގެން، އޭސީސީން ގިނަ ދައުވާތަކެއް ވެސް އުފުލުމަށް ޕްރޮސެކިއުޓާ ޖެނަރަލް (ޕީޖީ) އޮފީހަށް ފޮނުވާފައި ވަނީ އެ މާއްދާއާ ހަވާލާދީއެވެ.
ޕީޕީއެމް ޕާލަމެންޓްރީ ގްރޫޕުން ގާނޫނުލް އުގޫބާތަށް 29 އިސްލާހެއް ގެނައުމަށް ވަނީ ހުށަހަޅާފައެވެ. އިސްލާހުތައް މަޖިލީހަށް ބަލައިގަނެ، ކޮމެޓީން ދިރާސާކޮށް ނިންމައި، ފާސް ކުރުމަށް މަޖިލީހުގެ ތަޅުމަށް ހުށަހަޅާފައިވާތާ ހަފްތާއެއް ވަނީ ވެފައެވެ.
