ރައީސް އަބްދުﷲ ޔާމީންގެ ސަރުކާރުން އެންމެ ޕްރޮޖެކްޓެއް ވެސް ކޮރަޕްޝަނާ ނުލާއި އަސްލު އަގުގައި ހިންގާފައި ނުވާ ކަމަށް ގުޅިފައިވާ ސިޔާސީ ޕާޓީތަކުގެ ފަރާތުން އިންތިހާބުގެ ވާދަކުރައްވާ އެމްޑީޕީގެ ކެނޑިޑޭޓް އިބްރާހިމް މުހައްމަދު ސޯލިހު (އިބޫ)ގެ ރަނިންގް މޭޓް ފައިސަލް ނަސީމް ވިދާޅުވެއްޖެއެވެ.
އދ އަތޮޅަށް ކުރައްވާ ދެ ދުވަހުގެ ކެމްޕެއިން ދަތުރުގައި އެ އަތޮޅު ހަންޏާމީދޫއަށް ވަޑައިގެން އެރަށުގެ ރައްޔިތުންނާއި ވާހަކަފުޅު ދައްކަވަމުން ފައިސަލް ވިދާޅުވީ ވޭދެވެދިޔަ ދުވަސްތަކުގައި ރައީސް ޔާމީންގެ ސަރުކާރުން ހިންގި ޕްރޮޖެކްޓުތަށް ހަމަ އަގުގައި ދައުލަތުގެ ފައިސާ އިސްރާފުކުރުމެއް ނެތި ހިންގެވިނަމަ މިއަދު ރައްޔިތުން މި ހާލަތުގައި އުޅެން ނުޖެހޭނެ ކަމަށެވެ. އަދި އެކަން ހަންޏާމީދޫއަށް ދިމާވެފައިވާ ސިއްހީ މައްސަލައަށް ވިސްނާލުމުން ވެސް އިނގޭ ކަމަށް ފައިސަލް ވިދާޅުވިއެވެ.
މިއަދު ގުޅިފައިވާ ޕާޓީތަކުން މަސައްކަތް ކުރަނީ ސިޔާސީ ފިކުރު އެއްކިބާކޮށް، ގައުމީ ކަމެއްގެ ގޮތުގައި ދެކިވަޑައިގެން ދަރިންގެ ޙައްގުގައި ކަމަށް ވެސް ފައިސަލް ވިދާޅުވިއެވެ. އެހެންކަމުން ސެޕްޓެމްބަރު މަހު 23 ވަނަ ދުވަހު ބާއްވާ އިންތިހާބުގައި ގުޅިފައިވާ ސިޔާސީ ޕާޓީތަކަށް ވޯޓު ދިނުމަށް އޭނާ އެދިވަޑައިގެނެވިއެވެ.
މި ބައްދަލުވުމުގައި ފައިސަލްގެ އިތުރުން އެމްޑީޕީގެ ނައިބް ރައީސް މުހައްމަދު ޝިފާޒު، ރައްޔިތުންގެ މަޖިލީހުގެ މެމްބަރު އިބްރާހިމް ޝަރީފާއި، ރައްޔިތުންގެ މަޖިލީހުގެ މެމްބަރު އަނާރާ ނައީމްގެ އިތުރުން ޖުމްހޫރީ ޕާޓީގެ ދެ ކައުންސިލް މެމްބަރުން ކަމަށްވާ އާދަމް އާޒިމާއި، މުހައްމަދު މަލީހު ބައިވެރިވަޑައިގެންނެވިއެވެ.
ދެ ދުވަހުގެ މި ދަތުރުފުޅުގައި ހޯމަ ދުވަހު ފައިސަލް ވަނީ މަންދޫ، ފެންފުށީ، ދިއްދޫ އަދި ދިގުރަށަށް ވަޑައިގެންފައެވެ. އަންގާރަ ދުވަހު ހަންޏާމީދޫ، އޮމަދޫ، މަހިބަދޫ، ކުނބުރުދޫ އަދި މާމިގިއްޔަށް ވަޑައިގަންނަވާނެއެވެ. މި ދަތުރުގައި ފައިސަލް ދެން ވަޑައިގެންނުމަށް ހަމަޖެހިފައި ވަނީ އެ އަތޮޅު މަހިބަދޫއަށެވެ.
