އދ. އަތޮޅު މަންދޫގެ ސިއްހީ މަރުކަޒުގެ ހާލަތު ރަނގަޅު ކުރުމަށް ރައީސް އަބްދުﷲ ޔާމީންގެ ސަރުކާރުގައި އަދޭސް ދަންނަވާ ވެސް، އެރަށުގެ ސިއްހީ މަރުކަޒުގެ ހާލަތު ރަނގަޅުކުރުމަށް އެއްވެސް މަސައްކަތެއް ކޮށްފައި ނުވާ ކަމަށް މަންދޫ ކައުންސިލުން ބުނެފިއެވެ.

އާބާދީގައި ގާތްގަނޑަކަށް 450 މީހުން ދިރިއުޅޭ މަންދޫ ކައުންސިލްގެ ރައީސް މުހައްމަދު ނަސީމް ރާއްޖެއެމްވީއަށް މައުލޫމާތު ދެއްވަމުން ވިދާޅުވީ ސަރުކާރުގެ އެކި ވަފުދުތަކާއި، އަދި ވެރިކަން ކުރާ މައި ޕާޓީ ޕީޕީއެމްގެ އެކި ވަފުދުތަކުން އެރަށަށް ވަޑައިގަތުމުން ސިއްހީ މަރުކަޒަށް ދިމާވެފައިވާ މައްސަލަތަކުގެ ވާހަކަ އެކި ފަހަރު މަތިން ހިއްސާކޮށްފައިވާ ކަމަށެވެ. އެހެންމަވެސް ރައީސް ޔާމީންގެ ސަރުކާރުން ކުދި އާބާދީ ދިރިއުޅޭ އެފަދަ ރަށްތަކުގެ ސިއްހީ މަރުކަޒުގެ މައްސަލަތައް ހައްލުކޮށްދިނުމަށް މާ ބޮޑު ސަމާލުކަމެއް ނުދެއްވާކަން ފާހަގަކުރެވޭ ކަމަށެވެ. އަދި އެރަށަކީ އެފަދަ މިސާލެއް ކަމަށް ޖުމްހޫރީ ޕާޓީއަށް ނިސްބަތްވެޑައިގަންނަވާ ކައުންސިލްގެ ރައީސް ނަސީމް ވިދާޅުވިއެވެ.

މަންދޫ ސިއްހީ މަރުކަޒުގައި ހުންނަނީ އާންމު ބަލިތަކުގެ އެންމެ ޑޮކްޓަރަކާއި، ދެ ނަރުހެވެ. ހާއްސަ ބަލިތަކުގެ ޑޮކްޓަރެއް ނެތް އިރު، އެކްސްރޭ އާއި ލޭގެ ޓެސްޓް ހެދުން ފަދަ ކަންކަން ނުކުރެވެއެވެ. އެ ރަށުގެ މީހުން ޑޮކްޓަރަށް ދައްކަން ދާންޖެހެނީ އެ އަތޮޅު މަހިބަދޫއަށެވެ.

ގުޅިފައިވާ ސިޔާސީ ޕާޓީތަކުގެ ފަރާތުން އިންތިހާބުގައި ވާދަކުރައްވާ އެމްޑީޕީގެ ކެންޑިޑޭޓް ފައިސަލް ނަސީމް ވަނީ އެރަށުގެ ސިއްހީ މަރުކަޒަށް ޒިޔާރަތްކުރައްވާ އެތަނުގެ ހާލަތު ބައްލަވާލައްވާފައެވެ. އަދި ގުޅިފައިވާ ސިޔާސީ ޕާޓީތަކުގެ ވެރިކަމެއްގައި އަތޮޅުތެރޭ ސިއްހީ ނިޒާމް ހަރުދަނާ ކުރައްވާނެ ކަމަށް ފައިސަލް ވިދާޅުވިއެވެ.  ފައިސަލް ވަނީ އެރަށުގެ ބައެއް ގެތަކަށް ވަޑައިގެން ރައްޔިތުންގެ ހާލަތު ބައްލަވާލައްވާފައެވެ.