ދެކުނުގެ ބައެއް ރަށްތަކަށް އުދައިގެ އަސަރުކުރުމަކީ އެކަށީގެންވާ ކަމެއް: މެޓް އޮފީސް
30 ޖުލައި 2018 | ހޯމަ 06:17ދެކުނުގެ ކަނޑުތައް އާދައިގެ ވަރަކަށް މަޑުވި ނަމަވެސް އެހެން ހިސާބުތަކުގެ ކަނޑުތައް ގަދަވާނެ
ރަށަކަށް އުދަ އަރާފައި
ދިޔަވަރުބޮޑުވާ ގަޑިތަކުގައި ރާއްޖޭގެ އެންމެ ދެކުނުގެ ބައެއް ރަށްތަކަށް އުދައިގެ އަސަރުކުރުމަކީ އެކަށީގެންވާ ކަމެއް ކަމަށް މޫސުމާ ބެހޭ ގައުމީ އިދާރާއިން ބުނެފިއެވެ.
މިއަދު ހެދުނު 10:00 އިން މާދަމާ ހެދުނު 10:00 އަށް ރާއްޖޭގެ މޫސުން ލަފާކުރާ ގޮތަށް ބަލާއިރު އުތުރުގެ ބައެއް ރަށްތަކަށް މެންދުރު ފަހު ކެރީގެ އަސަރު ފޯރި ނަމަވެސް އެހެން ހުރިހާ ހިސާބުތަކަށް މޫސުން އާންމު ގޮތެއްގައި ރަނގަޅުވާނެ ކަމަށް މެޓް އޮފީހުން މައުލޫމާތު ދެއެވެ.
މެޓް އޮފީހުން ބުނީ ވައި ޖެހޭނީ ދެކުނުގެ ހިސާބުތަކަށް ހުޅަނގާއި ހުޅަނގުއުތުރުން ގަޑިއަކު ތިން މޭލާއި 10 މޭލު ދެމެދުގެ ބާރު މިނުގައި ކަމަށާއި އެހެން ހިސާބުތަކުގައި ގަޑިއަކު 10 މޭލާއި 17 މޭލާ ދެމެދުގެ ބާރުމިނެއްގައި ވައި ޖެހޭނެ ކަމަށެވެ.
މެޓް އޮފީހުން ބުނީ ދެކުނުގެ ކަނޑުތައް އާދައިގެ ވަރަކަށް މަޑުވާނެ ކަމަށާއި އެހެންހިސާބުތަކުގެ ކަނޑުތަށް އާދައިގެ ވަރަކަށް ގަދަވާނެ ކަމަށެވެ. އަދި ދިޔަވަރުބޮޑުވާ ގަޑިތަކުގައި ރާއްޖޭގެ އެންމެ ދެކުނުގެ ބައެއް ރަށްތަކަށް އުދައިގެ އަސަރުކުރުމަކީ އެކަށީގެންވާ ކަމެކެވެ.
އެގޮތުން ރާއްޖޭގެ އުތުރަށް ދިޔަވަރު ބޮޑުވާނީ 13:56 ގައި ކަމަށާއި، މެދުތެރެއަށް 14:44 ގައި ކަމަށެވެ. އަދި ދެކުނަށް ދިޔަވަރު އެންމެ ބޮޑުވާނީ 15:17ގައި ކަމަށް މެޓް އޮފީހުން މައުލޫމާތުދެއެވެ.
