އިބޫގެ ވައުދު: ސިވިލް ސާވީސް މުވައްޒަފުންގެ އިތުރު ގަޑީގެ ލިމިޓް އުވާލާނަން

ސިވިލް ސާވިސް މުވައްޒަފުންގެ އިތުރު ގަޑި ލިމިޓް ކޮށްފައި އޮންނަ އޮތުން ނިމުމަކަށް ގެންނަވާނެ ކަމަށް ގުޅިފައިވާ ސިޔާސީ ޕާޓީތަކުގެ ފަރާތުން ރިޔާސީ އިންތިޚާބުގައި ވާދަކުރައްވާ ކެންޑިޑޭޓް އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ރާއްޖެޓީވީން ގެނެސްދިން "އިބޫ" ޕްރޮގުރާމަށް ދެއްވި އިންޓަވިއުގައި އިބޫ ވިދާޅުވީ އިތުރު ގަޑީގައި ކިތަންމެ ގިނައިން މަސައްކަތް ކުރި ނަމަވެސް އިތުރުގަޑީގެ ފައިސާ ދެވޭނީ ވަކި ވަރަކަށް ކަމަށް ކަނޑައަޅާފައި އޮންނަ އޮތުމަކީ ގަބޫލު ކުރެއްވޭ ކަމެއް ނޫން ކަމަށެވެ. ލިމިޓެއް ނެތި އިތުރު ގަޑީގެ ފައިސާ ލިބެން ޖެހޭ މުވައްޒަފުންގެ ގޮތުގައި ޓީޗަރުންނާއި ނަރުހުން ހާއްސަ ގޮތެއްގައި އެމަނިކުފާނު ފާހަގަ ކުރެއްވިއެވެ.

"މިހާރު މި އޮންނަނީ އޯވަރ ޓައިމް ލިމިޓް ކުރެވިފައި. އޯވަރޓައިމް މި ދެވެނީ ވަކި ވަރަކަށް. އެކަން އަޅުގަނޑުމެން އިރާދަ ކުރެއްވިއްޔާ ނައްތާލާނަން،" އިބޫ ވިދާޅުވިއެވެ.

އިބޫ ވިދާޅުވީ ސިވިލް ސާވީސްގެ މުވައްޒަފުންގެ އުޖޫރަ މުރާޖާ ކުރަން ޖެހޭނެ ކަމަށާއި މުސާރައަށް ގެނެވިދާނެ ބަދަލުތަކާމެދު މިހާރު ވެސް ވިސްނަވާ ވަޑައިގަންނަވާ ކަމަށެވެ. އަދި ވިދާޅުވީ ސިވިލް ސާވީސްގެ މުވައްޒަފުންނާމެދު އެމަނިކުފާނުގެ ސަރުކާރެއްގައި ގެންގުޅުއްވާނެ ސިޔާސަތުތައް ވަރަށް އަވަހަށް ހާމަ ކުރައްވާނެ ކަމަށެވެ.

އިބޫ ވިދާޅުވީ ސިވިލް ސާވީސްގެ މުވައްޒަފުން ތިބީ ބިރުވެރިކަމެއްގެ ތެރޭގައި ކަމަށާއި، ނަމަވެސް އެ މަނިކުފާނުގެ ވެރިކަމެއްގައި ސިޔާސީ ކޮންމެ ފިކުރެއްގެ މީހަކަށް ވެސް މިނިވަން ކަމާއެކު މަސައްކަތް ކުރުމަށް ފުރުސަތު ލިބިގެންދާނެ ކަމަށެވެ.

ރާއްޖެޓީވީން ގެނެސްދޭ "އިބޫ" ޕްރޮގުރާމަކީ ކޮންމެ ހުކުރު ދުވަހެއްގެ ރޭ 10.00ގައި ގެނެސްދޭ ސިލްސިލާ ޕްރޮގުރާމެކެވެ.