ފާރިސްއާ ގުޅުން ހުރި މައްސަލައެއްގައި މ. ސެސްނާ ފާސްކުރަނީ. ދެ މީހަކު ހައްޔަރުކޮށްފި.
26 ޖުލައި 2018 | ބުރާސްފަތި 17:22ގާތްގަނޑަކަށް މިރޭ 12 ޖަހާކަންހާ އިރު ގިނަ އަދަދެއްގެ ފުލުހުން ސެސްނާ ގެއަށް ވަނީ ވަދެފައި
މ. ސެސްނާ ގެއަށް ވަތް ފުލުހުންގެ ބަޔަކު ނުކުންނަނީ: އަދި ވެސް އެ ގެ ދަނީ ބަލައި ފާސްކުރަމުން . ފޮޓޯ: ރާއްޖެއެމްވީ
ޖަލަށް ލާފައި ހުރި ދިއްގަރު ދާއިރާގެ މެންބަރު އަހްމަދު ފާރިސް މައުމާނާ ގުޅުންހުރި މައްސަލައެއްކަމަށް ބުނެ، މާފަންނު ސެސްނާ ގެއަށް ގިނަ އަދަދެއްގެ ފުލުހުން ވަދެ ބަލައި ފާސްކުރުން ކުރިއަށްދާއިރު، މިހާތަނަށް ދެ މީހަކު ހައްޔަރުކޮށްފި އެވެ.
ސެސްނާ އަކީ އެމްއެމްޕީއާރުސީ. ގެ ޚިޔާނާތުގެ މައްސަލައިގައި ހޯދަން އިއުލާންކޮށްފައިވާ މުހައްމަދު އައްލާމް ލަތީފު (މޮހޯ)ގެ އާއިލާގެ ގެ އެވެ.
އެ ގެއަށް ފުލުހުން ވަދެ ބަލައި ފާސްކުރަން ފެށީ ބުދަ ދުވަހުގެ ރޭ ގާތްގަނޑަކަށް 12 ޖަހާކަންހާ އިރު އެވެ. ފުލުހުން ބަލައި ފާސްކުރަމުންދާއިރު މިހާތަނަށް ދެމީހަކު ހައްޔަރު ކޮށްފައި ވެއެވެ. ފުރަތަމަ މީހާ ހައްޔަރުކުރީ ރޭ ދަންވަރު އެވެ. ދެ ވަނަ މީހާ ހައްޔަރުކުރީ ބުރާސްފަތި ދުވަހުގެ ހެނދުނު 7:50 ހާއިރު އެވެ. އެ ގެއިން ދަބަހެއް ނެރެގެން ގެންދިޔަ މަންޒަރު ވެސް ފެނިފައިވެ އެވެ.
ހައްޔަރުކުރި ދެ މީހުންނަކީ ކޮންބައެއް ކަމެއް އަދި އެ މީހުންގެ މައްޗަށް ތުހްމަތުކުރަނީ ކޮން ކަމެއް ފުލުހުން ނުބުނެ އެވެ.
ދެ ވަނަ މީހާ ހައްޔަރުކޮށްގެން ފުލުހުންގެ ޖިޕަށް އަރުވަނީ
އަށް ބުރިއަށް ހަދާފައިވާ ސެސްނާގެ ފަސްވަނަ ފަންގިފިލާގައި ދިއްގަރު ދާއިރާގެ މެންބަރު ފާރިސް މައުމޫނާއި ގުޅުން ހުރި އެޕާރޓްމެންޓެއް ހުރި ކަމަށާއި، މި އޮޕަރޭޝަނަކީ ފާރިސްއާ ގުޅުން ހުރި އޮޕްރޭޝަންއެއް ކަމަށް ވެސް ވަނީ މައުލޫމާތު ލިބިފައެވެ.
މި އޮޕަރޭޝަނާ ގުޅޭ ގޮތުން ފުލުހުން އަދި ރަސްމީކޮށް ބަހެއް ނުބުނެ އެވެ.
ފާރިސްގެ މައްސަލައެއްގައި ކަމަށް ބުނެ، އެމްއެމްއެމްޕީއާރުސީ. ގެ މައްސަލައިގައި ބައިވެރިވި ކަމަށް ތުހްމަތުކުރެވޭ މޮހޯގެ ގެ ފުލުހުން ބަލައި ފާސްކުރަމުންދާއިރު، އެމްއެމްޕީއާރުސީ. އަށް ލިބުނު ޑޮލަރު މާރުކޮށް ގުނުމާ ހަވާލުވެވަޑައިގަތީ ރައީސް އަބްދުﷲ ޔާމީން ކަމަށް، އެ މަނިކުފާނުގެ ކުރީގެ ނާއިބު އަހްމަދު އަދީބު، ވަނީ ޝަރީއަތުގެ މަޖިލީހުގައި ވަނީ ވިދާޅުވެފަ އެވެ. އެކަން މިހާތަނަށް ރައީސް ޔާމީން ދޮގުކުރައްވާފައެއް ނެތެވެ.
