ޕީޕީއެމް މޭޒުތަކާއި އަދި ސަރުކާރު އޮފީސްތަކުން މީގެ ފަސް ދުވަސް ކުރިން ވޯޓުލާން ރީ-ރެޖިސްޓާ ކުރި ފަރާތްތަކަށް ލިބެންޖެހޭ ސްލިޕް ނުލިބޭ: މަހްލޫފް
24 ޖުލައި 2018 | އަންގާރަ 19:16ރީ-ރެޖިސްޓްރޭޝަން ފޯމް ފުރިހަމަކޮށް ހަވާލުކުރުމަށް ފަހު، ހަވާލުކުރިކަމުގެ ސްލިޕް ހޯދުމަށް ސަމާލުކަން ދޭން ޖެހޭ
ވެލާނާގެ ކައިރީގައި ޕީޕީއެމް އިން މޭޒެއް ބަހައްޓައިގެން ރީރެޖިސްޓްރޭޝަން ކުރިއަށް ގެންދަނީ
މިއަހަރުގެ ސެޕްޓެމްބަރު 23 ގައި އޮންނަ ރިޔާސީ އިންތިޚާބުގައި ވޯޓު ލާން ރީ-ރެޖިސްޓްރީ ކުރަން، ވެރިކަން ކުރާ ޕީޕީއެމްގެ މޭޒުތަކުން އަދި ސަރުކާރު ކުންފުނިތަކާއި އޮފީސްތަކުން މީގެ ފަސް ދުވަސް ކުރިން ރީ-ރެޖިސްޓްރީ ކުރި ފޯމްތަކުގެ ސްލިޕް ލިބިފައި ނުވާތީ މުވައްޒަފުން ދަނީ ކަންބޮޑުވުން ފާޅުކުރަމުން ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފް ވިދާޅުވެއްޖެއެވެ.
މަހްލޫފް އަންގާރަ ދުވަހު ކުރެއްވި ޓްވީޓެއްގައި ވިދާޅުވީ އެހެންކަމުން "މިޖަރީމާ ހިންގަމުން ގެންދާ ވެރިން އެ ފަރާތްތަކަށް ޖަވާބުދާރީވުމަށް ގޮވާލާ" ކަމަށެވެ.
މަހްލޫފް މިހެން ވިދާޅުވިއިރު، ޕީޕީއެމް މެދުވެރިކޮށް ނުވަތަ ސަރުކާރު ކުންފިނިތަކާއި މުއައްސަސާތައް މެދުވެރިކޮށް ރީ-ރެޖިސްޓްރީ ކުރާ ފަރާތްތަކުގެ ތެރެއިން ސަރުކާރަށް ތާއިދު ނުކުރާނެހެން ހީވާ ފަރާތްތަކުގެ ރީ-ރެޖިސްޓްރީ ފޯމްތައް އިލެކްޝަންސް ކޮމިޝަނަށް ނުފޮނުވާނެ ކަމަށް ގުޅިފައިވާ އިދިކޮޅު ސިޔާސީ ޕާޓީތަކުން ދަނީ ތުހުމަތު ކުރަމުންނެވެ. އަދި މިގޮތަށް ހަދަނީ ސަރުކާރަށް ތާއިދު ނުކުރެވޭ ފަރާތްތަކަށް ވޯޓުލުން އޮންނަ ދުވަހު ވޯޓު ނުލެވޭ ގޮތަށް ހެދުމަށް ކަމަަށް ގުޅިފައިވާ އިދިކޮޅު ސިޔާސީ ޕާޓީތަކުން ތުހުމަތު ކުރެއެވެ.
ރިޔާސީ އިންތިޚާބު ސެޕްޓެމްބަރު 23 ގައި އޮންނައިރު، ރައީސް ޔާމިންގެ ސަރުކާރުން ސަރުކާރު މުވައްޒަފުންނަށް ވަޒީފާގެ ބިރު ދައްކާ އަދި އެހެނިހެން ވެސް ގޮތްގޮތުން ނުފޫޒު ފޯރުވައި އިންތިޚާބުގައި ރައީސް ޔާމިނަށް ވޯޓު ދިނުމަށް އަންގަމުންދާ ކަމަށް ގުޅިފައިވާ އިދިކޮޅު ސިޔާސީ ޕާޓީތަކުން ދަނީ ތުހުމަތުކުރަމުންނެވެ.
