ޓެރަރިޒަމްގެ ކުށް ސާބިތު ކުރަން މައުމޫނާ ދެކޮޅަށް ހުށައެޅި މުހިންމު ހެކިތަކެއް ސިއްރުކޮށްފި
24 ޖުލައި 2018 | އަންގާރަ 13:48މައުމޫނު ވިދާޅުވީ ސިއްރު ހެކިބަސް ނެގުން އިސްލާމީ ޝަރީއަތުގައި ނޯންނަ ކަމަށް
ކުރީގެ ރައީސް މައުމޫނު ޝަރީއަތައް މާލެ ގެންނަނީ:- އެމަނިކުފާނުގެ މައްޗަށް ވަނީ ޓެރަރިޒަމްގެ ދައުވާ އުފުލާފައި
ގާނޫނާ ހިލާފަށް ސަރުކާރު ވައްޓާލަން އުޅުނު ކުށުގެ ތުހުމަތުގައި ކުރީގެ ރައީސް މައުމޫން އަބްދުލްގައްޔޫމްގެ މައްޗަށް ދައުލަތުން އުފުލާފައިވާ ޓެރަރިޒަމްގެ ދައުވާ ސާބިތު ކުރަން ހުށައެޅި ހެކިންގެ ހެކިބަހާއި ބައެއް ކިތާބީ ހެކިތައް ވެސް ސިއްރު ކޮށްފި އެވެ.
މައުމޫނުގެ މައްޗަށް އުފުލާފައިވާ މި ދައުވާއާ ގުޅިގެން އަންގާރަ ދުވަހު ބޭއްވި އަޑުއެހުމުގައި މި މައްސަލައިގައި ހުށަހަޅާފައިވާ ބައެއް ހެކިންގެ ހެކިބަސް ސިއްރުން ނަގާ ދިނުމަށް ވަނީ އެދިފައި އެވެ. ސިއްރުން ހެކިބަސް ނަގާއިރު އެއީ ކާކުކަން ނޭނގޭ ގޮތަށް އަޑު ބަދަލުކޮށްގެން ޝަރީއަތުގެ މަޖިލީހަށް ހާޒިރު ނުކޮށް ހެކިބަސް ނަގާދިނުމުގެ އިންތިޒާމް ހަމަ ޖައްސާ ދިނުމަށް ޝަރީއަތުގައި އެދުމުން މައުމޫނު ވަނީ އެކަން ނުކުރެވޭނެ ކަމަށް ވިދާޅުވެ އެކަމާ ދެކޮޅު ހައްދަވާފައި އެވެ. މައުމޫނު ވިދާޅުވީ ސިއްރުން ހެކިބަސް ނެގުމަކީ އިސްލާމީ ޝަރީއަތުގައި އޮންނަ ކަމެއް ނޫން ކަމަށާއި ހެކިބަސް ދޭން ޖެހޭނީ ޝަރީއަތުގެ މަޖިލީހުގައި ހުރެގެން ފާޅުގައި ކަމަށެވެ. ސިއްރުން ހެކިބަސް ދިނުމަށް ފުރުސަތު ދިނުމުގެ ސަބަބުން ދޮގު ހެކިބަސް ދިނުމަށް މަގު ފަހި ވެގެންދާނެ ކަމަށް ވެސް މައުމޫނު ވިދާޅުވި އެވެ. މައުމޫނުގެ ވަކީލު އިބްރާހިމް ޝަމީލް ވިދާޅުވީ ހެކިވެރިޔާއަށް ހިމާޔަތާއި ރައްކާތެރިކަން ލިބޭނެ ގޮތަށް ހެކިބަސް ނެގޭނީ ހެއްކާ ބެހޭ ގާނޫނުގައިވާ ގޮތުގެ މަތިން ކަމަށް ޖިނާއީ އިޖްރާއަތުގެ ގާނޫނުގައި ބުނެފައިވާއިރު ހެއްކާ ބެހޭ ގާނޫނުގައި ހެކިބަސް ނަގާނެ ގޮތް ބަޔާން ކޮށްފައި ނެތުމުން އެކަން ނުކުރެވޭނެ ކަމަށެވެ.
ނަމަވެސް ދައުލަތުގެ ވަކީލުން ވިދާޅުވީ ހެކިބަސްދޭ މީހާގެ ކިބައިގައި ހުންނަން ޖެހޭ ޝަރުތުތައް އިސްލާމީ ޝަރީއަތުގައި ބަޔާންވެފައި ވާއިރު ސިއްރު ހެކިވެރިޔާގެ އަދުލުވެރިކަން ކަށަވަރު ކުރުމަށްފަހު ސިއްރުން ހެކިބަސް ނެގުމަށް އެއްވެސް ހުރަހެއް ނެތް ކަމަށެވެ. އަދި ސިއްރުން ހެކިބަސް ނެގުމަކީ ކުރެވިދާނެ ކަމެއްކަން ޖިނާއީ އިޖްރާއަތުގެ ގާނޫނަށް އަމަލު ކުރަން ފެށި ފަހުން ހައި ކޯޓުން ނިންމާފައިވާ ގަޒީއްޔާއަކުން އެނގޭ ކަމަށެވެ. އެހެން ކަމުން މި މައްސަލަ ބައްލަވާ ގާޒީ އަހްމަދު ހައިލަމް ނިންމެވީ ސިއްރުން ކާކުކަން ނޭނގޭ ގޮތަށް ހެކިބަސް ނެގުމަކީ ރާއްޖޭގެ އަދުލުގެ ނިޒާމް ބަލައިގެންފައިވާ ނިޒާމެއް ކަމަކަށްވާތީ އާއި ދައުލަތުން ފާހަގަ ކުރެއްވި ކަންކަމަށް ބަލާ ސިއްރުން ހެކިބަސް ނެގުމަށެވެ.
ދެ ވަނަ ކަމެއްގެ ގޮތުގައި ދައުލަތުން އެދުނީ ހެކީގެ ގޮތުގައި ހުށަހަޅާފައިވާ ބައެއް ކިތާބީ ހެކިތައް ސިއްރު ކޮށްދިނުމަށެވެ. އޭގެ ތެރޭގައި މައްސަލަ ސާބިތު ކުރުމަށް ދައުލަތުން ހުށައަޅާފައިވާ ވީޑިއޯގެ އެނަލިސިސް ރިޕޯޓާއި ވީޑިއޯ ސްކްރީން ޝޮޓް ފޮޓޯތަކާއި ސިއްރު ހެކިވެރިންގެ ބަޔާންތައް ހިމެނެ އެވެ. މި ތަކެތި ސިއްރު ކޮށްދޭން އެދުނީ އެ ހެއްކަށް ރައީސް މައުމޫނު ނުފޫޒު ފޯރުވާފާނެތީ ކަމަށް ބުނެ އެވެ. އަދި ވީޑިއޯގެ ސްކްރީން ޝޮޓްތައް ދޭން ދެކޮޅު ހަދަނީ އެ ފޮޓޯތަކުގައި މިހާރުވެސް ތަހްގީގުކުރަމުންދާ ބައެއް މީހުން ފެންނަމުންދާ ތީ ކަމަށް ދައުލަތުގެ ވަކީލުން ވިދާޅުވި އެވެ.
އެހެން ނަމަވެސް ރައީސް މައުމޫނުގެ ވަކީލުން ވިދާޅުވީ މަރުގެ މައްސަލަތަކާއި ބައެއް ޓެރަރިޒަމްގެ މައްސަލަތަކުގައި ވެސް ދެކޮޅަށް ދޭ ބަޔާންތައް ނަން އުނިކުރުމަށް ފަހު ދައުވާ ލިބޭ ފަރާތަށް ދޭ ކަމަށެވެ. އަދި ރައީސް މައުމޫނަކީ ބަންދުގައި ހުންނެވި ބޭފުޅަކަށްވާއިރު އެމަނިކުފާނަކީ ހެއްކަށް ނުފޫޒު ފޯރުވުމުގެ ފުރުސަތު އޮތް ބޭފުޅެއް ނޫން ކަމަށް ދިފާއުން ފާހަގަ ކުރެއްވި އެވެ. ނަމަވެސް ގާޒީ ނިންމެވީ ދައުލަތުން އެދިފައިވާ ގޮތަށް އެ ތަކެތި ސިއްރު ކުރެއްވުމުގެ ދާއިމީ އަމުރެއް ނެރުއްވުމަށެވެ.
ރައީސް މައުމޫނާ ދެކޮޅަށް ޓެރަރިޒަމުގެ ދައުވާ ކުރަނީ 2013 ވަނަ އަހަރުން ފެށިގެން ފަނޑިޔާރުންނަށް ރިޝްވަތުދީގެން ހުކުމްތައް ވަކިގޮތަކަށް ނެރުމަށް ފަނޑިޔާރުންނަށް މަޖުރޫބުކޮށްފައިވާ ކަމަށް ބުނެއެވެ. ގާނޫނާ ހިލާފަށް ސަރުކާރު ވައްޓާލުމަށް ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު އިލްހާމް އަހުމަދާއި މައްޗަންގޮޅީ ދެކުނު ދާއިރާގެ މެމްބަރު އަބްދުﷲ ސިނާނަށް ރިޝްވަތު ދިނުމުގެ އިތުރުން 1 ފެބްރުއަރީގައި ސުޕްރީމް ކޯޓުން އަމުރު ނެރުމުގައި ރައީސް މައުމޫން ނުފޫޒު ފޯރުވާފައިވާ ކަމަށް ވެސް ދައުވާގައި ބުނެފައިވެއެވެ.
