ފެއާމޮންޓް މޯލްޑްވިސް ސިއްރު ފެންފުށި ރިޒޯޓުގެ މޫދުގައި ހަދާފައިވާ ދުނިޔޭގެ ފުރަތަމަ ސެމީ-ސަބްމާޖްއާރޓް ގެލެރީއަކީ ލާދިނީ އަމަލެއް ކަމަށާއި ކޮންމެ މީހަކު ކުރި ނަމަވެސް އަދި ކޮންމެ އިރަކު ކުރި ނަމަވެސް، ގޯސް ކަމެއް ހަމަ ވާނީ ގޯހަށް ކަމަށް ދީނީ އިލްމުވެރިޔާ ޝެއިޚް އަލީ ޒައިދް ވިދާޅުވެއްޖެއެވެ.
އިނގިރޭސިވިލާތަށް ނިސްބަތްވާ މަޝްހޫރު ނެޗުރަލިސްޓް އަދި އާޓިސްޓެއް ކަމަށްވާ ޖޭސަން ޑިކެއާސް އުފެއްދި މި ގެލަރީ ހުންނަނީ ސިއްރު ފެންފުށީގެ ފަޅުތެރޭގައި ކަމަށް ވާއިރު މޫދުގެ ދިރުންތަކާއި އިންސާނުންނާ އޮތް ގުޅުން މިތަނުގައި ދައްކުވައިދީފައި ވަނީ އިންސާނުންނާ ވައްތަރު ގޮތަށް ހަދާފައި ހުރި ބުދުތަކާއި އަދި ހަރުކޮށްފައިވާ މުރަކަތަކުންނެވެ.
މިކަމާ ގުޅިގެން ޝެއިޚް ޒައިދް އަންގާރަ ދުވަހު ކުރެއްވި ޓްވީޓެއްގައި ވިދާޅުވީ މިފަދަ ކަންކަން ވަގުތުން ހުއްޓުވަން ޖެހޭ ކަމަށެވެ. އަދި ފިޔަވަޅު އަޅަން ޖެހޭ ކަމަށާއި ދިވެހި ފުލުހުންގެ އިންޓެލިޖެންސް އަށް މިކަންކަމުގެ ޚަބަރު ހަމަ ނުލިބެނީތޯ ވިދާޅުވެ، ޝެއިޚް ޒައިދު ވަނީ ސުވާލު އުފައްދަވާފައެެވެ. އަދި "މި މުންކަރާތް" ހުއްޓުވާނެ މީހަކު ނެއްތޯ ވިދާޅުވެ ވެސް ޝެއިޚް ޒައިދު ވަނީ ސުވާލު އުފައްދަވާފައެވެ.
Mi e kandaelhigen laadheenee amaleh! Konme iraku kuriyas, konme meehaku kuriyas goas hama vaanee goahah. Mifadha kankan vaguthun huttuvan jehey! Fiyavalhu alhan jehey! Police ge intelligence ah mikahala kankamuge khabar hama nulibeneebaa?! Mi munkarai huttuvaane meehaku nehbaa?! pic.twitter.com/wNdBy7W39u
— Ali Zaid (@alizaid1000) July 24, 2018
"ކޮރަލޭރިއަމް" ގެ ނަން ދީފައިވާ މިތަން ހަދާފައި ހުންނަނީ، ހަ މީޓަރު ހުންނަ ދަގަނޑު ކޮށްޓެއްގެ ގޮތަށް ކަމަށްވާއިރު، އޭގެ ތަންތަންގަނޑު ކަނޑައިގެން، ފެނާއި ވައި ދައުރު ވާނެ ގޮތަށް ހަދާފައިވާ މި ކޮށީގެ ބޮޑުބައި ހުންނަނީ ފެނުން މަތީގައެވެ.
މިތަނުގައި ބުދު ބެހެއްޓުމާ ގުޅިގެ ސޯޝަލް މީޑިއާގައި ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. އަދި ސާކް ސަމިޓާ ދިމާކޮށް އެމްޑީޕީ ސަރުކާރުން އައްޑޫގައި ބެހެއްޓި މޮނިއުމެންޓްތަކާ ދެކޮޅަށް އަޑުއުފުލި ޝެއިޚުން މިއަދު ކޮބައިތޯ ދަނީ ސުވާލުކުރަމުންނެވެ. އަދި އެމްޑީޕީ ސަރުކާރުން މޮނިއުމެންޓްތައް ބެހެއްޓި އިރު އެއީ ލާދީނީ ކަމަކަށްވީ އިރު މި ސަރުކާރުން އެކަން ކުރުމުން އެކަންވީ "އާރޓަކަށް" ކަމަށް ބައެއް ފަރާތްތަކުން ދަނީ ބުނަމުންނެވެ.
