50 މީހުންނާއެކު މާފުއްޓަށް ދަތުރުކުރަމުންދިޔަ ފެރީއެއް އިންޖީނު ހުއްޓިއްޖެ
24 ޖުލައި 2018 | އަންގާރަ 06:39އެއްވެސް މީހަކަށް ގެއްލުމެއް ނުވޭ
ވިއްސާރަ ދުވަހެއްގައި ކަނޑުމަތީގެ މަންޒަރެއް
މާލެއިން ފުރައިގެން ކ. މާފުއްޓަށް ދަތުރު ކުރަމުންދިޔަ ފެރީއެއް ވާދޫ ކަނޑަށް އިންޖީނު ހުއްޓިއްޖެއެވެ.
އެމްއެންޑީއެފްއިން ބުނިގޮތުގައި އެ ހާދިސާ ރިޕޯޓު ކޮށްފައިވަނީ އަންގާރަ ދުވަހުގެ ހެނދުނު 09:17 ގައި ކަމަށެވެ. "ހަނދޭގިރި" ކިޔާ އެ ފެރީގައި 50 މީހުން ދަތުރު ކުރި އިރު އޭގެ ތެރޭގައި އަންހެނުންނާއި ކުޑަކުދިންގެ އިތުރުން 10 ފަތުރުވެރިން ވެސް ހިމެނޭ ކަމަށް އެމްއެންޑީއެފް އިން ބުނެއެވެ. އެމްއެންޑީއެފް އިން އެސަރަހައްދުގައި ހަރަކާތްތެރިވަމުންދާއިރު, ފެރީގައި ތިބި މީހުންގެ ތެރެއިން އަންހެނުންނާއި ކުދިން އަދި ފަތުރުވެރިން މާލެ ގެނައުމުގެ މަސައްކަތް ކުރަމުން އަންނަ ކަމަށް ވެސް އެމްއެންޑީއެފް އިން ބުންޏެވެ.
އެހާދިސާގައި އެކަކަށް ވެސް އަނިޔާއެއް ނުވާ ކަމަށް އެމްއެންޑީއެފްއިން ވަނީ ބުނެފައެވެ. އެމްއެންޑީއެފް އިން ބުނިގޮތުގައި ފެރީގެ ވެރިފަރާތުން ވަނީ އެހެން އުޅަނދެއް އެސަރަހައްދަށް ފޮނުވާފައެވެ.
