ވޯޓުލާ މަރުކަޒުތަކުގެ އޮފިޝަލުން ހޯދަން އަނެއްކާވެސް ހުޅުވާލައިފި
20 ޖުލައި 2018 | ހުކުރު 17:49އަލުން އިއުލާން ކުރީ ތަރުހީބު ކުޑަވުމުން
އިންތިހާބެއްގެ ވޯޓު ގުނުމަށް އޮފިޝަލުންތަކެއް ތައްޔާރު ވަނީ
އެކަށީގެންވާ ވަރަށް އެޕްލިކޭޝަން ފޯމު ނުލިބުމުން، ރިޔާސީ އިންތިހާބުގައި ވޯޓުލާ މަރުކަޒުތަކުގައި މަސައްކަތް ކުރާނެ އޮފިޝަލުން ހޯދުމަށް އިލެކްޝަންސް ކޮމިޝަން (އީސީ) އިން އަނެއްކާ ވެސް އިއުލާންކޮށްފިއެވެ.
މިދިޔަ މަހުގެ 29 ވަނަ ދުވަހު އޮފިޝަލުން ހޯދުމަށް ކުރި އިއުލާނަށް ލިބުނު ތަރުހީބު ކުޑަވުމުން، އެ ކޮމިޝަނުން ބުރާސްފަތި ދުވަހު ގެޒެޓުގައި އިއުލާންކޮށްފައި ވަނީ އަންނަ ބުދަ ދުވަހުގެ ކުރިން، އޮފިޝަލަކަށްވުމަށް އެދި ފޯމު ހުށަހެޅުމަށް އެދޭ ކަމަށެވެ. އޮފިޝަލަކަށްވުމަށް އެދި ހުށަހަޅާ ފޯމު، ރަށު ކައުންސިލްތަކާއި އެ ކޮމިޝަންގެ އިދާރާއިންނާއި އެ ކޮމިޝަންގެ ވެބްސައިޓުން ލިބެން ހުންނާނެ ކަމަށް އިލެކްޝަންސް ކޮމިޝަނުން ބުންޏެވެ.
އޮފިޝަލަކަށްވުމުގެ ޝަރުތަކަކީ އުމުރުން 18 އަހަރަ ފުރިފައިވުމާއި އެއްވެސް ސިޔާސީ ޕާޓީއެއްގެ މެމްބަރަކު ކަމުގައި ނުވުމާއި ކެންޑިޑޭޓެއްގެ ކެމްޕޭން ހަރަކާތްތަކުގައި އަމަލީ ގޮތުން ބައިވެރިވާ މީހަކު ކަމުގައި ނުވުމާއި އޮފިޝަލެއްގެ މަސައްކަތް ކުރެވޭނެ ތައުލީމާއި ތަޖުރިބާ ހުރުމުގެ އިތުރުން ޖިނާއީ ކުށެއްގެ ހުކުމް ތަންފީޒު ކުރަމުންދާ މީހަކު ކަމުގައި ނުވުމެވެ.
އެކަމަށް އެދި ފޯމު ހުށަހަޅާ މީހުން، އިންތިހާބަށް ހާއްސަކޮށްގެން ހިންގާ ތަމްރީނު ޕްރޮގްރާމެއް ފުރިހަމަކުރަންޖެހޭނެއެވެ. އެ ތަމްރީނު ޕްރޮގްރާމް އޮންނާނީ އަންނަ ސެޕްޓެމްބަރުމަހުގެ ތެރޭގައެވެ.
އަންނަ ސެޕްޓެމްބަރުގެ 23 ވަނަ ދުވަހު ބާއްވާ ރިޔާސީ އިންތިހާބުގައި ވޯޓުލުމުގެ ހައްގު ލިބިގެން ވަނީ 262،141 (ދެ ލައްކަ ފަސްދޮޅަސް ދެހާސް، އެއްސަތޭކަ ސާޅީސް އެކެއް) މީހުންނަށެވެ. ރަށްވެހިވެފައިވާ ތަން ނޫން އެހެން ތަނެއްގައި ވޯޓުލުމަށް ރަޖިސްޓަރީވުމަށް އަންނަ މަހުގެ 11 ވަނަ ދުވަހާ ހަަމައަށް ވަނީ ހުޅުވާލާފައެވެ.
ރިޔާސީ އިންތިހާބަށް ކެންޑިޑޭޓުންނަށް ފުރުސަތު ހުޅުވާލާނީ އަންނަ ހޯމަ ދުވަހުއެވެ. ހޯމަ ދުވަހުން ފެށިގެން އަންނަ މަހުގެ ހަތަރު ވަނަ ދުވަހާ ހަމައަށް އިންތިހާބަށް ކުރިމަތިލެވޭނެއެވެ.
ރިޔާސީ އިންތިހާބަށް ކުރިމަތިލުމަށް ފޯމު ހުށަހަޅާ ދުވަހުން ފެށިގެން، ދެ ދުވަހުގެ ތެރޭގައި ކެންޑިޑެންސީ ފޯމު ބަލައިގަތުމާމެދު އީސީން ގޮތެއް ނިންމަންޖެހޭނެ ކަމަށް އިންތިހާބުތަކާ ބެހޭ އާންމު ގާނޫނުގައި ބުނެފައިވެއެވެ.
