ހައިރައިޒް ކުންފުންޏާއި މަޓާޓޯ ގުޅިގެން ދިވެހިރާއްޖޭގެ އިގްތިސާދީ އެކި ދާއިރާތައް އިސްތިހާރުކުރުމަށް އިއުލާނުކޮށްފައިވާ ބައިނަލްއަގުވާމީ އިވެންޓް "މޯލްޑިވްސް ޝޯކޭސް"ގެ މެއިން ސްޕޮންސަރއަކަށް އެލައިޑް އިންޝުއަރެންސް ކުންފުނި ހަމަޖައްސައިފިއެވެ.

"މޯލްޑިވްސް ޝޯކޭސް" މި ޖުލައި މަހުގެ 26 އާއި 27 ވަނަ ދުވަހު، ސްރީލަންކާގެ ކޮލޮމްބޯގައި ހުންނަ ތާޖު ސަމުދްރާ ހޮޓެލްގައި ބޭއްވުމަށް ވަނީ ނިންމާފައެވެ.

ހައިރައިޒް ކުންފުނީގެ ފަރާތުން ބުނީ މި އިވެންޓަށް ހިލޭ ވަނުމުގެ ފުރުސަތު ހުޅުވާލާފައިވާ ކަމަށާއި ސްރީލަންކާގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ދައުވަތު އަރުވާފައިވާ ކަމަށެވެ. މީގެ އިތުރުން އަތްތެރި މަސައްކަތް ކުރާ ފަރާތްތަކާއި ޓްރެވަލް އޭޖެންޓުންނާއި ގެސްޓް ހައުސްތަކުގެ އިތުރުން ރިސޯޓުތައް ވެސް ބައިވެރިވެފައިވާ ކަމަށް އެ ކުންފުނިން ބުންޏެވެ.

އެ އިވެންޓަށް ޒިޔާރަތްކުރާ ފަރާތްތަކުގެ މެދުގައި ނެގޭ ލަކީޑްރޯއިން ރާއްޖޭގައި ޗުއްޓީ ހޭދަކުރުމުގެ ފުރުސަތު ވަނީ ހުޅުވާލާފައެވެ.

މި އިވެންޓްގެ މެއިން ސްޕޮންސަރއަކަށް އެލައިޑް ހަމަޖައްސާފައިވާއިރު އޮފިޝަލް ޓްރެވަލް ޕާޓްނަރަކީ ސްރީލަންކަން އެއަރލައިންސްއެވެ.

ހައިރައިޒް ކުންފުނިން އިތުރަށް ބުނީ މި އިވެންޓްގައި ބައިވެރިވާން އެދޭ ފަރާތްތަކަށް އެ ފުރުސަތު މިހާރު ވެސް ހުޅުވާލާފައިވާ ކަމަށާއި ޝައުގުވެރިވާ ވިޔަފާރިތަކާއި ފަރާތްތަކުން 7980088 ނަންބަރަށް ގުޅައި، ނުވަތަ [email protected] އަށް އީމެއިލް ކޮށްގެން މައުލޫމާތު ސާފުކުރުމަށް ހައިރައިޒުން ވަނީ އެދިފައެވެ.