ކުންފުނިތަކުގެ މުވައްޒަފުން ވަކި ތަނަކަށް ވޯޓުލާން އަންގަމުންދާ ކަމުގެ ތުހްމަތުތަކެއް!
19 ޖުލައި 2018 | ބުރާސްފަތި 12:17ވޯޓު ކަރުދާހުގައި އިތުރު ފާހަގައެއް ޖެހުމަށް ވެސް އަންގަމުންދާ ކަމަށްވޭ
އިބްރާހިމް ނާސިރު އިންޓަރނޭޝަނަލް އެއާޕޯޓުގެ ބައެއް މުވައްޒަފުން މަަސައްކަތުގައި: ސަރުކާރު ކުންފުނިތަކުގައި މުވައްޒަފުން ވަކި ތަނެއްގައި ވޯޓުލާން އަންގަމުންދާކަމުގެ ޝަކުވާތަކެއް ވަނީ ފެންމަތިވެފައި
ސަރުކާރުގެ ކުންފުނިތަކުގައި މަސައްކަތްކުރާ މުވައްޒަފުން އެ މަސައްކަތްކުރާ ތަނެއްގައި ވޯޓު ލުމަށް ރަޖިސްޓްރީ ކުރަން އަންގަމުންދާ ކަމުގެ މައުލޫމާތު ލިބިފައިވާ ކަމަށް އިދިކޮޅު ކޯލިޝަނުން ބުނެފިއެވެ.
އިދިކޮޅު ކޯލިޝަނުން މިއަހަރުގެ ރިޔާސީ އިންތިހާބަށް ނެރޭ ކެންޑިޑޭޓް، އިބްރާހިމް މުހައްމަދު ސޯލިހްގެ ތަރުޖަމާނު މާރިޔާ އަހްމަދު ދީދީ ނޫސްވެރިންނާ ބައްދަލު ކުރައްވައި ބުރާސްފަތި ދުވަހު ވިދާޅުވީ ވަކި ތަނެއްގައި ވޯޓުލުމަށް ސަރުކާރުގެ ކުންފުނިތަކުގެ މުވައްޒަފުންނަށް އަންގަމުންދާ ކަމުގެ ޝަކުވާތައް އެކި ފަރާތްތަކުން ލިބެމުންދާ ކަމަށެވެ.
އެ ގޮތުން ކޫއްޑޫގައި މަސައްކަތްކުރާ މީހުން ވޯޓުލާން ޖެހެނީ ކޫއްޑޫގައި ވޯޓުލުމަށް އަންގާފައިވާ ކަމަށް ބައެއް މީހުންގެ ފަރާތުން މައުލޫމާތު ލިބިފައިވާ ކަމަށް މާރިޔާ ވިދާޅުވިއެވެ.
ވަކި ތަނެއްގައި ވޯޓުލުމަށް ސަރުކާރުގެ ކުންފުނިތަކުގެ މުވައްޒަފުންނަށް އަންގަމުންދާއިރު ވޯޓު ކަރުދާހުގައި ފާހަގައިގެ އިތުރުން ވޯޓު ކަރުދާހުގައި ވަކި ފާހަގައެއް ޖެހުމަށް އަންގަމުންދާކަމުގެ މައުލޫމާތު ލިބެމުންދާ ކަމަށް ވެސް މާރިޔާ ވިދާޅުވި ކުރެއްވިއެވެ.
"ވަކި ތަނެއްގައި ރަޖިސްޓްރީ ވުމަށް އެންގުމަށް ފަހު ދެން މިއަޑު އިވެނީ އެބޭފުޅުން ދެއްވާނަމޭ ހަނދުފަޅިއެއް ނުވަތަ އެހެން އެއްޗެއް ވޯޓު ކަރުދާސްކޮޅުގައި ޖަހަން ފާހަގައިގެ އިތުރުން. އެއީ އަޅުގަނޑުމެން ކަންބޮޑުވާ ކަމެއް،" މާރިޔާ ވިދާޅުވިއެވެ.
ވޯޓު ކަރުދާސްކޮޅުގައި ފާހަގައިގެ އިތުރުން ލިޔެފި ނަމަ މީގެ ކުރިން އެ ވޯޓެއް ބާތިލުވާ ގޮތަށް އޮތް އޮތުން ގާނޫނަށް އިސްލާހު ގެނެސްގެން ސަރުކާރުން ވަނީ ބަދަލުކޮށްފައެވެ. ލޯކަލް ކައުންސިލް އިންތިހާބާ ދިމާކޮށް ވެސް ސަރުކާރުން އެ އިސްލާހު ހުށަހެޅި ނަމަވެސް ފަހުން އެ އިސްލާހު ފާސްކޮށްފައެއް ނުވެއެވެ، ނަމަވެސް ރިޔާސީ އިންތިހާބާ ދިމާކޮށް ދާދި ފަހުން ގާނޫނަށް ގެނައި އިސްލާހުގައި ކަރުދާސްކޮޅުގައި ފާހަގައިގެ އިތުރުން ލިޔުމަށް ފުރުސަތު ވަނީ ދީފައެވެ. މިއީ ވޯޓުގެ ސިއްރުކަން ގެއްލޭ ބަދަލެއް ކަމަށް އިދިކޮޅު ފަރާތްތަކުން ގެންދަނީ ބުނަމުންނެވެ.
ސަރުކާރުގެ ވަޒީފާތަކުގައި މަސައްކަތްކުރާ މުވައްޒަފުނަށް މަޖުބޫރުކޮށްގެން ރައީސް ޔާމިންގެ ކެމްޕެއިނަށް ނިކުންނަން މަޖުބޫރުކުރާކަމުގެ ވާހަކަތައް ވެސް އިވޭ ކަމަށެވެ. އެކަމާ މެދު ވެސް ކަންބޮޑުވުންތައް ހުރިކަން މާރިޔާ ވިދާޅުވިއެވެ.
މީގެ އިތުރުން މާރިޔާ ވަނީ ރައީސް އަބްދުﷲ ޔާމިން ރިޔާސީ އިންތިހާބާ ދިމާކޮށް ވެވަޑައިގަންނަވާ ވައުދުތަކާ މެދު ރައްޔިތުން ވިސްނައިގެން ތިބުމަށް ގޮވާލައްވާފައެވެ. އެ ގޮތުން ރައީސް ޔާމިން މީގެ ކުރިން ވެވަޑައިގެންނެވި އެއްވެސް ވައުދެއް ނުފުއްދަވާކަން ރައްޔިތުން ހަނދާންކުރަން ޖެހޭ ކަމަށް ވެސް މާރިޔާ ފާހަގަ ކުރެއްވިއެވެ.
