ޑީޖޭއޭގެ ކުރީގެ އެޑްމިނިސްޓްރޭޓަރ ސައީދުގެ ޝަރީއަތުގެ އަޑުއެހުމެއް މިއަދު
19 ޖުލައި 2018 | ބުރާސްފަތި 06:52ހަސަން ސައީދު ހުންނެވީ ޝަރީއަތް ނިމެންދެން ޖަލުގައި ބަންދުކޮށްފައި
ޑީޖޭއޭގެ ކުރީގެ އެޑްމިނިސްޓްރޭޓަރ ހަސަން ސައީދު
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ގެ ކުރީގެ ޖުޑީޝަލް އެޑްމިނިސްޓްރޭޓަރު ހަސަން ސައީދު ހުސައިންގެ މައްޗަށް އުފުލާފައިވާ ގާނޫނު ހިންގަން ހުރަސްއެޅުމުގެ ދައުވާގެ އަޑުއެހުމެއް ބުރާސްފަތި ދުވަހު ބޭއްވުމަށް ތާވަލް ކޮށްފި އެވެ.
ކްރިމިނަލް ކޯޓުގައި ބުރާސްފަތި ދުވަހު ބާއްވާ ހަސަން ސައީދުގެ އަޑުއެހުން ބޭއްވުމަށް ތާވަލް ކޮށްފައި ވަނީ 15:00 އަށެވެ.
ކްރިމިނަލް ކޯޓުން މީގެކުރިން ބުނެފައިވަނީ ހަސަން ސައީދުގެ ޝަރީއަތް ކުރިިއަށް ގެންދަން ނިންމާފައި ވަނީ ސިއްރުކޮށްގެން ކަމަށާއި އެ އަޑުއެހުމަށް އާންމުންނަށާއި މީޑިއާތަކަށް ވެސް ނުވަދެވޭނެ ކަމަށެވެ.
ހަސަން ސައީދު ހައްޔަރު ކުރީ ސުޕްރީމް ކޯޓުގެ ފަނޑިޔާރުންނަށް ރިޝްވަތު ދިން ކަމަށް ކުރާ ތުހްމަތު މައްސަލައެއްގައެވެ. ގާނޫނު ހިންގަން ހުރަސްއެޅުމުގެ ދައުވާ އޭނާގެ މައްޗަށް އުފުލާފައި ވަނީ އޭނާ ހައްޔަރު ކުރުމަށް ފުލުހުން މަސައްކަތްކުރި އިރު ފުލުހުންނަށް ފިލައިގެން އުޅުނު ކަމަށް ބުނެއެވެ.
ފެބްރުއަރީ އެކެއްގެ ސުޕްރީމް ކޯޓުގެ އަމުރާ ގުޅިގެން، ސަރުކާރުން 5 ފެބްރުއަރީގައި ކުއްލި ނުރައްކަލުގެ ހާލަތު އިއުލާން ކުރުމަށް ފަހު، އެންމެ ފުރަތަމަ ހައްޔަރުކުރި ބޭފުޅުންގެ ތެރޭގައި ހަސަން ސައީދު ހިމެނެ އެވެ. ނަމަވެސް ޑީޖޭއޭގައި އޭނާ އަދާކުރަމުންދިޔަ ޖުޑީޝަލް އެޑްމިނިސްޓްރޭޓަރ ގެ މަގާމުން އޭނާ ވަކިކޮށްފައިވަނީ މި ޖުލައި މަހުގެ 10 ވަނަ ދުވަހު އެވެ.
ހަސަން ސައީދުގެ މައްޗަށް ވަނީ ސުޕްރީމް ކޯޓުގެ ފަނޑިޔާރުނަށް ރިޝްވަތު ދިނުމުގެ ތުހުމަތުކޮށް ކިތާބީ ހެކި ވެސް ހުރި ކަމަށް ފުލުހުން ބުނެފައެވެ. މިދިއަ ފެބްރުއަރީ މަހު ފުލުހުން ވަނީ ހަސަން ސައީދު ދިރިއުޅުއްވާ އެޕާޓްމަންޓް ބަލައި ފާސްކޮށްފައެވެ. ހަސަން ސައީދުގެ ގެ ބަލައި ފާސްކުރި އިރު ހަސަން ސައީދުގެ އެނދުގެ ގޮދަޑި ދަށުން ގިނަ އަދަދެއްގެ ފައިސާ ފެނިފައިވާ ކަމަށް ވެސް ފުލުހުން ބުނެފައި ވެއެވެ.
