އަލަށް ގެނެވުނު ބަދަލާއެކު 40 އަށް ވުރެ ގިނަ ރިސޯޓުގައި ވޯޓު ފޮށި ބެހެއްޓޭނެ: އީސީ
2013 ވަނަ އަހަރުގެ ރިޔާސީ އިންތިހާބުގައި ރިސޯޓުތަކުގައި 40 ވޯޓު ފޮށި ބަހައްޓާފައިވޭ
އިލެކްޝަންސް ކޮމިޝަނުގެ ޕްރެސް ކޮންފަރެންސް
ރިސޯޓެއްގައި މަސައްކަތް ކުރާ 100 ދިވެހި މުވައްޒަފުން އުޅޭ ނަމަ ވޯޓު ފޮށި ބަހައްޓަން ނިންމި ނިންމުމުން 40 އަށް ވުރެ ގިނަ ރިސޯޓުގައި ވޯޓު ފޮށި ބެހެއްޓޭނެ ކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަނުގެ މެންބަރު އަހުމަދު އަކްރަމު ވިދާޅުވީ، ރިސޯޓުތަކުގައި ވޯޓު ފޮށި އިތުރު ކުރުމަށް ނިންމީ، ރިސޯޓުތަކުގައި މަސައްކަތް ކުރާ ފަރާތްތަކާއި ރިސޯޓުތަކުގެ މެނޭޖްމެންޓުން އެކަމާ ގުޅޭ ގޮތުން ކަންބޮޑުވުންތައް ފާޅު ކުރުމުން ކަމަށެވެ. އަދި ކުރިން ވޯޓުލުމުގައި ރިސޯޓުތަކުން ދިމާވި ދަތިތައް ދިމާނުވެ. އިންތިހާބުގެ ކަންކަން ކުރިއަށް ގެންދިއުމުގައި އިލެކްޝަންސް ކޮމިޝަނަށް ފުރިހަމަ އެއްބާރުލުން ދޭނެ ކަމުގެ ޔަގީންކަން ރިސޯޓުތަކުން ދީފައިވާ ކަމަށެވެ.
އަލަށް ގެނެވުނު ބަދަލާއެކު ވޯޓުފޮށި ބެހެއްޓޭނީ ކިތައް ރިސޯޓުގައިކަން ޔަގީން ކުރެވޭނީ ރީރަޖިސްޓްރޭޝަންގެ މުއްދަތަށް ފަހުގައި ކަމަށާއި އެހެން ނަމަވެސް ވޯޓު ފޮށި ބެހެއްޓޭ އަދަދު 40 އަށް ވުރެ އިތުރުވާނެ ކަމަށް ބެލެވޭ ކަމަށެވެ. މިބަދަލާއެކު ވޯޓުލާ ސަރަހައްދުގައި ހަރަކާތްތެރިވާ އޮފިޝަލުންވެސް އިތުރުވެގެންދާނެ ކަމަށް އެ ކޮމިޝަނުންބުނެއެވެ.
އިންތިހާބުގައި ހަރަކާތްތެރިވާ އޮފިޝަލުންނަށް ކުރިމަތިލުމުގެ މުއްދަތު ހަމަވާނީ ބުރާސްފަތި ދުވަހުގެ މެންދުރު ފަހު 03:00 އަށް ކަމަށް އެކޮމިޝަނުން ބުނެއެވެ.
މީގެ ކުރިން ރިސޯޓުތަކުގައި ބެހެއްޓުމަށް ހަމަޖެހިފައިވަނީ ހަތް ފޮއްޓެކެވެ. މިގޮތުން އޭރު ބެލި މިންގަޑަކީ ރިސޯޓުތަކުގެ ތެރެއިން ވޯޓު ފޮށި ބަހައްޓާނީ އެ މީހަކު ރަށްވެހި ވެފައިވާ ރަށް ނޫން ރަށެއްގައި ވޯޓުލުމަށްޓަކައި ރަޖިސްޓްރީވުމަށް އިލެކްޝަންސް ކޮމިޝަނުން ހުޅުވާލާ މުއްދަތުގައި މަދުވެގެން 250 މީހުން ރަޖިސްޓަރީވެފައިވާ ރިސޯޓްތަކުގައި ކަމުގައެވެ. އެ އަދަދަށް މީހުން ހަމަނުވާ ކަމުގައިވާނަމަ ރިސޯޓުތަކުގައި ވޯޓު ފޮށި ނުބެހެއްޓޭނެ ކަމަށް އެ ކޮމިޝަނުން ވަނީ ބުނެފައެވެ.
އިލެކްޝަންސް ކޮމިޝަނުން ހާމަކޮށްފައިވާ ގޮތުގައި ރިޔާސީ އިންތިހާބުގައި އެކި ސަރަހައްދު ތަކުގައި މިހާރު ބެހެއްޓުމަށް ކަނޑައަޅާފައިވަނީ 452 ވޯޓް ފޮއްޓެވެ. މާލޭގެ ރަށްވެހިން ވޯޓްލުމަށް ޖުމްލަ 56 ފޮށި ބަހައްޓާއިރު، މާލޭގައި ދިރިއުޅޭ އަތޮޅުތަކުގެ ރައްޔިތުންނަށް ހާއްސަކޮށް 72 ފޮށި ބަހައްޓާނެ އެވެ. އައްޑޫ ސިޓީގައި 31 ވޯޓު ފޮށި ބެހެއްޓުމަށް ވަނީ ހަމަޖެހިފައެވެ.
