ބޮޑުވަޒީރަކަށް ރައީސް ޔާމީން ގެނެސް، ދިގު ދައުރަކަށް ބެހެއްޓިދާނެ: ނިހާން
ގާނޫނުއަސާސީ އަނެއްކާވެސް އިސްލާހު ކުރާ ވާހަކަ ވިދާޅުވި
ޕީޕީއެމް ރުމާލު 2 ޖަގަހައިގައި ބޭއްވި ރަސްމިއްޔާތުގައި ނިހާން ވާހަކަފުޅު ދައްކަވަނީ
ގާނޫނުއަސާސީއަށް އިސްލާހު ގެނެސްގެން ބޮޑުވަޒީރުގެ މަގާމު އުފެއްދުމަށްފަހު އެ މަގާމުގައި ރައީސް އަބްދުﷲ ޔާމީން ބެހެއްޓެވިދާނެ ކަމަށް ޕީޕީއެމް ޕާލަމެންޓްރީ ގްރޫޕް ލީޑަރު އަހުމަދު ނިހާން ހުސައިން މަނިކު ވިދާޅުވެއްޖެއެވެ.
ނިހާން ވިދާޅުވީ ވެރިކަމުގައި އިތުރު 30 އަހަރަށް ރައީސް ޔާމީން ބަހައްޓަންޖެހޭ ކަމަށް ޝަހީމް ދެއްކެވި ވާހަކަފުޅަށް ތާއިދު ކުރައްވައި، "ރުމާލު 2" ޖަގަހައިގައި ވާހަކަފުޅު ދައްކަވަމުންނެވެ. ހުވަދޫ ބަހުރުވައިން ވާހަކަ ދައްކަވަމުން ނިހާން ވިދާޅުވީ ގާނޫނުއަސާސީއަށް އިސްލާހު ގެނެސްގެން ރައީސްކަމުގެ މަގާމުގައި ވެސް ދިގު ދައުރަކަށް ރައީސް ޔާމީން ބެހެއްެވިދާނެ ކަމަށެވެ.
"އަހަރުމެންނަށް އެބަ އޮތް އެކަން ވަރަށް ފަސޭހައިން ކުރެވެން. ގާނޫނުއަސާސީގައި ރައީސުލްޖުމްހޫރިއްޔާގެ ދައުރަކީ ފަސް އަހަރުގެ ދެ ދައުރުކަމަށް ބުނެފަިއ އެބަ އޮތް. ބޮޑު ވަޒީރުގެ ދައުރުގެ ވާހަކައެއް ނެތް ކަނޑައަޅާފައެއް. ހަމަ ކުޑަކުޑަ ބަދަލެއް ގެނެސްގެން ރައީސް ކަމުގައި ވެސް، އަދި ބޮޑު ވަޒީރުކަމުގެ މަގާމުގައި ވެސް ބޭންދިދާނެ،" ހުވަދޫ ބަހުރުވައިން ވާހަކަ ދައްކަމުން ނިހާން ވިދާޅުވި އެވެ.
ރުމާލު 2 ޖަހަގައިގައި ބޭއްވި ރަސްމިއްޔާތުގައި ނިހާން ވާހަކަފުޅު ދައްކަވަނީ-- ފޮޓޯ/ރާއްޖެއެމްވީ
ހުވަދޫ މީހުންނާ ބައްދަލު ކުރުމަށް ރުމާލު ދޭން ޖަގަހައިގައި ބޭއްވި ޖަލްސާގައި ވާހަކަފުޅު ދައްކަވަމުން ޝަހީމް ވިދާޅުވީ ކުރިއަށް އޮތް 30 އަހަރު ވެސް ރާއްޖޭގެ ރައީސުލްޖުމްހޫރިއްޔާގެ މަގާމުގައި ރައީސް ޔާމީން ބަހައްޓަންޖެހެނީ ރާއްޖެއަށް ގެނެސްދެމުންދާ ތަރައްގީއާ ގުޅިގެން ކަމަށެވެ. ކުރިއަށް އޮތް ރިޔާސީ އިންްތިހާބު ކާމިޔާބު ކުރެއްވުމަށްފަހު، އިތުރު ދައުރަކަށް އެމަނިކުފާނު ނުކުންނެވުމަށް އެދި، ރައީސް ޔާމީންގެ އަރިހުގައި އާދޭސް ކުރައްވާނެ ކަމަށް ވެސް ޝަހީމް ވިދާޅުވިއެވެ.
"ރައީސް ޔާމީން ވެރިކަމުގައި ބަހައްޓަންވީ އަންނަ ދައުރުގައި އެކަންޏެއް ނޫން. އަދި 30 އަހަރު ރާއްޖޭގެ ވެރިކަމުގައި ރައީސް ޔާމިން ބަހައްޓަންޖެހޭ. އަޅުގަނޑު ދުނިޔޭގައި ހުރިއްޔާ އެކަން ކުރާނަން. ފައިގައި ހިފައި އާދޭސްކޮށްގެން އިތުރު ދައުރަކަށް ވެރިކަމުގައި ހުންނަން އާދޭސް ވެސް ކުރާނަން. އިސްލާމް ދީނަށް ނަސްރުދޭހާ ހިނދަކު ރައީސް ޔާމިނާ އެކު، ގާތު އަހަރުން ތިބޭނަން އިރާދަ ކުރެއްވިއްޔާ،" ގއ. މާމެންދޫ އަށް އުފަން ޝަހީމް، ހުވަދޫ ބަހުރުވައިން ވާހަކަ ދައްކަވަމުން ވިދާޅުވި އެވެ.
ބޮޑު ވަޒީރުގެ މަގާމަށް ރައީސް ޔާމީން ގެނައުމުގެ ހިޔާލު، ނިހާން ފާޅު ކުރެއްވިއިރު، ބޮޑުވަޒީރުގެ މަގާމަކީ ބަރުލަމާނީ ސިފައެކެވެ. ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރަންޖެހޭ ކަމަށް ކުރީގެ ރައީސް މުހައްމަދު ނަޝީދު މިދިޔަ މެއި މަހު ވަނީ ވިދާޅުވެފައެވެ. ނަމަވެސް ވެރިކަން ކުރާ ޕާޓީން ވަނީ ރައީސް ނަޝީދުގެ އެ ވާހަކަފުޅަށް ވަރަށް ބޮޑަށް ފާޑުވިދާޅުވެފައެވެ.
