ޕާޓީތަކުގެ ލީޑަރުން ޖަލުގައި ތިއްބަވަން ޖެހެނީ ކުށެއް ކުރައްވައިގެން ނޫން ކަމަށާއި އެބޭފުޅުން ޖަލުގައި ތިއްބަވަން ޖެހެނީ ރައީސް އަބްދުﷲ ޔާމީނަން ބިރަކަށް ވުމުން ކަމަށް އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް ތަރުޖަމާނު މާރިޔާ އަހްމަދު ދީދީ ވިދާޅުވެއްޖެ އެވެ.
ސޯލްޓު ކެފޭގައި ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މާރިޔާ ވިދާޅުވީ ރާއްޖޭގެ ސިޔާސީ މަސްރަހުގައި ދިމާވެފައިވާ މައްސަލަތައް ހައްލުކުރުމަށް ސަރުކާރާއި އެކު މަޝްވަރާއަށް ވަޑައިގަންނަވާނީ، ޕާޓީތަކުގެ ލީޑަރުންގެ ބައިވެރިވުމާއި އެކުގައި ކަމަށާއި އެ ސްޑޭންޑް އަދިވެސް ބަދަލުނުކުރައްވާ ކަމަށެވެ. އަދި ޕާޓީތަކުގެ ލީޑަރުން ޖަލުގައި ބައިތިއްބައިގެން ޕާޓީތަކާއި ދައްކަވާނެ ވާހަކައެއް ނޯންނާނެ ކަމަށް ވެސް މާރިޔާ ވިދާޅުވިއެވެ.
މާރިޔާ މިހެން ވިދާޅުވީ ހއ. ހދ އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި ބުރާސްފަތި ދުވަހު ހއ. ދިއްދޫއަށް ވަޑައިގެން ވާހަކަފުޅު ދައްކަވަމުން މިހާތަނަށް 12 ފަހަރު މަޝްވަރާއަށް އައުމަށް އިދިކޮޅު ފަރާތްތަކަށް ހުށަހަޅާފައި ވީނަމަވެސް އެފަރާތްތަކަށް މަޝްވަރާގެ މޭޒުދޮށައް އަންނަން ނުކެރުނު ކަމަށް ވިދާޅުވުމުންނެވެ. މަޝްވަރާއަށް އައުމުގެ ބަދަލުގައި އިދިކޮޅު ފަރާތްތަކުން ބަހަނާ ދައްކަމުންދާ ކަމަށާއި އެގޮތުން އެކި ކުށްކުށުގައި ތިބި ކުށްވެރިން މިނިވަން ކުރުމަށް އެދެމުންދާ ކަމަށް ރައީސް ޔާމީން ވިދާޅުވިއެވެ. ނަމަވެސް އެއީ އެމަނިކުފާނަށް ކުރެވޭނެ ކަމެއް ނޫން ކަމަށް ވެސް ރައީސް ޔާމީން ވިދާޅުވިއެވެ.
އެ ކަމަށް އިޝާރަތް ކުރައްވާ މާރިޔާ ވިދާޅުވީ ޕާޓީތަކުގެ ލީޑަރުން ޖަލުގައި ތިއްބަވަން ޖެހެވަޑައިގަންވަނީ ރައީސް ޔާމީންނަން އެބޭފުޅުންނަކީ ބިރަކަށް ވުމުން ކަމަށެވެ. ރައީސް ޔާމީން ވިދާޅުވަމުންދާ "ބޮޑަތި ކުއްވެރިން" ތަކަކީ ކުށްވެރިންކަމަށް ދިވެހި ރައްޔިތުން ގަބޫލުނުކުރައްވާކަންވެސް މާރިޔާ ފާހަގަކުރެއްވިއެވެ.
ސަރުކާރުން މަޝްވަރާތައް ބާއްވަން މިހާރު ޖެހޭނީ އިދިކޮޅު އިއްތަިހާދުގައި ހިމެނޭ އެމްޑީޕީ، ޖުމްހޫރީ ޕާޓީ އަދި އަދާލަތު ޕާޓީ އާއި ރައީސް މައުމޫނު އަބްދުލްގައްޔޫމާއެކު ކަމަށް ވެސް މާރިޔާ ވަނީ އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ވެސް ފާހަގަ ކުރައްވާފަ އެވެ. އަދި އެ މަޝްވަރާތަކުގައި ރައީސް މުހައްމަދު ނަޝީދާއި އިމްރާން އަބްދުﷲ އާއި ގާސިމް އިބްރާހިމަށް ވެސް ބައިވެރިނުވެވޭ ގޮތަށް މަޝްވަރާތައް ނުބޭއްވުމަށް އިބޫ އިލްތިމާސް ދަންނަވާ ކަމަށް މާރިޔާ ވިދާޅުވި އެވެ.
