ބޭރަށް ހިންގުން ފެތުރެނީ ސަމާލުވޭ: އެޗްޕީއޭ
މި ދުވަސްވަރު ރޯގާ ދަނީ ބޮޑަށް ފެތުރެމުން،
ބަލިޖެހިއްޖެ ހާލަތެއްގައި ލަސްނުކޮށް ޑޮކްޓަރަކަށް ދެއްކުމަށް އެ އެޖެންސީން އިލްތިމާސްކުރޭ
ބޭރަށް ހިންގުން ފެތުރޭތީ ސަމާލުވުމަށް ހެލްތް ޕްރޮޓެކްޝަން އެޖެންސީ އެޗްޕީއޭއިން އިލްތިމާސް ކޮށްފިއެވެ.
އެޗްޕީއޭ އިން އަންގާރަ ދުވަހު ނެރުނު ބަަޔާނެއްގައި ބުނެފައި ވަނީ، ކޮންމެ އަހަރަކު ވެސް މިދުވަސްވަރު ބޭރަށް ހިންގުމާއި ހޮޑުލުުން އިތުރުވާ ފަދައިން މިއަހަރު ވެސް އިތުރު ވެފައިވާ ކަމަށެވެ. އަދި އެބަލިތައް ހާއްސަކޮށް އުޅެނީ މާލޭގައި ކަމަށް ވެސް ބަޔާނުގައި ބުނެފައިވެއެވެ.
ބޭރަށް ހިންގުމާއި ހޮޑުލުމަކީ އާންމުކޮށް ކާއެއްޗެހީގެ ޒަރިއްޔާއިން ފެތުރޭ ބައްޔެކެވެ. އަދި އޭގެ އިތުރުން ބަލިޖެހިފައިވާ މީހެއްގެ ފަރާތުން ވެސް އެބަލި ޖެހިދާނެއެވެ.
އެޗްޕީއޭ އިން ނެރެފައިވާ ބަޔާނުގައި އެބަލިތަކާ ދުރުވުމަށް ގިނަ ކަންތައްތަކެއް ފާހަގަ ކޮށްފައިވެއެވެ. އެގޮތުން ރައްކާތެރި ބޯފެން ބުއިމާއި، ފާހާނާ ކުރުމަށް ފަހު ނުވަތަ ބޭރުން ގެއަށް އައިސް، ސައިބޯނި ލައިގެން އަތްދޮވުން ފަދަ ކަންކަން ފާހަގަ ކޮށްފައިވެއެވެ.
އޭގެ އިތުރުން ކާބޯތަކެތީގެ ރައްކާތެރިކަމަށް ސަމާލުވެ، ކެއްކުމަށް ފަހު ގިނަ ވަގުތު ނުވަނީސް ކާތަކެތި ބޭނުން ކުރުމާއި ބާކީ ހުންނަ ކާބޯތަކެތި އަވަހަށް ފިނިކޮށް ރައްކާކުރުމާއި، ކާތަކެތީގައި މެހި ނުޖައްސާނެހެން މަތި ޖަހާފައި ބެހެއްޓުން ފަދަ ކަންކަމަށް ސަމާލުވުމަށް އެޗްޕީއޭއިން ވަނީ ގޮވާލާފައެވެ.
ބަލީގެ އަލާމާތްތަކުގެ ތެރޭގައި އާދަޔާހިލާފަށް އަނގަތެރެ ހިކި ކަރުހިއްކައި ކުޑަކަމުދާ މިންވަރު މަދުވެ މާބޮޑަށް ވަރުދެރަވެ ތުއްތުކުދިން ހުއްޓާނުލައި މާ ބޮޑަށް ރުއިމާއި، ހޮޑުލާއިރު ނުވަތަ ބޮޑުކަމުދާއިރު ލޭހުރުން ފަދަ ކަންކަން ހިމެނެއެވެ.
މި ބަލި ޖެހިއްޖެ ހާލަތެއްގައި ލަސްނުކޮށް ޑޮކްޓަރަކަށް ދެއްކުމަށް އެ އެޖެންސީން އިލްތިމާސްކުރެއެވެ.
