އީޔޫގެ ބަޔާނުގެ މޫނުމަތި ރީތި ކުރަންއުޅުނަސް މުހިއްމުކަން ކުޑައެއް ނުކުރެވޭނެ: ޣަފޫރޫ
މިނިވަން އިންސާފުވެރި އިންތިޚާބެއް ބޭއްވުމަށް ގޮވާލާ ގޮވާލުމުގެ މުހިއްމުކަން ކުޑަ ނުކުރެވޭނެ
ޔޫރަޕިއަން ޕާލިމަންޓް
މި ސަރުކާރުން ކިތަންމެ ވަރަކަށް އީޔޫގެ ބަޔާނުގެ މޫނުމަތި ރީތި ކުރަން އުޅުނުކަމުގައި ވިޔަސް އެންމެނަށް ބައިވެރިވެވޭ އިންތިޚާބެއް ބޭއްވުމަށް ގޮވާލާ ގޮވާލުމުގެ މުހިއްމުކަން ކުޑަ ނުކުރެވޭނެ ކަމަށް ރާއްޖެއިން އދ. އަށް ކުރިން ކަނޑައަޅުއްވާފައި ހުންނެވި ސަފީރު އަބްދުލް ޣަފޫރު މުހައްމަދު ވިދާޅުވެއްޖެއެވެ.
ދިވެހި ސަރުކާރުގެ އިސް ވެރިންނާއި ދިވެހި ބައެއް ވިޔަފާރިވެރިންނާ މެދު ޔޫރަޕިއަން ޔޫނިއަންގެ ފޮރިން އެފެއާޒް ކައުންސިލްގެ ހޯމަ ދުވަހުގެ ބައްދަލުވުމުގައި ފިޔަވަޅު ނޭޅުމަކީ ލިބުނު ވަރަށް ބޮޑު ކާމިޔާބީއެއް ކަމަށް ސަރުކާރުގެ ފަރާތުން ބްރަސަލްސްއަށް ވަޑައިގެންނެވި ފިޝަރީޒް މިނިސްޓަރު ޑރ. މުހައްމަދު ޝައިނީ ވިދާޅުވެފައި ވަނިކޮށް ހޯމަ ދުވަހުގެ ރޭ ޤަފޫރު ކުރެއްވި ޓްވީޓްގައި ވަނީ ސަރުކާރުން "އީޔޫގެ ބަޔާނުގައި ކިތަންމެ ވަރަކަށް ލިޕްސްޓިކް ޖެއްސިކަމުގައި ވިޔަސް މިނިވަން އިންސާފުވެރި އެންމެނަށް ބައިވެރިވެވޭ އިންތިޚާބެއް ބޭއްވުމަށް ގޮވާލާ ގޮވާލުމުގެ މުހިއްމުކަން ކުޑަ ނުކުރެވޭނެ" ކަމަށެވެ.
މިނިސްޓަރު ޝައިނީ އިތުރަށް ވިދާޅުވެފައި ވަނީ ރާއްޖޭގެ އިސް ވެރިންނަށް ފިޔަވަޅު ނޭޅުމަކީ އިދިކޮޅު ފަރާތްތަކުން ވާހަކަ ދައްކާ މިންވަރަށް ރާއްޖޭގެ ހާލަތު ގޯސް ނޫން ކަމަށް ގަބޫލުކުރުން ކަމަށާއި ފިޔަވަޅު އަޅާނެ ވެރިންގެ ލިސްޓު އާއްމުކޮށް އަދި ފިޔަވަޅު އަޅާފައި ނުވަނީ ސަރުކާރުން ކުރި މަސައްކަތުން ކަމަށެވެ.
އީޔޫ ކައުންސިލުން ހޯމަ ދުވަހު ބުނީ އީޔޫ އިން ކަނޑައަޅާ މުއްދަތުތަކުގެ ތެރޭގައި ރާއްޖެ އިން ރަނގަޅު ކުރަން ޖެހޭ ކަންކަން ނުކުރާ ނަމަ، އެކި ގައުމުތަކުގައި ހުރި، ރާއްޖޭގެ ވެރިންގެ މުދާތައް ހިފަހައްޓައި، ޔޫރަޕްގެ އެކި ގައުމުތަކަށް ދަތުރުކުރުން މަނާކުރުން ފަދަ ފިޔަވަޅުތައް އަޅާނެ ކަމަށެވެ. އީޔޫ ކައުންސިލުން ދިވެހި ސަރުކާރަށް ހޯމަ ދުވަހު ގޮވައިލީ ސިޔާސީ އިދިކޮޅު ލީޑަރުން ބައިވެރިވެވޭ ގޮތަށް މަޝްވަރާތައް ފެށުމަށާއި ދެ ފުށް ފެންނަ، ހުރިހާ ފަރާތްތަކަށް ބައިވެރިވެވޭ މިނިވަން އިންސާފުވެރި ރިޔާސީ އިންތިހާބެއް ރާއްޖޭގައި ބޭއްވުމަށެވެ.
