ރައްޔިތުންގެ މަޖިލީހުގެ ޖަލްސާއެއް ހޯމަ ދުވަހު (މިއަދު) ބޭއްވުމަށް ނިންމުމަށް ފަހު، ކެންސަލްކޮށްފިއެވެ.

ރައްޔިތުންގެ މަޖިލީހުން މިދިޔަ ހަފްތާގެ އަންގާރަ ދުވަހު ބޭއްވި ޖަލްސާ ނިންމާލައްވަމުން މަޖިލީހުގެ ރައީސް ކަމުގެ މަގާމުގައި ހުންނެވާ އަބްދުﷲ މަސީހު މުހައްމަދު ވަނީ ހޯމަ ދުވަހުގެ 11:00 ގައި މަޖިލީހުގެ ޖަލްސާއެއް އޮންނާނެކަން އިއުލާނުކުރައްވާފައެވެ.

މަޖިލީހުގެ ހޯމަ ދުވަހުގެ ޖަލްސާ ނުބާއްވަން ނިންމާފައިވާއިރު، ރައީސް އަބްދުﷲ ޔާމީން އަބްދުލްގައްޔޫމް ހއ. ހދ އަށް ހޯމަ ދުވަހު ކުރައްވަން ނިންމަވާފައި އޮތް ދަތުރުފުޅު ވެސް ވަނީ ފަސް ކުރައްވާފައެވެ.

ހޯމަ ދުވަހުގެ މަޖިލިސް ޖަލްސާ ނުބާއްވަން ނިންމައި، ރައީސް ޔާމީންގެ ދަތުރުފުޅު ފަސްކުރެއްވިއިރު، ޔޫރަޕިއަން ޔޫނިއަން (އީޔޫ) އިން ވަނީ ރާއްޖެއާ މެދު ފިޔަވަޅު އެޅުމަށް ހޯމަ ދުވަހުގެ ބައްދަލުވުމަށް އެޖެންޑާ ކޮށްފަ އެވެ. 

އީޔޫގެ ފޮރިން އެފެއާޒް ކައުންސިލް ބައްދަލުވުން ފަށާނީ ހޯމަ ދުވަހު ރާއްޖޭ ގަޑިން 11:00 ގައެވެ. ފޮރިން އެފެއާޒު ކައުންސިލްގެ ހޯމަ ދުވަހުގެ އެޖެންޑާގެ ނޮން ލެޖިސްލޭޓިވް ހަރަކާތްތަކުގެ އެޖެންޑާގެ ފަސް ވަނަ ނަންބަރަކަށް އޮތީ ދިވެހިރާއްޖޭގެ މައްސަލައެވެ.

ރާއްޖެއާ މެދު ފިޔަވަޅު އަޅަނީ އިންސާނީ ހައްގުތަކާއި، ގާނޫނުތައް ނެގެހެއްޓުމަށާއި، ސިޔާސީ ހައްލެއް ހޯދުމަށް ހުރަސް އަޅާ ފަރުދުންނާއި، ބައެއް ފަރާތްތަކާ މެދުއެވެ.