އަމީތު ދޫކޮށްލައިފި

މިނިވަން އިންސާފުވެރި އިންތިހާބެއް ބޭއްވުމަށާއި ސިޔާސީ ހައްޔަރީން މިނިވަން ކުރުމަށް ގޮވާލައި ގުޅިފައިވާ ސިޔާސީ ޕާޓީތަކުން ކުރިޔަށް ގެންދަން ނިންމި ހިނގާލުން ފެށުމުގެ ކުރިން ހައްޔަރުކުރި މަޑުއްވަރީ ދާއިރާގެ މެމްބަރު މުހައްމަދު އަމީތު ދޫކޮށްލައިފިއެވެ.

ފުލުހުން އަމީތު، ދޫކޮށްލުމާ އެކު އޭނާ ކުރެއްވި ޓްވީޓެއްގައި ވާގޮތުން އޭނާ ހައްޔަރުކުރީ މާލޭގެ މަގު މައްޗަށް މީހުން އެއްކޮށް މުޒާހަރާ ކުރަން މަސައްްކަތްކުރުމާ ގުޅިގެން ކަމަށް ބުނެ ކަމަށެވެ. އަމީތު ވަނީ މި ޓްވީޓްގައި ވެސް ރައީސް ޔާމީން ހައްޔަރުކުރުމަށް ގޮވާލާފައެވެ.

ދިވެހި ސަރުކާރުން އަމަލުކުރަމުންދާ ގޮތުން މިނިވަން އިންސާފުވެރި އިންތިހާބެއް ބޭއްވޭނެ ފުރުސަތެއް ނެތް ކަމަށާއި މިހާރު އޮތް އިލެކްޝަންސް ކޮމިޝަން ބަދަލުކުރަން ޖެހޭ ކަމަށް އިދިކޮޅު ޕާޓީތަކުން ބުނަމުން ދާއިރު، މިނިވަން އިންސާފުވެރި އިންތިހާބެއް ހޯދައި، ސިޔާސީ ހައްޔަރީން ދޫކޮށްލުމަށް ގޮވާލައި ކުރިޔަށް ގެންދަން ނިންމި ހިނގާލުމުގައި ބައިވެރިވުމަށް އަމީތު އެމްޑީޕީ އޮފީހުގެ ކުރިމަތީގައި ހުންނަވަނިކޮށް އެސްއޯ ފުލުހުންގެ ގްރޫޕަކުން އައިސް އޭނާ ގަދަކަމުން ޖިޕަށް އަރުވައިގެން ގެންދިޔައެވެ.

އަމީތު ހައްޔަރުކުރުމާއި ގުޅިގެން ގުޅިފައިވާ ސިޔާސީ ޕާޓީތަކަށް ނިސްބަތްވެ ވަޑައިގަންނަވާ، ރައްޔިތުންގެ މަޖިލީހުގެ މެމްބަރުންނާއި ޕާޓީތަކުގެ ލީޑަރޝިޕްގެ އިސްބޭފުޅުން ވަނީ ކަންބޮޑުވުން ފާޅުކުރައްވާފައެވެ. މި އެއްވުމުގައި ރައްޔިތުންގެ މަޖިލީހުގެ މެމްބަރުންނާއި ގުޅިފައިވާ ސިޔާސީ ޕާޓީތަކުގެ އިސް ބޭފުޅުން ބައިވެރިވެވަޑައިގެންނެވިއެވެ.