ރަލާއި އޫރުމަސް ރާއްޖެ އެތެރެ ކުރުމަކީ ހަރާމް ކަމެއް: ޝެއިޚް އަލީ ޒައިދު
12 ޖުލައި 2018 | ބުރާސްފަތި 19:31ބިސްމި ލިޔެގެން ރާ އެތެރެކުރާ ސެޓްފިކެޓް ހަދާފައިވުމަކީ ލަދުވެތިކަމެއް
ޝެއިޚް އަލީ ޒައިދު ދީނީ ދަރުސެއް ދެއްވަނީ...
ރަލާއި އޫރުމަސް ރާއްޖެ އެތެރެ ކުރުމަކީ ކަނޑައެޅިގެން ހަރާމް ކަމެއް ކަމަށް މަޝަހޫރު ދީނީ އިލްމުވެރިޔާ އަލީ ޒައިދު ވިދާޅުވެއްޖެއެވެ.
ރާއްޖެޓީވީން ބުރާސްފަތި ދުވަހުގެ ރޭ ގެނެސްދިން ފަލަ ސުރުހީ ޕްރޮގްރާމްގައި ރިޔާސީ އިންތިޚާބު ރައީސް ޔާމީން ކާމިޔާބުކުރައްވައިފި ނަމަ ރާއްޖެއަށް ރަލާއި އޫރުމަސް އެތެރެކުރުން މަނާކުރައްވާނެތޯ ސުވާލު ކުރުމުން ރައީސް ޔާމީންގެ ރަނިން މޭޓް ޑރ. މުހައްމަދު ޝަހީމް އަލީ ސައީދު ވިދާޅުވީ، އިގްތިސާދީ ކަންކަމުގެ ތެރޭގައި ހިނގާ ކަންކަމާއި ނުބެހޭނެ ކަމަށާއި ރާއްޖެއަށް ރަލާއި އޫރުމަސް އެތެރެ ވެފައި ހުރީ އެތަކެތި ދުނިޔޭގައި ހުރުމުން ކަމަށެވެ.
ރަލާއި އޫރުމަހާއި ބެހޭ ގޮތުން ކުރި ސުވާލަށް ޝަހީމް އެކަށީގެންވާ ޖަވާބެއް ނުދެއްވުމާއި ގުޅިގެން އެމަނިކުފާނަށް މިހާރު ގިނަ ބައެއްގެ ފާޑު ކިޔުން އަމާޒުވެފައިވާއިރު ޝައިހް އަލީ ޒައިދު ކުރައްވާފައިވާ ޓްވީޓެއްގައި ވިދާޅުވީ ރަލާއި އޫރުމަސް ރާއްޖެއަށް އެތެރެ ކުރުމަކީ ހަރާމް ކަމެއް ކަމަށާއި، ބިސްމި ލިޔެގެން ރާ އެތެރެކުރާ ސެޓްފިކެޓް ހަދާފައިވުމަކީ ލަދުވެތިކަމެއް ކަމަށެވެ. އަދި ވިދާޅުވީ އިގްތިސާދީ ގޮތުން ވެސް އެކަން އެގޮތަށް ނުކުރެވޭނެ ކަމަށެވެ.
މީގެ އިތުރުން ޝެއިލް އަލީ ޒައިދު ވިދާޅުވީ އަދުލްވެރިކަން އެތަނެއްގައި ނެތް ނަމަ އެތަނެއްގައި އޮންނަނީ ހުސް ހަމަނުޖެހުން ކަމަށެވެ. އެމާހައުލެއްގައި އޮންނާނީ ބިރުވެރިކަމާއި ، ފަސާދަކަން ފާހަގަކުރައްވައި ޝެއިހް އަލީ ވިދާޅުވީ ބަސްވިކޭނީ ހިޔާނަތްތެރީންގެ މުޑުދާރު މީހުންގެ ކަމަށެވެ. އަދި ވިދާޅުވީ މިކަމުގެ ގެއްލުން އެންމެނަށް ވެސް ކުރާނެ ކަމަށެވެ.
