ކިތަންމެ މަކަރެއް ހެދިޔަސް މި އިންތިހާބު ކާމިޔާބު ކުރާނަން: މާރިޔާ
ޑރ. ވަހީދަށް ލިބުނު ވަރު ވެސް ޔާމީނަށް ނުލިބޭނެ
އިބޫ ދޮރުން ދޮރަށް ކެމްޕެއިންގައި ގޭގެއަށް ވަޑައިގަންނަވަނީ:- މާރިޔާ ވިދާޅުވީ އިންތިހާބު ކާމިޔާބު ކުރާނެ ކަމަށް
މިއަހަރު ރިޔާސީ އިންތިހާބުގެ ނަތީޖާ އޮޅުވާލުމަށް ކިތަންމެ މަކަރެއް ހެދި ނަމަވެސް އިރާދަ ކުރެއްވިއްޔާ އެމްޑީޕީގެ ރިޔާސީ ކެންޑިޑޭޓް މި އިންތިހާބު ކާމިޔާބު ކުރައްވާނެ ކަމަށް އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) ގެ ތަރުޖަމާނު މާރިޔާ އަހްމަދު ދީދީ ވިދާޅުވެއްޖެއެވެ.
ގުޅިފައިވާ ސިޔާސީ ޕާޓީތަކުން ތާއީދު ކޮށްފައިވާ އެމްޑީޕީގެ ކެންޑިޑޭޓް، އިބޫގެ ކެމްޕެއިން ހަރަކާތްތަކާ ގުޅޭ ގޮތުން މައުލޫމާތު ދިނުމަށް ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި މާރިޔާ ވިދާވީ މި އިންތިހާބުގައި ސިއްސައިގެންދާވަރުގެ ނަތީޖާއެއް އެމްޑީޕީގެ ކެންޑިޑޭޓް ނެރޭނެ ކަމަށެވެ.
"ޑރ. ވަހީދު ހޯދެއްވިވަރުގެ ނަތީޖާއެއް ވެސް ރައީސް ޔާމިނަށް ނުލިބޭނެ ކަމަށް އަޅުގަނޑުމެނަށް ދިރާސާތަކުން ފެނިގެން ދަނީ. ވަރަށް ގިނަ މީހުން އަޅުގަނޑުމެންނާ ކުރާ ސުވާލެއް މަކަރުހަދާނެ އޭ. އެ ކަހަލަ ކިތަންމެ ވާހަކައެއް. ކިތަންމެ ވަރަކަށް މަކަރު ހެދިޔަސް ﷲ އިރާދަ ކުރެއްވިއްޔާ މި ކެމްޕެއިން ކާމިޔާބުކުރާނަން،" މާރިޔާ ވިދާޅުވިއެވެ.
މާރިޔާ ވިދާޅުވީ ހުކުރު ދުވަހު އައްޑޫ ސިޓީއަށް އިބޫ ވަޑައިގެންނެވުމަށް ހަމަޖެހިފައިވާއިރު މި ފަހަރުގެ އެންމެ ބޮޑު މަގުސަދަކީ އެރަށްރަށުގައި ތިބި ގުޅިފައިވާ ސިޔާސީ ޕާޓީތަކުގެ ކެމްޕެއިން ޓީމްތަކާ ބައްދަލު ކުރެއްވުން ކަމަށެވެ. އަދި އެހެން މުޅި ރާއްޖޭގައި ފަށާ ދޮރުން ދޮރަށް ކެމްޕެއިން ރަސްމީކޮށް ހޮނިހިރު ދުވަހު ފައްޓަވަން ހަމަޖެހިފައިވާ ކަމަށް ވެސް މާރިޔާ ވިދާޅުވިއެވެ. އަދި އެދުވަހު ރާއްޖޭގެ އެކި ރަށްތަކުގައި އެ ދުވަހުން ފެށިގެން ދޮރުން ދޮރަށް ކެމްޕެއިންތައް އެމްޑީޕީއާ ގުޅިފައިވާ ޕާޓީތަކުން ހިންގަމުންދާ ކަމަށް މާރިޔާ ވިދާޅުވިއެވެ.
މާރިޔާ ވިދާޅުވީ ރަސްމީކޮށް މި ހަރަކާތް ފެއްޓެވުމަށް ފަހު މާލޭގައި އިބޫ ދޮރުން ދޮރަށް އަދި ހިންގަވާނެ ކަމަށެވެ. އިބޫ މިހާރު ވެސް ވަނީ މާލޭގެ އެކި ގެތަކަށް ޒިޔާރަތް ކުރައްވާފައެވެ.
ރިޔާސީ އިންތިހާބު އަންނަ ބާކީ އޮތް 73 ދުވަހުގެ ތެރޭގައި ކެމްޕެއިންތައް ހިންގަމުން ދަނީ އެކަން އެންމެ ފަސޭހައިން ކުރެވޭނެ ގޮތަކަށް ރޭވިގެން ވަކި ތަރުތީބަކުން ކަމަށް މާރިޔާ ވިދާޅުވިއެވެ. އިންތިހާބުގައި އެމްޑީޕީގެ އޮބްޒާވަރުންގެ ގޮތުގައި ވޮލިންޓިއަރކޮށް މަސައްކަތް ކުރަން ބޭނުންވާ ފަރާތްތަކަށް އަދިވެސް އެ ފުރުސަތު އެބަ އޮތް ކަމަށް ވެސް މާރިޔާ ވަނީ ފާހަގަ ކުރައްވާފައެވެ.
