ރާއްޖެ އެތެރެކުރި 6.87 ކިލޯގެ މަސްތުވާތަކެތި ކަސްޓަމްސް އިން އަތުލައިގެންފި
3 ޖުލައި 2018 | އަންގާރަ 07:28އިންޑިޔާގެ ކޮޗިންގއިން ރާއްޖެ އައި ބަނގުލަދޭޝް މީހެއްގެ އަތުން އަތުލައިގަތީ 4.828 ކިލޯގެ މަސްތުވާތަކެތި
އެއާރޕޯޓުން އަތުލައިގަނެވުނު މަސްތުވާތަކެތި...
ރާއްޖެ އައި ފަސިންޖަރުންގެ ފޮށިތަންމަތި ބަލައިފާސްކުރުމުގެ ތެރޭގައި ދެފަހަރެއްގެ މަތީން 6.87 ކިލޯގެ މަސްތުވާތަކެތި ކަސްޓަމްސް އިން އަތުލައިގެންފިއެވެ.
ކަސްޓަމްސް އިން ބުނީ ޖޫން 29 ވަނަ ދުވަހު އިންޑިޔާގެ ކޮޗިންގ އިން ރާއްޖެ އައި ބަނގުލަދޭޝް މީހެއްގެ އަމަލުތައް ހުރި ގޮތުން އޭނާއާ މެދު ޝައްކުކުރެވިގެން އިތުރަށް ބަލައި ފާސްކުރުމުގެ ތެރޭގައި އޭނާގެ ލަގެޖުގެ ތެރެ އިން މަސްތުވާތަކެތި ކަމަށް ޝައްކުކުރެވޭ ތަކެތި ރައްކާކޮށްފައި ހުރި 2 ބްލެންކެޓް ފެނިފައިވާ ކަމަށެވެ. މި ތަކެތި ތަހުލީލުކުރި އިރު މަސްތުވާތަކެތީގެ ބާވަތެއް ކަމަށްވާ ކެނަބިސްއަށް ޕޮޒިޓިވް ވެފައިވާއިރު، އަތުލައިގަނެވުނު މަސްތުވާތަކެތީގެ ބަރުދަނުގައި ޕެކިންގއާ އެކު ޖުމްލަ 4.828 ކިލޯ ހުރި ކަމަށް ކަސްޓަމް އިން ބުނެއެވެ.
ކަސްޓަމް އިން ބުނީ މީގެ އިތުރުން އިންޑިޔާ މަގުން ބަނގުލަދޭޝް އިން ރާއްޖެ އައި އުމުރުން 34 އަހަރުގެ ފިރިހެނެއްގެ އަތުން ވެސް މަސްތުވާތަކެތިވެ އަތުލައިގަނެފައިވާ ކަމަށެވެ. ޖޫން މަހު 25 ވަނަ ދުވަހު ރާއްޖެ އައި މި މީހާގެ އަމަލުތައް ހުރި ގޮތުން އޭނާއާ މެދު ޝައްކުކުރެވިގެން އިތުރަށް ބަލައި ފާސްކުރުމުގެ ތެރޭގައި އެ މީހާގެ ލަގެޖުގައި މަސްތުވާތަކެތި ކަމަށް ޝައްކުކުރެވޭ ތަކެތި ރައްކާކޮށްފައި ހުއްޓާ ފެނިފައިވާ ކަމަށް ކަސްޓަމުން ބުންޏެވެ. އަދި އެ ތަކެތި ތަހުލީލުކުރި އިރު މަސްތުވާތަކެތީގެ ބާވަތެއް ކަމަށްވާ ކެނަބިސްއަށް ޕޮޒިޓިވް ވެފައިވާ ކަމަށާއި، އަތުލައިގަނެވުނު މަސްތުވާތަކެތީގެ ބަރުދަނުގައި 2.053 ކިލޯ ހުރި ކަމަށް ވެސް ބުންޏެވެ.
ކަސްޓަމްސް އިން ބުނީ މި ދެ މައްސަލައިގައި އަތުލައިގަނެވުނު މަސްތުވާތަކެތީގެ ބަރުދަނުގައި 6.87 ކިލޯ ހުރިއިރު، މިމައްސަލައިގައި ޝާމިލްވާ މީހުންނާއި އަތުލައިގަނެވުނު މަސްތުވާތަކެތި އިތުރަށް ތަހުގީގު ކުރުމަށް ފުލުހުންނާއި ހަވާލުކޮށްފައިވާ ކަމަށެވެ.
